фондэу «Хэгъэгум иухъумакIохэр».
ХэушъхьафыкIыгъэ дзэ операцием иветеранхэм ыкIи ахэм яунагъохэм ыпкIэ хэмылъэу юридическэ IэпыIэгъу фондэу «Хэгъэгум иухъумакIохэм» щагъотын алъэкIы.
Къэралыгъо фондым афызэшIуихырэ Iофыгъохэм ащыщ хэбзэгъэуцугъэм диштэу фэгъэкIотэнхэр, социальнэ IэпыIэгъухэр, ахъщэ тынхэр аIугъэкIэгъэнхэр.IофшIэныр шIуагъэ къытэу зэхэщэгъэным фэшI шъолъыр фондым зэзэгъыныгъэ адишIыгъ къулыкъу зэфэшъхьафхэм: Федеральнэ нотариальнэ, очылхэм я Федеральнэ палатэхэм, Урысые общественнэ организациеу «Урысыем июристхэм я Ассоциацие», УФ-м юстициемкIэ и Министерствэ, УФ-м цIыфхэм яфитыныгъэхэр къэухъумэгъэнхэмкIэ Уполномоченнэм, прокуратурэм, следствием якъулыкъухэм, хэгъэгу кIоцI IофхэмкIэ Министерствэм.— Къэралыгъом ишъолъырхэм зэкIэми зэдэлэжьэныгъэмкIэ шIуагъэ къэзытырэ системэ ащызэхэтщэн тлъэкIыгъ. Дэгъоу къыдгурэIо лъэшэу зэрящыкIагъэр, арышъ, ар нахьышIу шIыгъэнымкIэ ищыкIэгъэ амалхэр зэхэтщэщтых, — хигъэунэфыкIыгъ УФ-м зыкъэухъумэжьынымкIэ иминистрэ игуадзэу, фондэу «Хэгъэгум иухъумакIохэр» зыфиIорэм итхьаматэу Анна Цивилевам.Джащ фэдэу фондым УФ-м цифрэ хэхъоныгъэмкIэ и Министерствэ игъусэу федеральнэ, шъолъыр ыкIи муниципальнэ IэпыIэгъухэу щыIэхэр зэкIэ къэралыгъо фэIо-фашIэхэм я Портал щаугъоинхэ алъэкIыгъ.Зэдэлэжьэныгъэу агъэпсыгъэм ишIуагъэкIэ джы социальнэ координаторхэм дзэ операцием хэлэжьагъэхэм, яунагъохэм яIофыгъохэр игъом, псынкIэу зэшIуахынхэ амал яIэ хъугъэ.Хэбзэгъэуцугъэу зекIорэм елъытыгъэу ыпкIэ зыхэмылъ юридическэ IэпыIэгъу зытефэхэрэр хэушъхьафыкIыгъэ дзэ операцием хэлэжьагъэхэр, УФ-м игъунапкъэхэм якъэухъумэн фэгъэзэгъэгъэ дзэкъулыкъушIэхэр, гуфакIохэр, ЧВК-м хэтхэу къулыкъур зыхьыгъэхэр, ДНР-м ыкIи ЛНР-м я УIэшыгъэ КIуачIэхэм, формированиехэм, къулыкъухэм ахэтхэу зэпэуцужьхэм ахэлэжьагъэхэр, ахэм яунагъохэр.Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ хэушъхьафыкIыгъэ дзэ операцием иветеранхэм ыкIи яунагъохэм ыпкIэ зыхэмылъ юридическэ IэпыIэгъу ягъэгъотыгъэныр зэрифэшъуашэу щызэхэщагъ. 2026-рэ илъэсым имэзих шъолъыр фондым лъэIу 350-м ехъу къырахьылIагъ. Ащ къеушыхьаты цIыфхэм ар зэрящыкIагъэр. Зигугъу къэтшIырэ купым хахьэхэрэм прокуратурэм илIыкIохэм зэIукIэгъухэр бэрэ афызэхащэх. Джащ фэдэу социальнэ ахъщэ тынхэм афэгъэхьыгъэ дэкIыгъо зэIукIэгъухэри муниципалитетхэм ащырагъэкIокIых. Очылхэм я Палатэ мафэ къэс шъолъыр фондым цIыфхэр щештэх.Юридическэ IэпыIэгъум епхыгъэ IофшIэнэу шъолъыр фондым щызэхэщагъэм нотариальнэри хэхьэ. Зэзэгъыныгъэу Палатэм дыряIэм ишIуагъэкIэ ветеранхэм ыкIи унагъохэм ящыкIэгъэ документхэр агъэпсынхэ алъэкIы. Хэбзэгъэуцугъэм диштэрэ фэгъэкIотэнхэу ахэм къатефэхэрэр, хъугъэ-шIэгъэ гъэнэфагъэхэмкIэ къэралыгъо пошлинэу амытынхэ алъэкIыщтхэр нотариусхэм агурагъаIох.Хэбзэ фитыныгъэхэмкIэ IэпыIэгъоу арагъэгъотырэм джыри бэмышIэу зырагъэушъомбгъугъ. Фондэу «Хэгъэгум иухъумакIохэр» зыфиIорэм ишъолъыр къутамэ ипащэу ПIатIыкъо Аслъанрэ АР-м и Къэралыгъо юридическэ бюро ипащэу ХьапэкIэ Аскэррэ зэдэлэжьэныгъэмкIэ зэзэгъыныгъэм зэдыкIэтхагъэх. Ветеранхэм ыкIи яунагъохэм хэбзэ фитыныгъэу яIэхэр агурагъэIонхэм, консультациехэр, дэкIыгъо зэIукIэгъухэр ыпкIэ хэмылъэу афызэхэщэгъэнхэм ар афэгъэхьыгъ.IЭШЪЫНЭ Сусан.