ЗыкI къэралыгъо ушэтынхэм Адыгеим икIэлэеджакIохэу гъэхъагъэхэр ащызышIыгъэхэм ахэхъуагъ — балли 100 къэзыхьыгъэхэм япчъагъэ нэбгырэ 14-м нэсыгъ. Ар къыIопщыгъ Адыгеим и ЛIышъхьэу КъумпIыл Мурат.
90-рэ хъурэ пчъагъэ изыгъэкъугъэхэр нэбгыри 113-м текIи, 173-м нэсыгъ. 2025-рэ илъэсым егъэпшагъэмэ, профильнэ хьисапымкIэ, химиемкIэ, биологиемкIэ ыкIи физикэмкIэ шIэныгъэ нахь дэгъухэр къагъэлъэгъуагъэх.«Джыри зэ сафэгушIо сшIоигъу гурыт еджапIэхэр республикэм къыщызыухыгъэхэм ыкIи апшъэрэ еджапIэхэу къыхахыгъэхэм ачIэхьанхэмкIэ гъэхъагъэхэр ашIынхэу, анахьэу щыкIагъэ зыщыщыIэ сэнэхьатхэм афеджэнхэу сафэлъаIо. ТичIыгогъу ныбжьыкIабэмэ непэ общественнэ IофшIэным, творчествэм, спортым закъыщагъэлъэгъуагъ. Сэнэхьат шIэныгъэхэмкIэ уIэшыгъэхэ зыхъукIэ, ащ нахьыби афэукIочIыщт, тиреспубликэ имызакъоу, зэрэкъэралыгъуи ихэхъоныгъэ яIахь халъхьашъущт.Щэч хэлъэр, еджапIэхэм къачIэкIыгъэхэм ягъэхъагъэхэр зишIушIагъэхэм ащыщых ны-тыхэмрэ езыгъэджагъэхэмрэ. Ахэм ренэу анаIэ атырагъэтыгъ, адэIэпыIагъэх,шIэныгъэхэр аIэкIалъхьагъ, гупшысэнхэу арагъэшIагъ, Iофыр шIу арагъэлъэгъугъ.Шъолъырым ипащэхэри сабый пэпчъ сэнаущыгъэу хэлъыр къызэIуихынымкIэ амал егъэгъотыгъэным дэлажьэх. Лъэпкъ проектхэу «Унагъор», «НыбжьыкIэхэмрэ кIэлэцIыкIухэмрэ», джащ фэдэу «Единэ Россием» ипартие программэхэр дгъэфедэхэзэ гъэсэныгъэм иинфраструктурэу лъэхъаным диштэрэр тэгъэпсы, акъыл, творческэ ыкIи физическэ хэхъоныгъэхэм афэIорышIэщт чIыпIэхэр псэупIэ пстэуми къащызэIутэхых. Президентэу Владимир Путинымрэ УФ-м и Правительствэрэ тиIэпыIэгъухэу тапэкIи ащ тыпылъыщт», — къыIуагъ Адыгеим и ЛIышъхьэу, «Единэ Россием» ишъолъыр къутамэ и Секретарэу КъумпIыл Мурат.