Урысыем ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм и Гупчэ, АР-м хэгъэгу кIоцI IофхэмкIэ и Министерствэ ыкIи Мыекъопэ къэлэ администрацием ошIэ-дэмышIэ IофхэмкIэ и ГъэIорышIапIэ якъулыкъушIэхэр зэгъусэхэу уплъэкIун дэкIыгъо яIагъ, псыхъоу Шъхьэгуащэ ыкIи урамэу Лесноим зызщыбгъэпскIы мыхъущт чIыпIэу ащыIэхэр къаплъыхьагъэх. Мыщ фэдэ дэкIыгъохэмкIэ зэхэщакIохэм мурадэу яIэр псым зыщагъэпскIызэ цIыфхэм тхьамыкIагъохэр къямыхъулIэнхэр ары.
— «ЗыщыбгъэпскIы хъущтэп» ыIоу тамыгъэхэр атетых нахь мышIэми, цIыфхэр ащ къыгъэуцухэрэп, псым хэхьэх ыкIи щынэгъончъэнымкIэ шапхъэхэр аукъох. Ахэм сакъыныгъэ къызэрэзхамыгъафэрэм гумэкIыгъуабэ къафехьы, ащ екIодылIэхэрэми япчъагъэ макIэп, — къыIуагъ Урысые Федерацием ошIэ-дэмышIэ IофхэмкIэ и Министерствэ и ГъэIорышIапIэу Адыгэ Республикэм щыIэм испециалист шъхьаIэу ЯхъулIэ Олег.Псыхъохэм цIыфым ищыIэныгъэрэ ипсауныгъэрэ къащыухъумэгъэнхэмкIэ шапхъэхэр, общественнэ рэхьатныгъэр а чIыпIэхэм ащызыукъохэрэм, джащ фэдэу псым ухахьэ зэрэмыхъущтыр зытетхэгъэ тамыгъэхэр зымыгъэуцугъэхэм административнэ пшъэдэкIыжь арагъэхьы.ПэшIорыгъэшъ Iофтхьабзэу зэрахьэхэрэм ахахьэу инспекторхэм псыр щынагъоу зэрэщытыр цIыфхэм агурагъэIуагъ, ащкIэ зэдэгущыIэгъухэр адашIыгъэх, узыгъэгъозэрэ тхьапэхэр афагощыгъэх.ГъэIорышIапIэм иIофышIэхэм зэралъытэрэмкIэ, амыгъэнэфэгъэ чIыпIэхэм цIыфхэм зызэращагъэпскIырэм мы тхьамыкIагъохэр къыкIэлъэкIох.ГъэIорышIапIэм иIофышIэхэм анахьэу анаIэ зытырагъэтырэр кIэлэцIыкIухэр псым ымытхьэлэнхэр ыкIи шъобжхэр атещагъэ мыхъунхэр ары. Ащ фэдэ хъугъэ-шIэгъэ тхьамыкIагъохэм кIэлэцIыкIухэр ащыухъумэгъэнхэм фэшI Урысые Федерацием ошIэ-дэмышIэ IофхэмкIэ и Министерствэ и ГъэIорышIэпIэ шъхьаIэу Адыгэ Республикэм щыIэм ны-тыхэм зафегъазэ ясабыйхэм алъыплъэнхэу, япшъэрылъхэр икъу фэдизэу агъэцэкIэнхэу, сабыйхэм ящыIэныгъэрэ япсауныгъэрэ нахьыжъхэм аIэ зэрилъыр зыщамыгъэгъупшэнэу.КIАРЭФатим.