Спорт зекIонымкIэ Къыблэ ыкIи Темыр - Кавказ федеральнэ шъолъырхэм язэнэкъокъу Анапэ пэмычыжьэу щыт псэупIэу Гостагаевскэм щыкIуагъ. Адыгеим испортсменхэм медаль 17 ащ къыщахьыгъ.
Краснодар, Ставрополь крайхэм, Астрахань, Волгоград, Ростов хэкухэм, Адыгеим ыкIи Республикэу Къырым къарыкIыгъэ спортсмен 300 фэдиз зэнэкъокъум хэлэжьагъ. ЗекIоным хэхьэрэ лъэныкъуищымкIэ ахэм заушэтыгъ.Апэрэ мафэм «Кросс - классика» зыфиIорэмкIэ спортсменхэм заушэтыгъ. Ахэм аныбжь илъэси 10-м щегъэжьагъэу 65-м шъхьэдэкIыщтыгъ. ТекIоныгъэ къыщыдахыгъ ХьакIэгъогъу Аслъанрэ Захар Питиновымрэ. Тыжьын медаль къахьыгъ Кирилл Кравченкэмрэ Нина Костарновамрэ. Джэрзыр къалэжьыгъ Олег Агеевым, Мария Полуночевам ыкIи Елизавета Лозовскаям.
ЯтIонэрэ зэнэкъокъу мафэм «Кросс- лонг» зыфиIорэмкIэ хэлэжьагъэхэм заушэтыгъ. Илъэс 65-рэ зыныбжьхэ ХьакIэгъогъу Аслъанрэ Нина Костарновамрэ мыщ текIоныгъэ къыщахьыгъ. Зыхэтыгъэ купхэмкIэ дышъэ медальхэр къалэжьыгъэх Мария Полуночевам, Елизавета Лозовскаям ыкIи Миладара Соколовам. Аужырэм спортымкIэ мастер хъуным икандидат шапхъэр ригъэкъугъ. ЯтIонэрэ чIыпIэхэр къыдахыгъэх Даниил Саначевымрэ София Ершовамрэ.«Кросс-эстафетэр» зыфиIорэр ящэнэрэ зэнэкъокъу мафэм къыдыхэлъытэгъагъ. Мыщи Адыгеим испортсменхэр къыщыхэщыгъэх. Зыныбжь илъэс 12-м шIомыкIыхэрэмкIэ тикомандэ джэрз медаль къыхьыгъ, 14-м нэмысыгъэ пшъэшъэжъыехэмкIи мыщ фэдэ гъэхъагъэ ашIыгъ республикэм илIыкIохэм. Мы купым, кIалэхэмкIэ, тыжьыныр къыщызыхьыгъэхэри тиспортсменхэр ары.Адыгеим икомандэ хэт спортсменхэм ятренерых Олег Агеевыр, Андрей Полуночевыр ыкIи Ожъубаныкъо Зинаидэ.