Къэралыгъо автоинспекциер
Гъогу полицейскэхэр ыкIи общественникхэр зэгъусэхэу зыныбжь имыкъугъэхэм мототранспортыр зэрагъэIорышIэрэм игумэкIыгъохэр дэгъэзыжьыгъэнхэм фэIорышIэрэ уплъэкIун Мыекъопэ районым щырагъэкIокIыгъ.
НыбжьыкIэхэм хэбзэнчъэу мототехникэр зэрэзэрафэрэм лъыплъэгъэным АР-м хэгъэгу кIоцI IофхэмкIэ и Министерствэ ынаIэ тырегъэты. Гъэмэфэ зыгъэпсэфыгъохэм зэпымыоу инспекторхэм зыныбжь имыкъугъэхэм яIофхэмкIэ подразделением иIофышIэхэр ягъусэхэу пэшIорыгъэшъ Iофтхьабзэхэр зэхащэх. Автомобильхэр зэрыкIорэ гъогум Iэтахъохэр темыхьанхэм, ныбжь зиIэхэр икъоу ахэм алъыплъэнхэм, рулым кIэрамыгъэтIысхьанхэм къыфэджэх.Iофтхьабзэу «Зыгъэпсэфыгъохэм общественнэ советым тыригъусэу» зыфиIорэм къыдыхэлъытагъэу, Мыекъопэ районым унагъохэу зикIэлэцIыкIу а укъоныгъэмкIэ хэбзэухъумакIохэм янэплъэгъу къифагъэу щытхэм адэжьхэм аIухьагъэх. Гъогу щынэгъончъагъэм фэгъэхьыгъэу ны-тыхэм ыкIи якIэлэцIыкIухэм гущыIэгъу афэхъугъэх АР-м кIэлэцIыкIухэм яфитыныгъэхэр къэухъумэгъэнхэмкIэ Уполномоченнэм ипшъэрылъхэр зыгъэцэкIэрэ Татьяна Мельниченкэр ыкIи хэгъэгу кIоцI IофхэмкIэ Министерствэм и Общественнэ совет хэт Александр Девтеровыр.Мототранспортым епхыгъэ гъогъу хъугъэ-шIагъэхэу ныбжьыкIэхэм япсауныгъи, ящыIэныгъи зэщызыгъэкъогъэ пчъагъэхэр полицейскэхэм къаIотагъ. Iэтахъохэр мотоциклэм е питбайкым зытетIысхьэхэкIэ ежьхэм ящынэгъончъагъэ зэремыгупшысэхэрэм дакIоу, нэмыкI цIыфэу гъогурыкIоным хэлажьэхэрэми ящыIэныгъэ, тхьамыкIагъоу къахьын ылъэкIыщтыр къыдалъытэрэп. Полицием къызэритырэмкIэ, гъогу хъугъэ-шIагъэхэм ушъхьагъоу яIэхэм ащыщ зекIуаджэр, псынкIэ зефэныр ыкIи зефэнымкIэ фитыныгъэ ямыIэу рулым зэрэIутIысхьэхэрэр.Емыгупшысэу зисабый мопед е мотоциклэ къыфэзыщэфырэ ны-тыхэм а «джэголъэ дахэм» къыфихьын ылъэкIыщт тхьамыкIагъор къагурыIорэп. ЩыIэныгъэм ыкIи псауныгъэм зэрарэу рихыщтхэм адакIоу, административнэ ыкIи уголовнэ пшъэдэкIыжь ныбжьыкIэ водительхэми, ны-тыхэми зэрарагъэхьыщтыр бэхэм ашIэрэп.Татьяна Мельниченкэм ыкIи Александр Девтеровым унагъохэм зафагъазэзэ, нэбгырэ пэпчъ икIэлэцIыкIу ищынэгъончъагъэрэ игупсэфыныгъэрэ нахь лъапIэ зэрэщымыIэр хагъэунэфыкIыгъ. Арышъ, уисабый изекIуакIэ улъыплъэнэу щыт, зигъусэ ныбджэгъухэр, ахэм ашIэрэр пшIэнхэ, емыгупшысэхэу къахэфэрэ зекIуаджэхэр игъом зэпыпгъэунхэ плъэкIын фае.Iофтхьабзэм икIэухым полицейскэхэмрэ общественникхэмрэ ныбжь зиIэхэм агу къагъэкIыжьыгъ джыри зэрэсабыйхэзэ, шэнышIухэр игъом ахалъхьанхэм ыкIи хэбзэгъэуцугъэхэм шъхьэкIафэ афэшIыгъэным фэгъэсэгъэнхэм мэхьанэ зэряIэр.