ФутболымкIэ дунэе чемпионатыр аухыгъ. 1:0-у Испаниер Аргентинэм текIуагъ. Мы къэралыгъом испорт тарихъ пштэмэ, ятIонэрэу ащ фэдэ гъэхъагъэ ышIыгъ.
Мы зэIукIэгъур финалэу щытыгъэми, гъэшIэгъон дэдэу кIуагъэу пIошъущтэп. Испанием илъыгъохэр ышIыщтыгъэх, ау Iэгуаор дифышъущтыгъэп. Аргентинэр зыпэуцужьыщтыгъэ командэм икъэлапчъэ благъэу екIолIэшъущтыгъэп, ау футбол шапхъэхэр бэрэ ыукъощтыгъэх. Мыщ фэдэ джэгукIэм изэрар къэкIуагъ — Аргентинэм хэтыгъэ Энцо Фернандес тхьэпэ плъыжь судьям рити, джэгупIэм ригъэкIыгъ. Командэр нэбгырипшIэу къэнагъ. ЗэIукIэгъу охътэ шъхьаIэр 0:0-у аухыгъ. Футболым ишапхъэхэмкIэ такъикъ 15-у едзыгъуитIо джыри командэхэр ешIэнхэ фэягъ. Хэгъэхъогъэ уахътэр Испанием къызфигъэфедагъ, Нико Вильямс къыдзыгъэ Iэгуаор Ферран Торрес Аргентинэм икъэлапчъэ дигъэфэжьыгъ. Пчъагъэр 1:0-у Испаниер ыпэ ишъыгъ. Мы голым Аргентинэр къыгъэущыжьыгъэ фэдагъ, зэлъашIэрэ футболистэу Леонель Месси пэщэныгъэр командэм диштагъэу илъыгъохэр ашIыщтыгъэх. Ау пчъагъэр зэрахъокIын алъэкIыгъэп.
КъэIогъэн фае, Аргентинэм икъэлэпчъэIутэу Эмилиано Мартинес мы ешIэгъум дэгъу дэдэу джэгугъэ, Iэгоо пчъагъэ къэлапчъэм димыгъафэу къыубытыжьыгъ. Илъэс 39-рэ зыныбжь Леонель МессикIэ мы чемпионатыр аужырэу хъугъэ, Кубок шъхьаIэр ыIэгу итэу исэнэхьат ыгъэтIылъыжьынэу фэягъ, ау къылэжьыгъэр – тыжьын медаль. Испанием хэт илъэс 19 зыныбжь Ламин Ямаль командэм ифутболист анахь лъэшхэм ясатырэ хэуцуагъ.Испанием къыпэуцужьышъун командэ мы чемпионатым къыхэкIыгъэп, дунаим и Кубок къызэрилэжьыгъэри ащ ишыхьат.