шъолъыр фондыр
Къэралыгъо фондэу «Хэгъэгум иухъумакIохэр» зыфиIорэм иIофшIэн изы лъэныкъохэм ащыщ хэушъхьафыкIыгъэ дзэ операцием иветеранхэр мамыр щыIакIэм къыфагъэзэжьынымкIэ ыкIи социальнэу ащ хэгъэгъозэжьыгъэнхэмкIэ IэпыIэгъу афэхъугъэныр. Медицинэ, зэтегъэуцожьын, социальнэ ыкIи юридическэ IэпыIэгъухэм яIофыгъохэм язэшIохын дакIоу ахэм IофшIэн ягъэгъотыгъэным, егъэджэгъэнхэм ыкIи яунэе Iоф зырагъэушъомбгъуным фондым ынаIэ атырегъэты.
Ветеранхэм IэпыIэгъу ягъэгъотыгъэнымкIэ социальнэ зэзэгъыныгъэр непэ зы амалышIухэм ащыщ. Ахъщэ IэпыIэгъу зэрагъотырэм дакIоу, ягукъэкI, яунэе сатыу пхыращынхэ ыкIи сэнэхьатыкIэм епхыгъэ гъогум техьанхэ алъэкIы.ХэушъхьафыкIыгъэ дзэ операцием иветеранхэм ащыщэу фондэу «Хэгъэгум иухъумакIохэр» зыфиIорэм ишъолъыр къутамэ ынаIэ зытыригъэтырэ Зелих Олег Евгений ыкъом а гъогум рыкIон ылъэкIыгъ.Олег Ростов-на-Дону къыщыхъугъ. ЕджапIэм ыуж ищыIэныгъэ къызэрымыкIоу хъугъэ: ныбжьыкIэзэ гъогу-транспорт хъугъэ-шIэгъэ хьылъэм хэфагъ ыкIи ащ хихыгъэ фыкъоныгъэм къыхэкIыкIэ ыныбжьыкIэ къытефэрэ дзэ къулыкъум ащагъэп.Ащ емылъытыгъэу, зэрэфэлъэкIэу ищыIэныгъэ ыгъэпсыгъ, унагъо ышIагъ, кIалэ ыпIугъ. Илъэс 14-м ехъурэ компаниеу «Магнитым» товарыр зыщаунэкIырэ гупчэу иIэм Iоф щишIагъ, хэтэрыкIхэмрэ пхъэшъхьэ-мышъхьэхэмрэ язытет лъыплъэщтыгъ. 2020-рэ илъэсым ар Адыгеим и Мыекъопэ район ит поселкэу Каменномостскэм къэкIожьыгъ, унэ ышIынэу ригъэжьагъ.ХэушъхьафыкIыгъэ дзэ операциер зырагъажьэм, рэхьатэу щысын ылъэкIыгъэп.— Харьковскэ лъэныкъом зэпэуцужь лъэшхэр къызыщежьэхэм, зэныбджэгъухэм тызэхэтэу къэбархэм тядэIущтыгъ ыкIи дэгъоу къыдгурыIощтыгъ ыбгъукIэ тыщытэу тяплъын зэрэтымылъэкIыщтыр. Тызэфытеожьи, гуфакIоу тыкIонэу итхъухьагъ. Нэбгырэ 16 тыхъущтыгъ. Ащ дэжьым нэбгырищ ядэжь къэзыгъэзэжьыгъэр, — еIо Олег Зелих.2022-рэ илъэсым чъэпыогъум и 9-м ар зэзэгъыныгъэм кIатхи, подразделениеу «Ахматым» хэтэу хэушъхьафыкIыгъэ дзэ операцием кIуагъэ. Полкэу «Темыр» зыфиIорэм иотделение икомандирэу агъэнафи, фронтым ичIыпIэ зэфэшъхьафхэм (Донецкэ, Луганскэ хэкухэм, Соледар) ащыкIогъэ зэпэуцужьхэм ахэлэжьагъ.Зэблэхъугъор къэсыфэ зипэщэ подразделением ыубытыгъэ пытапIэр ыIыгъын ылъэкIыгъ. Командирым ыкIи дзэкIолIхэм яIорэ яшIэрэ зэхэлъэу тэрэзэу зэрэзекIуагъэхэм ишIуагъэкIэ, дзэкъулыкъушIэхэм псаухэу къагъэзэжьыгъ.Олег Евгений ыкъор къызэкIожьым, шъолъыр фондым зыфигъэзагъ. Социальнэ координаторэу Ирина Скрябинам ветераным ынаIэ тыригъэтынэу ригъэжьагъ ыкIи Iофыгъоу ищыкIагъэхэм язэшIохын игъорыгъозэ лъегъэкIуатэ.Апэрэу фагъэцэкIагъэхэм ащыщ псэупIэм гъэстыныпхъэ шхъуантIэр ещэлIэгъэнымкIэ программэм диштэу ахъщэ ратыныр. Джащ фэдэу шъолъыр фондым иIэпыIэгъукIэ зыгъэпсэфыпIэу «Жемчужина моря» зыфиIоу Кабардинкэм дэтым ипсауныгъэ щигъэпытэнэу агъэкIуагъ, Анапэ зэтегъэуцожьыныр щикIугъ.