ЕшIэгъу лъэхъаныкIэм иублэгъум

ГандболымкIэ Адыгеим ибзылъфыгъэ командэу «Адыифыр» зыгъэпсэфыгъом къыдэкIыжьыгъ, ешIэгъу лъэхъаныкIэм зыфегъэхьазыры.

Командэм зэхъокIыныгъэхэр фэхъугъэх. Ахэр зыфэдэхэм ыкIи Урысые зэнэкъокъоу къыпыщы­лъым епхыгъэ пшъэрылъэу зыфагъэуцужьхэрэр зэдгъэшIэнэу гущыIэгъу тыфэхъугъ «АКъУ - «Адыифым» итренер шъхьаIэу Никита Голуб.— ЛъэхъаныкIэм иублэгъум нахь упчIэ шъхьаIэу тызгъэгумэкIыхэрэм ащыщ — хэта командэм къыхэнагъэр, хэта хэкIыжьыгъэр? Аужырэмэ ушъхьа­гъоу сыда яIэр?— Спортсменкэ заулэ командэм хэкIыжьыгъ. Юлия Хавронинамрэ Екатерина Салаховамрэ ежь яшIоигъоныгъэкIэ гандболыр агъэтIылъыжьыгъ. Анна Локян Тольятти и «Ладэ» ­рагъэблэгъагъ. Кобл Зуретэ «Динамо-Синара» хэхьагъ. Елена Смирновамрэ Сабина Казихановамрэ Уфа икомандэу «Алисэм» щыджэгущ­тых. Пшъашъэхэр «Адыифым» дэгъоу щешIагъэх, «тхьашъуегъэ­псэу» ясIомэ сшIоигъу, ягухэлъхэр къадэхъунэуи сафэлъаIо. ТренерхэмкIи зэхъокIыныгъэхэр тиIэх. Клубыр къабгынагъ Алексей Гузовымрэ Андрей Овсянниковымрэ. Тыгу къеуагъ, ау ыпэкIэ тылъыкIотэн фае. КъэлэпчъэIутхэм адэлэжьэрэ Наталья Тормозовар джырэкIэ сиIэпыIэгъу. Тикомандэ иврачыр Уджыхъу Анастасия. Мушкетерищым тафэд.

