Гупчэм ихъарзынэщ
Зыныбжь илъэс 14-м щегъэжьагъэу 18-м шIомыкIыгъэхэм IофшIэпIэ чIыпIэ ягъэгъотыгъэныр республикэм щэкIо. ПыкIыгъэ илъэсныкъор пштэмэ, кIэлэеджэкIо 240-рэ Мыекъуапэ игурыт еджэпIэ 13-мэ ащылэжьагъ.
ЦIыфхэм IофшIэпIэ чIыпIэ языгъэгъотырэ республикэ Гупчэм, гурыт еджапIэхэм ыкIи шIэныгъэмкIэ къэлэ Комитетым зэзэгъыныгъэу зэдашIыгъэм диштэу, илъэсым икъихьагъум кIэлэеджакIоу Iоф зышIэ зышIоигъохэм ащ фэдэ амал араты. Ежь зычIэс еджапIэхэм ныбжьыкIэхэм ятхылъхэр ащагъэхьазырых. Ащ хэхьэх: цIыфым ищыIэныгъэ епхыгъэ документхэр, кIэлэеджакIохэм Iоф ашIэн фитыныгъэ зэряIэр къэзыушыхьатырэ тхьапэу ны-тыхэр зыкIэтхагъэхэр, ищыкIэгъэ медицинэ уплъэкIунхэр зэракIугъэмкIэ тхылъыр. Къыхэгъэщыгъэн фае, гъот макIэ зиIэ унагъохэм къарыкIыгъэхэр, хэушъхьафыкIыгъэ дзэ операцием хэлажьэхэрэм ясабыйхэр, чIыпIэ къин ифэгъэ ыкIи унэгъо Iужъухэм ащапIурэ кIэлэеджакIохэр ары лэжьэнхэм ифитыныгъэ зэратыхэрэр. Ау шапхъэ пылъ — еджэным IофшIэныр пэрыохъу фэхъу хъущтэп, охътэ лые иIэ зыхъукIэ ары кIэлэеджакIор зылэжьэшъущтыр.— Мафэм сыхьатныкъо афыхэхыгъэу мэлажьэх. Пшъэрылъэу агъэцакIэрэр зэфэшъхьаф. Гурыт еджапIэхэм ятхылъеджапIэхэм ащылажьэхэрэм ныбжьыкIэхэр яIэпыIэгъух, щагухэр агъэкъабзэ, уцыжъхэр рачых, чъыгхэм алъэплъэх, чэур агъалэ. ЕджэпIэ кIоцIым щыпшIэнэу щыт Iоф мыхьылъэхэр кIэлэеджакIохэм агъэцакIэ, – къыIуагъ тишъолъыр щыпсэухэрэм IофшIэпIэ чIыпIэ ягъэгъотыгъэнымкIэ Гупчэм икъутамэу Мыекъуапэ щыIэм испециалист шъхьаIэу Ольга Беляевам.ЛэжьапкIэу къаратырэр Iофэу ашIагъэм елъытыгъ. Ахъщэр ежь Гупчэм ыкIи шIэныгъэмкIэ Мыекъуапэ и Комитет къарэкIых.— Ащ имызакъоу, ныбжьыкIэхэм Iофтхьэбзэ зэмылIэужыгъохэри афызэхэтэщэх. ХъызмэтшIапIэу республикэм щылажьэхэрэм яIофшIакIэ ятэгъэлъэгъу. Мыгъэ «Картонтарэм», «Машзаводым» ащыIагъэх. КъафэтэIуатэ сэнэхьатэу щыIэхэр, хъызмэтшIапIэхэр нахьыбэу зыщыкIэрэ IофышIэхэр зыфэдэхэр, – еIо Гупчэм иIофышIэ.Iоныгъо мазэм мы IофшIэныр лъагъэкIотэщт.Цэй Замир.