Дзэ операцием къызыщауIэм, джыри зы Iофыгъо ыпашъхьэ къиуцуагъ. Адыгеим илъэс заулэрэ зэрэщыпсэугъэм емылъытыгъэу, Ростов хэкум зэрэщытхыгъэм пае шъолъыр ахъщэ тыныр къыратыгъэп. Шъолъыр фондым юридическэ Iофхэр ветераным фызэхищагъэх ыкIи очылым иIэпыIэгъукIэ дэо тхылъхэр фагъэхьазырыгъ. Iофыр ыкIэм нэсыфэ социальнэ координаторыр лъыплъыгъ. Ветераныр зыкIэдэугъэм хьыкумым къыдыригъэштагъ ыкIи къызэрауIагъэм фэшI шъолъыр ахъщэ тыныр къыIукIэжьыгъ. Нэужым ащ сэкъатныгъэу иIэм елъытыгъэу ищыкIэгъэ медицинэ уплъэкIунхэр ыкIи медикэ-социальнэ экспертизэр ышIыхи, ахэм язэфэхьысыжьхэмкIэ я 3-рэ купым хэхьэрэ сэкъатныгъэр фагъэнэфагъ.Уахътэ гъэнэфагъэ тешIагъэу Олег юридическэ гъэсэныгъэ зэригъэгъотыным зэрэкIэхъопсырэр къариIуагъ. Ар колледжэу «Синергия» зыфиIорэм чIэхьанымкIэ социальнэ координаторыр къыдеIагъ. Мы уахътэм кIалэр я 3-рэ курсым щеджэ, къэкIощт илъэсым университетым чIэхьажьын гухэлъ иI.2026-рэ илъэсым гъатхэм Олег Зелих социальнэ зэзэгъыныгъэр къыратыным пае фондым зыкъыфигъэзагъ. Къэгъагъэхэр зыщащэрэ иунэе тучан къызэIуихынэу ар фэягъ. Социальнэ координаторым ащ унашъоу пылъхэр, зэрэзекIощтхэр зэкIэ ветераным фиIотагъэх.Иунэе Iоф къызэIуихынымкIэ сатыу-планыр ыгъэхьазырынымкIэ Гупчэу «Мой бизнес» зыфиIорэм ащ зыфигъэзагъ ыкIи проектыр зэхэгъэуцогъэнымкIэ ахэр къыдеIагъэх. ЗэкIэ ыгъэхьазырыгъэ тхылъхэр цIыфхэм IофшIэн ягъэгъотыгъэнымкIэ ыкIи социальнэ хэхъоныгъэмкIэ Гупчэм икомиссие рихьылIагъэх. 2026-рэ илъэсым жъоныгъуакIэм иунэе сатыу зыригъэушъомбгъунымкIэ ветераным сомэ мин 350-рэ къыратыгъ.Ахъщэ IэпыIэгъур къызыщыратыщтым ехъулIэу тучаныр хьазырыгъ. Ар зэтегъэпсыхьэгъэнымкIэ IофшIэнхэм янахьыбэр ежь-ежьырэу Олег зэшIуихыгъ. Социальнэ зэзэгъыныгъэм къыкIэкIогъэ ахъщэмкIэ флористым иIанэ, мебелыр, къэзыгъэучъыIырэ системэр, хэушъхьафыкIыгъэ тхьакIыпIэр, апэрэ къэгъэгъэ къэщэгъур рищэфыгъэх.Тучаным игъэпсынкIэ IофшIэнхэм язы Iахь Олег иныбджэгъухэм ыкIи дзэкIолI къошхэм дагъэцэкIагъэх. «ЗэкI пIоми хъунэу, тIашъхьэхэмкIэ тшIыгъэ. Синыбджэгъу сигъусэу апчхэр хэдгъэуцуагъэх, гъэучъыIалъэр дгъэуцугъ», — еIо ащ.Аужырэ одыджыныр еджапIэхэм къазщытеогъэ мафэм, 2026-рэ илъэсым, жъоныгъуакIэм и 26-м тефэу ипроект ытIупщыгъ.— СэркIэ мыр тучан къызэрыкIоу щытэп. Мы чIыпIэм гушIуагъокIэ цIыфхэр ягупсэхэм апае къэгъагъыхьэ, шIухьафтыныхьэ къычIахьэхэ сшIоигъу. Тэ талъэныкъокIи гушIуагъор апэдгъохыщт. УиIофшIагъэ кIэух дэгъу къызэрихьырэр зыплъэгъукIэ, ыпэкIэ улъыкIотэным уфегъэблы, — хигъэунэфыкIыгъ ветераным.Олег Зелих икъэбар къегъэлъагъо, уиунэе Iоф ебгъэжьэнымкIэ социальнэ зэзэгъыныгъэр лъэбэкъушIоу зэрэщытыр. Фондэу «Хэгъэгум иухъумакIохэмкIэ» мыщ фэдэ щысэхэм мэхьанэ яI. ШIуагъэ къытэу пхыращырэ проект пэпчъ социальнэ координаторми, зызыфагъэзэрэ къулыкъу ыкIи организацие пэпчъ акIуачIэ зэхэлъэу зэрэзэдэлажьэхэрэм икIэух.НепэкIэ Олег Зелих исатыушIын зырегъэушъомбгъу, гухэлъышIухэр тапэкIэ зыфегъэуцужьых ыкIи ащ икъэбар нэмыкI ветеранхэм мамыр щыIакIэм зыкъыхагъотэнымкIэ щысэшIу афэхъу.IЭШЪЫНЭ Сусан.