ЗэIухыгъэу ыкIи зафэу

Партиеу «Единэ Россием» ишъолъыр къутамэ ия XXXVIII-рэ конференцие иятIонэрэ уцугъо Мыекъуапэ щыкIуагъ. Iофыгъо шъхьаIэу зытегущыIагъэхэр мэкъэтынымкIэ мэфэ ЗыкIым изыфэгъэхьазырын. «Единэ Россием» и Адыгэ шъолъыр къутамэ и Секретарэу, Адыгеим и ЛIышъхьэу КъумпIыл Мурат Iофтхьабзэм хэлэжьагъ.

Президиумым джащ фэдэу хэхьагъэх АР-м и Къэралыгъо Совет – Хасэм и Тхьаматэу, республикэ парламентым ифракциеу «Единэ Россием» ипащэу Владимир Нарожнэр, УФ-м и Къэралыгъо Думэ Адыгеир къыщызыгъэлъагъохэу Владислав Резникрэ Хьасанэкъо Мурат­рэ, партиеу «Единэ Россием» и Адыгэ шъолъыр къутамэ ишъолъыр гъэцэкIэкIо комитет ипащэу АфэшIэгъо Рэмэзан.Партием хэтхэр, АР-м и Къэралыгъо Совет – Хасэм ифракциеу «Единэ Россием» идепутатхэр, муниципальнэ псэупIэхэмрэ общественнэ организациехэмрэ япащэхэр, чIыпIэ отделениехэм ялIыкIохэр джащ фэдэу зэхэсыгъом къекIолIагъэх.

Къызэрэугъоигъэхэм закъыфигъазэзэ Адыгеим и ЛIышъхьэ къыхигъэщыгъ къэблэгъэрэ хэдзын мэфэ ЗыкIэу рес­публикэм щыпсэухэрэм УФ-м и Къэралыгъо Думэрэ АР-м и Къэралыгъо Совет – Хасэмрэ ахэтыщтхэр къызщыхахынхэ фаем изыфэгъэхьазырынкIэ мы уцугъом мэхьанэу иIэр зэрэиныр.«Хэдзынхэр зыщыкIощтхэ уахътэм Iофхэм язытет дэгъоу къыдгурэIо. Зэфэ­сым къызыщэгущыIэм Президентэу Владимир Путиным джыри зэ къыкIигъэт­хъыгъ тикъэралыгъо зыфэдэ къэмыхъу­гъэ IэкIыб теIункIэныгъэр зэрищэчырэм. Ау Урысыер зэуапIэми, къэралыгъо кIоцIыми нахь махэ ашIы зэрашIоигъор къащыдэхъурэп», — къыIуагъ КъумпIыл Мурат.Адыгеим и ЛIышъхьэ къыIопщыгъ республикэм экономикэмкIэ икъэгъэлъэ­гъон анахь шъхьаIэхэм зыкъызэраIэтыгъэр, шъолъырым тапэкIи хэхъоныгъэ ышIыным пае анахь шъхьаIэу щытхэм ягугъу къышIыгъ ыкIи партием къыдыхэт­хэм пшъэрылъ гъэнэфагъэхэр къафигъэуцугъэх. Анахь шъхьаIэу алъытэхэрэм ащыщ хэушъхьафыкIыгъэ дзэ операцием хэлажьэхэрэмрэ ахэм яунагъохэмрэ адэIэпыIэнхэр. Адыгеим партием хэтхэм хэушъхьафыкIыгъэ дзэ операциер зыщыкIорэм ящыкIэгъэщтхэр афатIупщы зэпыт – ащ сомэ миллион 97-м ехъу пэIуагъэхьэгъах. Мы IофшIэныр джыри лъагъэкIотэщт.

Федеральнэ программэхэу, проектхэу цIыфхэм ящыIэныгъэ нахьышIум ылъэныкъокIэ зэзыхъокIыхэрэми КъумпIыл Мурат къатегущыIагъ. Ащ къыкIигъэ­т­хъыгъ еджапIэхэм, кIэлэцIыкIу IыгъыпIэхэм, сымэджэщхэм, культурэм иунэхэм ыкIи ФОК-хэм яшIынрэ е ягъэцэкIэжьынрэ партием изэкIэлъыкIо IофшIэн акIыб зэрэдэтыр. «Единэ Россием» илъэпкъ программэ ипкъэоу ар рагъэкIокIыгъ. Адыгеим щашIагъэм зэфэхьысыжь къыщыфашIыгъ шъолъыр конференцием иапэрэ уцугъо.Джырэ уахътэм программакIэм идэлэжьэн лъагъэкIуатэ. Республикэм щыпсэухэрэм къапкъырыкIырэ гукъэкI мини 4 фэдиз къаIэкIэхьэгъах. Шышъхьэ­Iум лъэпкъ программэу партиер хэ­дзынхэм зэрахэхьащтыр зэрэщытэу хьазырыщт.КъумпIыл Мурат джащ фэдэу агу къыгъэкIыжьыгъ праймеризэу щыIагъэр. Ащ ишIуагъэкIэ хэдзакIохэм «Единэ Россием» къыгъэлъэгъощт кандидатхэм нэIуасэ зафашIын ыкIи зэраготхэр зэхарагъэшIэн алъэкIыгъ. ПэшIорыгъэшъ мэкъэтынхэм ахэлэжьэгъэ нэбгырэ ­279-м щыщэу спискэм хэхьагъэр партием икандидати 127-рэ, мыхэм ащыщэу 25-р – зы мандат зиIэ шъолъырхэмкIэ. Ахэр щагъэнэфагъэх шъэф мэкъэтынэу конференцием илъэхъан зэхащагъэм. Спискэм хэхьагъэх IофшIэгъэ илъэсхэр зыкIыб дэлъ депутатхэм афэдэу кандидат ныбжьыкIэ 21-рэ, хэушъхьафыкIыгъэ дзэ операцием хэлэжьэгъэ нэбгырищи. КъумпIыл Мурат къызэриIуагъэу, Iоф­шIэкIэ амал дэгъу зыIэкIэлъхэмрэ кIочIакIэхэмрэ зэхэхьагъэх. Республикэм и ЛIышъхьэ кандидатхэм къяджагъ хэ­дзын гъэдэIоным илъэхъан зэIухыгъэу ыкIи зафэу зекIонхэу, цIыфхэм заIуагъэ­кIэным имэхьани къыкIигъэтхъыгъ.«Кампанием изэшIохынкIэ зэфэсым унэшъо шъхьаIэр Владимир Путиным къыгъэуцугъ: мэхьэнэ куу хэлъэу ыкIи зафэу зыфэбэнэжьыныр, пкIэ зимыIэ гъэгугъэнхэр мышIыгъэнхэр ыкIи къэгъэ­лъэгъон дэгъухэм афэлэжьэгъэныр», — къыхигъэщыгъ КъумпIыл Мурат.АР-м и ЛIышъхьэ ипресс-къулыкъу