2026-рэ илъэсым, бэдзэогъум и 7-м кIуачIэ зиIэ хъугъэ хэбзэгъэуцугъэу УФ-м узэрихьащтым ыкIи узэрикIыщтым, IэкIыб къэралхэм къарыкIыгъэу тихэгъэгу къихьэхэрэм фитыныгъэу яIэхэм афэгъэхьыгъэм зэхъокIыныгъэхэр фашIыгъэх. Ахэм къазэрэщыдэлъытагъэмкIэ, IэкIыб къэралхэм къарыкIыгъэу е гражданствэ зимыIэу УФ-м и УIэшыгъэ КIуачIэхэм е дзэ формированиехэм зэзэгъыныгъэ шIыкIэм тетэу къулыкъу ащызыхьыхэрэм, зэо зэпэуцужьхэм ахэлажьэхэрэм фэгъэкIотэныгъэхэр яIэ мэхъу. Ащ фэгъэхьыгъагъ АР-м хэгъэгу кIоцI IофхэмкIэ и Министерствэ кощын IофхэмкIэ и ГъэIорышIапIэ ипэщэ IэнатIэ зыгъэцэкIэрэ Елена Баклановам зэхищэгъэ Iофтхьабзэр. Зэхэсыгъом хэлэжьагъ гъэIорышIапIэм иотдел ипащэу, полицием имайорэу Валерий Садовоир.
Е. Баклановам къызэриIуагъэмкIэ, хэбзэгъэуцугъэу аштагъэм къызэригъэнафэрэмкIэ, дзэ къулыкъушIэхэр ыкIи зэо зэпэуцужьхэм ахэлажьэхэрэр УФ-м къихьанхэмкIэ, джащ фэдэу щыпсэунхэмкIэ пэрыохъу афэхъунхэ, рагъэкIынхэ, УФ-м щыпсэунхэ зэралъэкIыщт пIалъэр афэгъэкIэкIыгъэн, гъэсэныгъэ зэрагъэгъотынымкIэ ыкIи «Вид на жительство» зыфиIорэр агъэпсынымкIэ Iизын ятыгъэн, патент къыдахыным ыкIи афагъэпсыжьыным ифитыныгъэ яI, джащ фэдэу ыпэкIэ яIэгъэ патентыр аIахыжьын е Iоф ашIэнымкIэ Iизын къязытырэ тхьапэм кIуачIэ имыIэжьэу афызэкIагъэкIожьын алъэкIыщтэп.Федеральнэ хэбзэгъэуцугъэу аштагъэм фэгъэкIотэныгъэхэм алъэныкъокIэ хэгъэкIыгъэ щыIэп. Ащ къыхэкIэу дзэ къулыкъушIэхэм ыкIи зэо зэпэуцужьхэм ахэлажьэхэрэм Iизын къязытырэ документэу ыпэкIэ аратыгъэхэр аIахыжьынхэ фитыщтхэп.IэкIыб къэралхэм къарыкIыгъэхэм дзэм къулыкъу зэрэщахьыгъэр ыкIи зэо зэфэшъхьафхэм зэрахэлэжьагъэхэр къэзыушыхьатырэ документэу яIэн фаехэр:— военнэ билетыр, къулыкъу зэрихьыгъэр ыкIи зэо зэфэшъхьафхэм зэрахэлэжьагъэр дэтхагъэу;— зэзэгъыныгъэр (ар къэзыгъэшъыпкъэжьырэ тхьапэр);— зэзэгъыныгъэ зэрэзэдашIыгъэ унашъор;— дзэ къулыкъур зэрихьыгъэр къэзыушыхьатырэ справкэр;— зэо зэпэуцужьхэм яветеранэу зэрэщытымкIэ удостоверениер;— хэушъхьафыкIыгъэ дзэ операцием илъэхъан къулыкъу зэрихьыгъэр къэзыушыхьатырэ справкэр.Кощын Iофхэм япхыгъэ фэIо-фашIэхэм ягъэцэкIэнкIэ къэралыгъо пошлинэм ыуасэ зэрэхэхъуагъэм фэгъэхьыгъэ унашъом Урысые Федерацием и Президент кIэтхагъ. 