— Командэм иджэгупIэ чIыпIэхэу нахь къэунэкIыгъэ хъугъэхэр сыд фэдэха? Зэрэзэблэпхъун спортсменкэхэр тиIэха?— ЧIыпIэ нэкI дэдэхэр тиIэхэп, ыпэкIэ дэхэкIаеу зызэтедгъэ­псыхьэгъагъ. ЕтIани Урысые чемпионатым и Апшъэрэ лигэ къэзыхьыгъэгъэ «Ростов-­Дон-2»-мрэ «Динамо-Синарэмрэ» ащешIэщтыгъэ спортсменкэхэу Анастасия Федоровар, Татьяна Кирилловар, Лилия Кавера ыкIи Стефания Белолипецкаяр къедгъэблэгъа­гъэх. Сэнаущыгъэ дэгъу ахэм ахэлъ. Тикомандэ шIуагъэ къыфахьынэуи сэлъытэ. «Адыифым» къыгъэзэжьыгъ Дарина Никулинами.— Я 10-рэ чIыпIэм щытэу блэкIыгъэ ешIэгъу лъэхъаныр тикомандэ ыухыгъагъ. Нахь дэгъоу зэрэмыджэгушъугъэхэм сыда иушъхьагъур?— Ушъхьагъу гъэнэфагъэ тиIэп. Хэукъоныгъэхэр тшIыгъэх. Ахэр зыфэдэхэр къыдгурыIожьыгъ, Iоф зыдэтшIэн фэе лъэныкъохэри дгъэнэфагъэх.— Командэр текIоныгъэм пэблагъэу, ау зэIукIэгъур шIуа­хьыжьэу къыхэкIыгъа? Сыда ар зытехъухьэрэр? Сэнаущыгъэу спортсменкэхэм аIэкIэлъыр макIа?— Ащ фэдэ ешIэгъухэри тиIагъэх. Къыхэзгъэщы сшIоигъу «Кубань» ыкIи «Динамо-Синара» тазыдэджэгугъэ уахътэхэр. ТекIоныгъэм тыфакIощтыгъ, ау чемпионхэм ахэлъ шэн пытэм тIэкIу тыщыкIагъ.— БлэкIыгъэ ешIэгъу лъэхъа­ным зы зэIукIэгъумэ ащыщ икIэрыкIэу уджэгужьынэу къыуатыгъагъэмэ, сыд фэдэр ара къахэпхыщтыгъэр ыкIи сыда зэпхъокIыжьыщтыгъэр?— Москва и «Луч» тызыпэуцужьыр ары. Чемпионатым ­иаужырэ ешIэгъуитIугъ. Пшъашъэ­хэр ащ фэхьазырыгъахэхэп. Апкъышъол изытети ашъхьэхэм арыхъыкIыхэрэми нэмыкIэу садэ­лажьэщтыгъ.— ЕшIэгъу лъэхъаныкIэм сыдэущтэу ыкIи тыдэ зыщыфэжъугъэхьазырыра?— Зыпарэми тыкIорэп, ухьазырынхэр щыпшIынхэм Мыекъуа­пэ тегъэпсыхьагъ. «Астраханочкари» мыщ къэкIуагъэу щыI. Мы мазэм ыкIэхэм ныбджэгъу зэIу­кIэгъу ащ дытиIэнэу дгъэнэфагъэ. Урысыем илъэпкъхэм я Спартакиадэу Тольятти шышъхьэIум и 15-м щаублэщтми тыхэлажьэ тшIоигъу. Чемпионатым зыфэдгъэхьазырынкIэ ащ фэдэ зэнэкъо­къухэм яшIуагъэ къытэкIыщт.— Шъобжхэр зытещэгъагъэ­хэу ипсауныгъэкIэ джыри зэтемыуцожьыгъэ спортсменкэхэр командэм хэтха?— Арина Сергиенкэр дэхэ­кIаеу хъужьыгъэ, икъарыу зэрэщытэу хилъхьэзэ ухьазырынхэри ешIых. Лилия Кавера ыкIи Анастасия Филатовам зызэтырагъэуцожьы. ХэушъхьафыкIыгъэ программэм тетэу зыдэлэжьэжьых.— ЕшIэгъу лъэхъаныкIэм сыд фэдэ пшъэрылъа зыфэжъугъэ­уцужьырэр?— Командэ пэпчъ зыхэлэжьэрэ зэнэкъокъум илъэгапIэ нэсынэу фай. Тэри ащ фэдэ пшъэрылъ тиIэр. Командэ анахь дэгъуи 8-м ащ пае тыхэфэн фае.— Командэхэр щыIэха сыд хъугъэми, текIоныгъэр къышIошъухьын фаеу жъугъэнафэу?— Тыфай зэкIэми татекIонэу (мэщхы тренер шъхьаIэу Никита Голуб), ауж къинэрэ командэхэм, щэч хэлъэп, къашIотхьынэу щыт. Нахь лъэшхэми икъоу тапэ­уцужьышъун фае. «Кубань», «Черноморочка», «Звезда», «Динамо - Синара» — мыхэм ащыщ­хэм татемыкIомэ, командэ ­лъэшхэм ясатырэ тыхэуцошъущтэп.— ДжэгукIэ шIыкIэу бгъэфедэхэрэм зэхъокIыныгъэхэр афэпшIыщтха?— ТиджэгукIэ зэрэдгъэпсыщтыр зыгъэхьазырынхэм къагъэлъэ­гъощт. Спортсменки 8 кIэу командэм къыхэхьагъ. Пшъашъэхэр зэрэзэдэджэгухэрэм такъыпкъырыкIызэ ешIакIэр дгъэпсыщт.— «Адыифым» иджэгукIэ еплъынэу къакIохэрэр командэр джэгу зыхъукIэ IэпыIэгъу мэ­хъуха? ЦIыфхэр нахьыбэу зэIукIэгъухэм къящэлIэгъэным пае сыда командэм ышIэшъущтыр?— ЗэкIэ къытфэгумэкIхэрэм тафэраз. Тхьаегъэпсэух! Ахэм якуо макъэ командэм зэхихы зыхъукIэ, илъыгъохэр ышIыщтми ишIуагъэ къэкIо. ЗэIукIэгъухэм нахьыбэ къакIо къэс тэркIэ нахь дэгъу. Ахэр къещэлIэгъэнхэм пае тиджэгукIэ тэри дгъэлъэшын фаеу сэлъытэ.— Республикэ спорт еджапIэхэм защызыгъэсэрэ ныбжьыкIэхэр командэм къешъощалIэха?— Сэнаущыгъэ дэгъу зыIэ­кIэлъ ныбжьыкIэхэр тиIэх. Урысые зэнэкъокъур зедгъажьэкIэ, ахэм ащыщхэм тыкъяджэни тлъэкIыщт. Тикомандэ хэтых спорт еджапIэм зыщызыгъэсэгъэ пшъэшъи 6 : Татьяна Кирилловар, Юлия Кожубековар, Виктория Коваленкэр, Елизавета Краснокутскаяр, Ольга Черницовар ыкIи Дарина Никулинар.— Гандболыр зикIасэу зэIукIэгъухэм къакIохэрэм сыда къяпIошъущтыр?— ШъукъэкIо зэпыт, къарыоу шъуиIэр хашъулъхьэзэ шъукуу, Iэгушъо шъутеу. Тэри джэгукIэ дахэ къэдгъэлъэгъоным тыпылъыщт.