Гъэстыныпхъэ шхъуантIэр зимыIэхэм аIэкIэгъэхьэгъэным фытегъэпсыхьэгъэ программэу «Социальнэ догазификацием» фэгъэхьыгъэм ишIуагъэкIэ чъыгхэтэ товариществэхэм ахэхьэрэ унэхэр псэупIэкIэ цIыфхэм зэрэзэтырагъэпсыхьэрэр нахьыбэ хъугъэ. Газыр зэращалIэкIэ ахэр зиехэм агъэфэбэнхэ алэкIы, псы стыр аIэкIэхьэ, псэукIэ амал тэрэзхэр яIэ мэхъу.
Мы программэм зырагъэушъомбгъуным, чъыгхэтэ товариществэхэри къыхырагъэубытэнхэм партиеу «Единэ Россиер» кIэщакIо фэхъугъ. УФ-м и Президентэу Владимир Путиным ащ къыдыригъашти, 2024-рэ илъэсым Федеральнэ ЗэIукIэм фэгъэзэгъэ джэпсалъэу къышIыгъэм пшъэрылъ гъэнэфагъэхэр къыщигъэуцугъэх. Джы чъыгхэтэ товариществэхэм ащыпсэухэрэм янахьыбэм ящагухэм ыпкIэ хэмылъэу гъэстыныпхъэ шхъуантIэр афыращэлIэн амал яIэ хъугъэ.Шэуджэн район администрацием ыкIи партиеу «Единэ Россием» ичIыпIэ къутамэ япащэу Аулъэ Рэщыдэ проектыр зэрагъэцакIэрэм къытегущыIагъ.«Президентым пшъэрылъэу къыгъэуцугъэхэм ягъэцэкIэн партием ынаIэ тет. «Социальнэ догазификациер» Лъэпкъ программэм апшъэ ыгъэуцухэрэм ащыщ. Партиер кIэщакIо зыфэхъугъэр цIыфхэм лъэшэу ящыкIагъ, арышъ, шIуагъэ къытэу чIыпIэхэм ар ащыпхырыщыгъэным, унагъохэм псэукIэ амалэу яIэр нахьышIу хъунымкIэ адеIэгъэным ыуж тит».Программэм ухэлэжьэным шэпхъэ гъэнэфагъэхэр пылъых:— чъыгхэтэ товариществэр къоджэ псэупIэм игъунапкъэ пэблэгъэн фае;— псэупIэм гъэстыныпхъэ шхъуантIэр щызэбгырыщыгъэн е чъыгхэтэ товариществэм игъунапкъэхэм газыр анэгъэсыгъэнэу программэм къыщыдэ- лъытэгъэн фае;— унэр зием ар зэриунаер къэзыушыхьатырэ тхылъыр иIэн фае.«Чъыгхэтэ товариществэхэм гъэстыныпхъэ шхъуантIэр зэращызэбгыращырэм шъолъырым хэхъоныгъэ егъэшIыгъэнымкIэ ыкIи цIыфхэм ящыIакIэ нахьышIу шIыгъэнымкIэ мэхьанэшхо иI. Росреестрэм АР-мкIэ и ГъэIорышIапIэ ащ иIахь хилъхьаным, цIыфхэм яIоф афигъэпсынкIэным афэшI псэуалъэхэм ятхын уахътэу текIуадэрэр нахь къыгъэкIэкIыным фэхьазыр», — къыIуагъ мы ГъэIорышIапIэм ипащэу ЕмыкI Мариет.