АР-м хэдзынхэмкIэ и Гупчэ комиссие тыгъуасэ зичэзыу я LXXXII-рэ зэхэсыгъо иIагъ. Ар зэрищагъ ащ итхьаматэу Сэмэгу Нурбый.
Шъугу къэдгъэкIыжьын, мы мафэхэм комиссием Iофтхьабзэу зэхищэхэрэр УФ-м и Къэралыгъо Думэ иябгъонэрэ ыкIи АР-м и Къэралыгъо Совет – Хасэм ияенэрэ зэIугъэкIэгъухэм ядепутатхэм яхэдзынхэу 2026-рэ илъэсым иIоныгъо мазэ и 20-м щыIэщтхэм языфэгъэхьазырын зыфэгъэхьыгъэхэр.Пстэумэ апэу Урысыем илиберальнэ-демократическэ партие (ЛДПР) и Адыгэ шъолъыр къутамэ Къэралыгъо Советым – Хасэм идепутат хъунэу зыкI ыкIи зы мандат хъурэ хэдзыпIэ шъолъырхэмкIэ кандидатурэу къыгъэлъэгъуагъэхэм яспискэ мы зэхэсыгъом щаштагъ, финанс IофхэмкIэ ащ илIыкIощтыр щатхыгъ. АР-м хэдзынхэмкIэ и Гупчэ комиссие хэтэу Ольга Казначевскаям къызэриIуагъэмкIэ, зыкI хэдзыпIэ шъолъырхэмкIэ кандидатхэр нэбгырэ 78-рэ, зы мандат хъурэмкIэ 25-рэ мэхъух.Джащ фэдэу УФ-м и Къэралыгъо Думэ иябгъонэрэ зэIугъэкIэгъу идепутат хъунэу зикандидатурэ къэзыгъэлъэгъогъэ Осмэн Альберт Теуцожь ыкъом хэдзынхэмкIэ хэушъхьафыкIыгъэ счет къызэIуихыным тегущыIэхи, фитыныгъэ етыгъэнэу зэдаштагъ.Мыщ фэдэ фитыныгъэ ратыгъ УФ-м и Къэралыгъо Думэ иябгъонэрэ зэIугъэкIэгъу идепутат хъунэу зикандидатурэ къэзыгъэлъэгъогъэ Шэуджэн Тембот Мурат ыкъоми.ХЪУТ Нэфсэт.