Iэшъынэ А.
Къэзэкъ культурэм ия 35-рэ фестиваль Адыгэ Республикэм ипсэупIэу Каменномостскэм тыгъуасэ мэфэкI шIыкIэм тетэу къыщызэIуахыгъ. Урысыем ис цIыф лъэпкъхэм языкIыныгъэ и Илъэсэу мыгъэ зэрагъэнэфагъэм ыкIи Пшызэ шъолъыр икъэзэкъыдзэ загъэпсыгъэр илъэс 330-рэ зэрэхъурэм Iофтхьабзэр афагъэхьыгъ.
АР-м икъэралыгъо хэбзэ къулыкъухэм ыкIи Урысые къэзэкъхэм я обществэ яIэпыIэгъукIэ фестивалыр зэхащагъ.Iофтхьабзэм хэлэжьагъэх Краснодар краим игубернатор игуадзэу, Пшызэ шъолъыр икъэзэкъыдзэ иатаман ипшъэрылъхэр зыгъэцэкIэрэ дзэ старшинау Александр Агибаловыр, АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец, АР-м и Къэралыгъо Совет – Хасэм и Тхьаматэ игуадзэу, УФ-м и ЛIыхъужъэу Цэй Эдуард, Мыекъопэ районым ипащэ игуадзэу Андрей Пономаревыр, АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет и Тхьаматэу Долэ Долэтбый.Джащ фэдэу зэхахьэм къекIолIагъэх къэзэкъ объединениехэм ялIыкIохэр, къэзэкъ ныбжьыкIэхэр, орэдыIо ыкIи къэшъокIо творческэ купхэр.
МэфэкI Iофтхьабзэр къызэIуихызэ Александр Агибаловым Краснодар краим игубернаторэу Вениамин Кондратьевым ыцIэкIэ ыкIи ежь ышъхьэкIэ фестивалым хэлажьэхэрэм шIуфэс гущыIэкIэ закъыфигъэзагъ ыкIи къэзэкъ культурэм ишъолъыр фестиваль июбилейкIэ къафэгушIуагъ.— Гъэбэжъу зэрылъ адыгэ чIыгум непэ тызэрищэлIагъ. Урысыем ис цIыф лъэпкъхэм языкIыныгъэ и Илъэс тефагъ Пшызэ шъолъыр икъэзэкъыдзэхэр загъэпсыгъэр илъэс 330-рэ зэрэхъурэр. Ащ нафэ къешIы зыкIыныгъэ зыхэлъ лъэпкъыбэ тызэрэхъурэр. Культурэу ыкIи шэн-хабзэу тиIэр ары тлъапсэ щызыгъаIэрэр. КъэIогъэн фае, щыIэкIэшIу тиIэу тыпсэуным фэшI адрэхэм афэдэу Урысыем ыкIи Пшызэ шъолъыр икъэзэкъыдзэхэр непэ хэушъхьафыкIыгъэ дзэ операцием хэлажьэх. Ар шIукIэ афэплъэгъунэу щыт. КъыткIэхъухьэрэ лIэужхэм тикультурэ, тихабзэ ыкIи тарихъыр ашIэным зэкIэхэми тыфэлэжьэн фае, — къыIуагъ А. Агибаловым.
АР-м и ЛIышъхьэу КъумпIыл Мурат ыцIэкIэ къэзэкъ культурэм ия 35-рэ юбилейнэ фестиваль къекIолIагъэхэм къафэгушIуагъ Владимир Свеженец. Къэзэкъхэм яижъырэ культурнэ кIэн къэухъумэгъэным ыкIи ныбжьыкIэхэм ар лъагъэкIотэным мэхьанэшхо зэриIэр ащ къыхигъэщыгъ. Джащ фэдэу Адыге- им щыпсэурэ цIыф лъэпкъхэм азыфагу зыкIыныгъэ илъэу зэрэзэдэпсэухэрэр къыкIигъэтхъыгъ. ТапэкIи лъэпкъхэм язэныбджэгъуныгъэ ыкIи языкIыныгъэ лъагъэкIотэнэу къафэлъэIуагъ.
АР-м и Къэралыгъо Совет – Хасэм идепутатхэм ацIэкIэ зэхахьэм къекIолIагъэхэм закъыфигъэзагъ Цэй Эдуард.— Тиреспубликэ имызакъоу, зэрэ Урысыеу мыщ фэдэу, Iофтхьабзэхэм общественнэ-политическэ мэхьанэшхо щыряI. Сыда пIомэ зыкIыныгъэм и Илъэс ар тефагъ ыкIи тиреспубликэ а хъугъэ-шIагъэм чIыпIэ гъэнэфагъэ щеубыты. Фестивалым къегъэлъагъо лъэпкъ культурэр зэрэбаир. Тишъолъыр щыпсэурэ лъэпкъ зэфэшъхьафхэм зыкIыныгъэ ахэлъыным, къэралыгъо лъэпкъ политикэр гъэпытэгъэным афэшI мыщ фэдэ Iофтхьабзэхэм яшIогъэшхо къэкIо, гушъхьэлэжь баиныгъэр къэухъумэгъэным фэIорышIэ. Мамырныгъэрэ щыIэкIэшIурэ тиIэнэу сышъуфэлъаIо, — къыIуагъ Цэй Эдуард.
Iофтхьабзэм цIыфыбэ, анахьэу ныбжьыкIэхэр, зэрищэлIагъ. Фестивалым иапэрэ мафэ гъэшIэгъон къэзышIыгъэр къэзэкъхэр шыхэм атесэу шIыкIэ къулайхэр къызэрагъэлъэгъуагъэхэр ары. Ащ нэмыкIэу, къэзэкъхэм агъэфедэрэ пкъыгъохэу пхъэм ыкIи шъом ахэшIыкIыгъэхэм Iофтхьабзэм хэлэжьагъэхэм защагъэгъозагъ. Джащ фэдэу къэзэкъ Обществэм хэтхэм аупщэрыхьыгъэ шхыныгъо зэфэшъхьафхэр хьакIэхэм арагъэуплъэкIугъэх.Къэзэкъ культурэм ифестиваль бэдзэогъум и 19-м нэс кIощт.Фестивалыр лъэныкъо зэфэшъхьафхэмкIэ гъэшIэгъонэу рекIокIынэу агъэнафэ. Мыщ хэлажьэхэрэм спорт лъэпкъ зэфэшъхьафхэмкIэ заушэтын амал яIэщт. ЗэхэщакIохэм къызэраIорэмкIэ, мыщ фэдэ Iофтхьабзэхэм яшIуагъэкIэ къэзэкъхэм яшэн-хабзэхэр ухъумагъэ мэхъух, джащ фэдэу ныбжьыкIэхэр бэу зэрещалIэх. Къэзэкъ обществэхэм азыфагу илъ зэпхыныгъэр гъэпытагъэ зэрэхъугъэм имызакъоу, къэзэкъхэм яшэн-хабзэхэр къэухъумэгъэнхэм ыкIи зэрагъэшIэным ныбжьыкIэхэм мэхьанэшхо ратыгъ. Якультурнэ кIэн къэухъумэгъэным ыкIи зыкIыныгъэ ахэлъэу пIугъэнхэм фэIорышIэрэ фестивалыр гум къинэжьынэу щэгугъых.КIАРЭ Фатим.