Иван Бормотовыр Адыгэ къэралыгъо университетым идоцент, педагогикэ шIэныгъэхэмкIэ кандидат, Урысыем изаслуженнэ зекIу, АР-м зекIонымкIэ изаслуженнэ IофышI, спорым имастер, тхакIо, профессиональнэ литераторхэм я Урысые Союз хэт, емызэщыжь IофшIэкIо-гупшысакIу.
Мы лIыр «Iофым щегъаIэ» зыфаIохэрэм ащыщ. Анахьэу ащ игугъу къэтшIыныр зэпхыгъэр итхэн, илитературнэ IофшIагъ. «Нэм ылъэгъурэр шъхьэм ыуас» зэраIорэр къыгъэшъыпкъэжьэу илъэсипшI пчъагъэ хъугъэу зыщыпсэурэ Адыгеим ичIыопс хьалэмэт фэплъэкIырэп. Тикъэлэ шъхьаIэу Мыекъуапэ къабзэ, зэдештэ, кIэракI; чъыг сатыр зэпэIутхэм, жьыфым фэдэу, чъыIэтагъэр ыкIи жьы къабзэр къапэкIы. Ежь тхакIоми шхъомч чъыгыбэр зыдэт къалэр лъэшэу икIас, ащ ишыхьат бэмышIэу къыдэкIыгъэ усэ тхылъым «Я люблю этот город с каштанами» шъхьэ зэрэфишIыгъэр.Усэу «Майкоп» зыфиIорэмкIэ И. Бормотовым итхылъыкIэ къызэIуихыгъ.«Я люблю этот город с каштанамиС той поры, когда был здесь юнцом,С клумбами красивыми, с тюльпанами,И дубраву за узким мостом».Сборникым уси 100-м нахьыбэ дэт: ахэр Адыгеим ичIыпIалъэ, илъэсым иуахътэхэм, чIыгум ижьыкъащэ ягъэшIэгъоныгъэ, псым ишIуагъэ, ТекIоныгъэм илъэпIагъэ, зэошхоу блэкIыгъэм иджэрпэджэжь, а зэкIэми агузэгу итых ЦIыфым илъэшыгъэ, илъэпIагъэ афэгъэхьыгъэхэр. УсакIоу БормотовымкIэ чIыопсымрэ цIыфымрэ язэпхыныгъэ пытэ мэхьанэ иI; ар лъэшэу ышъхьэкIэ зэхишIэу усакIом дунэе шхъуантIэр зэрэбаир, цIыфым ар къызэрешIушIэрэр, ежь цIыфри зафэу, зэрэфэлъэкIэу а дунэе дахэр ухъумэгъэным зэрэфэсакъырэр иусэхэм ащыкIегъэтхъы.УсакIор щыIэныгъэ лъэныкъуабэмкIэ гъэзагъэу матхэ, мэгупшысэ. Тинэнэжъ-тэтэжъхэм, ахэм анахьыжъхэм Тхьэм фыряIэгъэ шIошъхъуныгъэр, чIыгум фыряIэгъэ шIулъэгъур ыкIи джырэ мафэхэм зэрэлъытэ-зэфэсакъыжь шэнышIур лъэшэу зэрящыкIагъэр тхакIом ипроизведениехэм ащыкIегъэтхъы. Тиини тицIыкIуи зэфэсакъыжьэу зэкIэдэIукIхэмэ, лъэпкъ кIуачIэр нахь зэрэпытэрэр, узэкъотмэ – узэрэлъэшыр иусэ зэфэшъхьафхэм къащиIуагъ. Джащ фэд, тичIыопси, ти Хэгъэгуи, тиреспублики тафэсакъэу, тфэлъэкIырэр афэтшIэныр, ахэгъэхъогъэныр, хэтрэ цIыф лъэпкъкIи лэжьэныр IофышIу-шэнышIоу ылъытэзэ, Иван Бормотовыр иусэ сатырэ пэпчъкIэ къыфэджэ мамырныгъэм, ошъогур къэргъоным, лъэпкъхэр зэрэлъытэнхэм, зэдеIэнхэм; джащыгъум шIулъэгъур шъхьэлъэнышъ, мамырныгъэр зэрэпытэщтым ицыхьэ телъэу матхэ, мэусэ, иусэ сатырхэмкIэ зэпэблагъэ тешIы. ТхылъыкIэу «Я люблю этот город с каштанами» зыфиIорэм лъэпэмафэ ыдзынэу, ежь тхакIом ипсауныгъэ зэтетэу, усэ дэгъубэ джыри ытхынэу, шIоу ышIэрэр къетэжьынэу тыфэлъаIо.Мамырыкъо Нуриет.