БлэкIыгъэ Хэгъэгу зэошхор тикъэралыгъо итарихъ хэпчынэу щытэп, ар зыщыIагъэм илъэс 85-рэ тешIэжьыгъэми; Родинэм, ным, сабыйхэм – зэкIэ цIыф хыехэм апае зыпсэ зытыгъэхэм, зэмыблэжьыгъэхэм шъхьащэ афэтэшIы, тщыгъупшэхэрэп.
Владимир Тюковыр (1921 — 1944)Ар Мыекъуапэ щыпсэущтыгъэ мэкъумэщышIэ унагъо бэдзэогъум и 17-м, 1921-рэ илъэсым къыщыхъугъ. 1928-рэ илъэсым къыщегъэжьагъэу Московскэ хэкумкIэ къалэу Сходнэм щыпсэугъ. Володе класси 7-р къыухи, автосварочнэ техникумым ыкIи Московскэ аэроклубым ащеджагъ.ГъучIгъажъэу Iоф ышIагъ. ШэкIогъум и 2-м, 1940-рэ илъэсым Дзэ Плъыжьым кIуагъэ. 1942-рэ илъэсым дзэ-авиационнэ Энгельскэ еджапIэр къыухыгъ.Пилотыгъ, взводым икомандирыгъ, Закавказскэ штурмовикхэм яэскадрилье икомандир игодзагъ, Темыр-Кавказ фронтхэм ащызэуагъ, Приморскэ хэушъхьафыкIыгъэ дзэм хэтыгъ.Кавказыр къэухъумэгъэным, ТIуапсэ лъэныкъокIэ къэкIотэрэ пыидзэм пэуцужьыгъэным, Темыр Кавказыр, Тамань ихыгъэхъунэныкъо ыкIи Къырым шъхьафит шIыжьыгъэнхэм ахэлэжьагъ.ШэкIогъум, 1943-рэ илъэсым Владимир Тюковым ошъогум итэу пыидзэм етIупщыгъэу утын рихыгъ. ГухэкIми, дзэкIолI псэемыблэжьыр мэлылъфэгъум и 24-м, 1944-рэ илъэсым къалэу Севастополь ихьэнэ-гъунэ я 115-рэ дзэ быбыгъом щыфэхыгъ.Зэо пшъэрылъхэр дэгъу дэдэу ыгъэцакIэхэзэ, лIыгъэу ыкIи псэемыблэжьныгъэу зэрихьагъэм апае, СССР-м и Апшъэрэ Совет и Президиум и УнашъокIэ мэлылъфэгъум, 1944-рэ илъэсым старшэ лейтенантэу В.М.Тюковым Советскэ Союзым и ЛIыхъужъыцIэр къыфагъэшъошагъ.Лениным иорден, Быракъ Плъыжьым иорденитIу, Хэгъэгу зэошхом иорденхэу апэрэ шъуашэ зиIэр, медалэу «За отвагу» къыфагъэшъошагъэх. ЛIыхъужъэу Владимир Тюковым ишIэжь агъэлъапIэ ыкIи къалэу Сходнэм иурамхэм ащыщ, Севастополь пэмычыжьэу щыт псэупIэу Орловскэм изы урам ыцIэ афаусыгъ. ЛIыхъужъыр зыщыпсэугъэ унэу Сходнэм дэтым ыкIи Мыекъопэ еджапIэу N6-м иунэ шIэжь пхъэмбгъухэр къащызэIуахыгъэх.Хэти ащыгъупшагъэп, сыди ащыгъупшагъэп.Дзэукъожь Нуриет.