А. Гусев
Лъэпкъ проектэу «Унагъор» зыфиIорэм ифедеральнэ проектэу «Ныхэмрэ кIэлэцIыкIухэмрэ къэухъумэгъэнхэр» зыфиIорэм ипхырыщын, джащ фэдэу партиеу «Единэ Россием» инароднэ программэ гъэцэкIагъэ зэрэхъурэм яшIуагъэкIэ бзылъфыгъэ консультациехэм апае модульнэ унэ заулэ Адыгеим щашIы. Апэрэр Джэджэ районым, гупчэ район сымэджэщыр зыдэщыт чIыпIэм, къыщызэIуахыгъ. Адыгэ Республикэм и ЛIышъхьэу КъумпIыл Мурат Iофэу агъэцэкIагъэм икIэуххэм защигъэгъозагъ.
Ащ игъусагъэх АР-м иминистрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, псауныгъэм икъэухъумэнкIэ министрэу Мэрэтыкъо Рустем, Джэджэ районым ипащэу Сергей Кондратенкэр, президент программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр.
Адыгеим и ЛIышъхьэ псэолъакIэр къыплъыхьагъ, Iофэу ашIагъэм уасэ къыфишIыгъ, ащ щылажьэхэрэмрэ цIыфэу къекIолIагъэхэмрэ гущыIэгъу афэхъугъ. Бзылъфыгъэ консультацием ипащэу Татьяна Зоринам къыIуагъ ынаIэ къызэратыригъэтырэм, отделением пае унакIэу районым щыпсэухэрэр бэшIагъэу зыкIэхъопсыщтыгъэхэр зэраригъэшIыгъэм афэшI КъумпIыл Мурат зэрэфэразэр къыIуагъ. ТапэкIэ бзылъфыгъэ консультациер Джэджэ гупчэ район сымэджэщыр зычIэт унэм иящэнэрэ къат тетыгъ.
Джы квадрат метрэ 460-рэ зыубытырэ унакIэм медицинэм иIофышIэхэм Iоф щашIэным ыкIи къякIуалIэхэрэм апае ящыкIэгъэщт амалхэр зэкIэ щарагъэгъотых. Ащ УЗИ-мкIэ, ЭКГ-мкIэ, медикэ-социальнэ IэпыIэгъумкIэ кабинетхэр къыщызэIуахыгъэх, узыр зыщагъэунэфырэ, мафэрэ зыщяIэзэхэрэ ыкIи нэмыкI кабинетхэри хэтых. Ахэр зэкIэ джырэ уахътэм диштэрэ техникэмкIэ зэтегъэпсыхьагъэх. IэпэIэсэныгъэ ин зыхэлъ IофышIэхэри мыщ щэлажьэх. ПсэолъакIэм зы IофшIэгъу уахътэм нэбгырэ 80 фэдизмэ яфэIо-фашIэхэр афызэшIуихын ылъэкIыщт. Бзылъфыгъэ консультацием IофшIэным изэхэщэнкIэ зэкIэми зэдагъэцэкIэн фэе шапхъэхэр щагъэнэфагъэх. IэпыIэгъоу цIыфхэм аратырэр нахь шIогъэ ин къытэу гъэпсыгъэным пае шIыкIэ-амалыкIэхэр агъэфедэх. Бзылъфыгъэхэм афытегъэпсыхьэгъэ IэзапIэм а къэтпчъыгъэхэм анэмыкIэу хэтых медикэ - социальнэ IэпыIэгъумкIэ кабинетыр, ащ психологым консультациехэр щадешIых, бзылъфыгъэ лъэрымыхьхэми упчIэжьэгъу щафэхъух, цIыфхэр чэзыухэм ахэмытынхэмкIэ уахътэм диштэрэ амал зэфэшъхьафхэр агъэфедэх.Псауныгъэм икъэухъумэнкIэ Министерствэм къызэритыгъэмкIэ, модульнэ бзылъфыгъэ консультацием сомэ миллион 77-рэ фэдиз пэIуагъэхьагъ, ащ щыщэу сомэ миллион 48,5-р псэуалъэм ишIын, сомэ миллион 28,5-р Iэмэ-псымэхэм апэIухьагъ ыкIи миллиони 3,5-р — чIыпIэм изэтегъэпсыхьан. Ащ фэдэ псэуалъэу Красногвардейскэ районым щашIырэм епхыгъэ Iофхэри ыкIэм фэкIох. ПсэупIэу Яблоновскэми квадрат метрэ 600 фэдиз зыубытыщт псэуалъэ къыдэтэджэщт.
