Лъэс кIонымкIэ спорт фестивалэу «Ромашковый марафон» зыфиIорэр ыкIэм фэкIуагъ. Нэбгырэ 86-мэ тхьамэфэ кIоцIым лъэбэкъу мини 140-рэ, ар километри 100-м кIахьэ, къакIунэу къапыщылъыгъ.
Физическэ культурэмкIэ ыкIи спортымкIэ Мыекъуапэ и Комитет ащ кIэщакIо фэхъугъ. Iофтхьабзэм хэлэжьагъэхэм лъэбэкъоу ашIырэ пэпчъ осэшIхэм алъытэщтыгъ. Ащ епхыгъэ мобильнэ нэкIубгъо къызфагъэфедагъ. ГурытымкIэ зы мафэм километрэ 15 фэдиз хэлэжьагъэхэм акIущтыгъ.ЗэфэхьысыжьхэмкIэ, нэбгырэ 42-мэ къапыщылъыгъэ пшъэрылъыр агъэцэкIагъ. «ТэгушIо республикэм щыпсэухэрэр фэчэфэу марафоным зэрэхэлэжьагъэхэр. Унагъор зэгъусэу зыкъэзгъэлъэгъуагъэхэри ахэтых. Лъэс кIоныр псауныгъэр гъэпытэгъэнымкIэ IэпыIэгъушху, ащ нахьыбэ зэрэхэщэгъэщтым тэ тыдэлажьэ», — еIо Комитетым итхьаматэу Дмитрий Щербаневым.Нахь чанэу зызыушэтыгъэхэм ащыщ Костинхэм яунагъо. Зэшъхьэгъусэхэу Алексейрэ Ольгэрэ ыкIи япшъашъэхэу Аннэрэ Мариерэ 2020-рэ илъэсым щегъэжьагъэу мыщ фэдэ Iофтхьабзэхэм ахэлажьэх. Мызыгъэгум ныжъэу Татьяна Фомичевари ягъусагъ.«ТиунагъокIэ уахътэ зэрэзэдэдгъэкIощт амал хъугъэ «Ромашковый марафоныр». ТэгушIо лъэбэкъу мини 140-р зэрэткIушъугъэр», — аIо ахэм.Iофтхьабзэм зэфэхьысыжьхэр фашIыжьыщтых. Ащ хэлэжьагъэхэр зэкIэ щытхъу тхылъхэмрэ шIухьафтынхэмрэкIэ къыхагъэщыщтых.