2026-рэ илъэсым бэдзэогъум и 27-м къыщегъэжьагъэу джы къэралыгъо пошлинэм ыуасэ хэгъэхъуагъэу атыщт:— гъунапкъэхэр бэрэ зэпыпчынхэ плъэкIынэу визэ бгъэпсыным пае – сомэ 6000;— къэралыгъом къихьанхэмкIэ егъэблэгъэ тхылъ къаратыным фэшI – сомэ 8000;— «Вид на жительство» зыфаIорэр къыдахыным пае — сомэ мин 30;— охътэ гъэнэфагъэкIэ щыпсэунхэмкIэ тхылъ агъэпсыным фэшI – сомэ мин 15;— гъэсэныгъэ зэрагъэгъотынымкIэ охътэ гъэнэфагъэкIэ къэралыгъом щыпсэунхэм пае – сомэ 8000;— IэкIыб къэралхэм къарыкIыгъэхэм Iоф арагъэшIэн алъэкIынэу Iизын къаратыным фэшI – сомэ 15000;— IофшIапIэкIэ къакIохэрэм Iизын къаратыныр – сомэ 5000;— УФ-м игражданствэ зыштэнэу ыкIи ар къэзыбгынэнэу фаехэм – сомэ 50000.Джащ фэдэу 2026-рэ илъэсым мэкъуогъум и 10-м УФ-м и Президент зыкIэтхэгъэ унашъоу «Административнэ хэбзэукъоныгъэхэм алъэныкъокIэ УФ-м и Кодекс зэхъокIыныгъэхэр фэшIыгъэнхэр» зыфиIорэр зыфэгъэхьыгъэр IэкIыб къэралхэм къарыкIыгъэхэу уз щынагъо зиIэхэу ыкIи тхылъ нэпцIхэр зыгъэфедэу къыхагъэщыгъэхэр Урысые Федерацием рагъэкIыщтых. 2026-рэ илъэсым Iоныгъом и 1-м ащ кIуачIэ иIэ хъущт.Административнэ хэбзэукъоныгъэхэм алъэныкъокIэ УФ-м и Кодекс хэгъэхъонэу фашIыгъэхэм 2026-рэ илъэсым Iоныгъом и 10-м кIуачIэ яIэ хъугъэ. Джы IэкIыб къэралхэм къарыкIыгъэхэу шIокI зимыIэ медицинэ уплъэкIунхэр ашIыным зыщызыдзыехэрэм тазырэу сомэ мин 25-м къыщегъэжьагъэу мин 50-м нэс арагъэтыщт ыкIи административнэ пшъэдэкIыжь пылъэу Урысые Федерацием рагъэкIыщтых.IэкIыбым къикIыгъэхэм ыкIи ахэм IофшIапIэ языгъэгъотыхэрэм Iизын къязытырэ тхылъхэм якъыдэхынкIэ ыкIи ягъэхьазырынкIэ Урысыем хэгъэгу кIоцI IофхэмкIэ и Министерствэ ипаспортнэ визовэ сервис икъутамэхэм е Урысыем и МВД ичIыпIэ къулыкъухэм зафагъэзэн алъэкIыщт.КъэIогъэн фае, мы мафэм ехъулIэу IэкIыб къэралхэм къарыкIыгъэ нэбгырэ мин 12 фэдиз тиреспубликэ къихьагъэу учетым хэтых. НахьыбэрэмкIэ ахэр Узбекистан, Таджикистан, Туркмением къарыкIыгъэхэр ары. Мыхэм янахьыбэр студентых, джащ фэдэу IофшIапIэ лъыхъухэу къэкIох.Валерий Садовоим къызэриIуагъэмкIэ, АР-м хэгъэгу кIоцI IофхэмкIэ и Министерствэ ыкIи щынэгъончъэнымкIэ Федеральнэ къулыкъум и ГъэIорышIапIэу АР-м щыIэм якъулыкъушIэхэр зэгъусэхэу ренэу оперативнэ пэшIорыгъэшъ Iофтхьабзэхэр зэрахьэх, дэкIыгъо зэхэсыгъохэр зэхащэх, мигрантхэр нахьыбэу зыщыпсэурэ чIыпIэхэм макIох, Iоф зэрашIэрэм лъэплъэх. Ащ нэмыкIэу, мафэ къэс Урысыем и МВД икъэбарлъыгъэIэс системэ кощын IофхэмкIэ учетым цIыфхэр нахьыбэу зыщыхагъэуцогъэ чIыпIэхэр егъэунэфых, нэпцIыкIэ учетым щытхэмэ, хэбзэнчъэ зекIуакIэхэр зэрахьэмэ ауплъэкIу.КIАРЭ Фатим.