Адыгеим и ЛIышъхьэ IэзапIэм щылажьэхэрэм ыкIи цIыфэу къяуалIэхэрэм гущыIэгъу зафэхъум къызэрэхигъэщыгъэмкIэ, Урысыем и Президентэу Владимир Путиным демографием ылъэныкъокIэ хэгъэгум иIофхэм язытет нахьышIу шIыгъэнымкIэ пшъэрылъэу къыгъэуцугъэхэр республикэм гъэцэкIагъэ щэхъух. Щысэхэм зыкIэ ащыщ модульнэ бзылъфыгъэ консультациехэр гъэпсыгъэнхэр. А проектыр гъэцэкIагъэ зыхъукIэ, врачым еолIэнхэр нахь псынкIэ къафэхъущт, республикэм щыпсэурэ ныхэмрэ кIэлэцIыкIухэмрэ япсауныгъэ изытети нахь лъэгэпIэ иным нэсын ылъэкIыщт.
«А IофшIэным кIэух шъхьаIэу фэхъун фаер бзылъфыгъэхэмрэ кIэлэцIыкIухэмрэ япсауныгъэ нахь пытэ хъуныр, унагъохэр нахь зэгурыIонхэр, кIэлэцIыкIу пчъагъэу республикэм исыр нахьыбэ хъуныр. Ахэр ары тинеущрэ мафэ зыфэдэщтыр зэпхыгъэхэр. НасыпышIохэу, щыIэныгъэ амал дэгъу яIэу псэупIэ пэпчъ дэс кIэлэцIыкIухэр къэтэджынхэмкIэ лъэныкъо зэфэшъхьафхэм атегъэпсыхьагъэу Iоф тэшIэ: кIэлэцIыкIу IыгъыпIэхэр, еджапIэхэр, спорт гупчэхэр, культурэм иунэхэр тэшIых. Социальнэ инфраструктурэм тапэкIи хэхъоныгъэ ышIыным пае УФ-м и Правительствэ иIэпыIэгъу ишIуагъэ къытэкIы, «Единэ Россием» ипартийнэ программэхэм, лъэпкъ проектхэм къатырэ амалхэр зэкIэ тэгъэфедэх» — къыIуагъ КъумпIыл Мурат.ПсэолъакIэм щыкIогъэ зэIукIэгъум икIэуххэм атетэу Адыгеим и ЛIышъхьэ пшъэрылъ гъэнэфагъэхэр афишIыгъэх АР-м псауныгъэм икъэухъумэнкIэ иминистрэу Мэрэтыкъо Рустем ыкIи Джэджэ район сымэджэщым иврач шъхьаIэу Олег Сазоновым. Ахэм зыкIэ ащыщых медицинэм иIофышIэхэм яIэпэIэсэныгъэ хагъэхъон, цIыфхэм ядиспансеризациекIэ IофшIэныр агъэлъэшын зэрэфаер. ХэушъхьафыкIыгъэу афигъэнэфэгъэ пшъэрылъхэр зэпхыгъагъэхэр Гупчэ район сымэджэщым къыпэIулъ чIыпIэм изэтегъэпсыхьан ары.АР-м и ЛIышъхьэ ипресс-къулыкъу къытырэ къэбархэмкIэТхьаркъохъо Сафыет.