Теннис цIыкIумкIэ къэралыгъом ифедерацие ыгъэнэфэгъэ программэу «Урысыем инеущ» зыфиIорэм къыдыхэлъытагъэу Адыгэ Республикэм изэIухыгъэ зэнэкъокъу Мыекъуапэ щыкIуагъ.
Урысыем и Къыблэ ичIыпIэ зэфэшъхьафхэм къарыкIыгъэ спортсмен 200 ащ хэлэжьагъ. Адыгеим ихэшыпыкIыгъэ командэ нэбгырэ 34-рэ хэт. Ахэм Мыекъуапэ, Адыгэкъалэ, Кощхьэблэ ыкIи Тэхъутэмыкъое районхэм защагъасэ.Кобл Якъубэ ыцIэ зыхьырэ спорт Ордэунэм мэфиплIым спортсменхэм зыщаушэтыгъ. Зэнэкъокъум изэфэхьысыжьхэмкIэ, зэкъо зыкъэгъэлъэгъонымкIэ Адыгеим илIыкIохэм медалитф къахьыгъ. Ахэр зэкIэ Кощхьэблэ районым ипсэупIэу Вольнэм къикIыгъэх. Зыныбжь илъэс 12-м шIомыкIыхэрэмкIэ Дмитрий Устянскэр апшъэ хъугъэ. Илъэс 14-м нэмысыгъэхэмкIэ анахь лъэшыгъэр Арсений Семеновыр ары, ятIонэрэ мыщ щыхъугъ Александр Удаловыр. ПшъэшъэжъыехэмкIэ джэрз медалитIу къыхьыгъ Пелагея Калининам.ТIозэгъусэ джэгунхэмкIэ тиспортсменэу Арсений Семеновымрэ Шъачэ къикIыгъэ Кирилл Амосовымрэ ятIонэрэ чIыпIэ къахьыгъ. НэмыкI шъолъырхэм къарыкIыгъэ спортсменхэр игъусэхэу Пелагея Калининам джыри джэрз медалитIу къыхьыгъ.Теннис цIыкIумкIэ мыщ фэдэ зэнэкъокъу шышъхьэIу мазэм ыгузэгухэм джыри Мыекъуапэ щыкIощт.
