«ЗэкIэми къызэдэтылэжьыгъ»

Мэкъумэщ хъызмэтым хэхъоныгъэ егъэшIыгъэным иIахь мымакIэу зэрэхилъхьэрэм фэшI УФ-м и Президент и Рэзэныгъэ тхылъ къызыфагъэшъошагъэу джырэблагъэ къызэратыжьыгъэхэм ащыщ Зезэрэхьэ Бислъан.

Шэуджэн районым имеханизатор анахь чанхэм ар ащыщ, илъэс 27-рэ ащ мы хъызмэтым ритыгъ. Ышнахьыжъэу Аслъан ихъызмэтшIапIэ джащ фэдизкIэ узэкIэIэбэжьмэ зегъэпсым, IэпыIэгъу фэхъунэу зэрэIухьэгъагъэу зыпарэкIи зэблихъужьыгъэп. Гъэмэфэ уахътэу, лэжьыгъэм иIухыжьын зырагъажьэкIэ, хьылъэзещэ автомашинэм исэу комбайным къыIожьырэр кIещы, адрэ къэнэрэ уахътэм тракторым тес.Ощххэм агъэохъухи кIасэу апхъынэу хъугъэ тыгъэгъазэм Бислъан хэтэу тыIукIагъ. Тракторым тесэу сатырхэм азыфагу уцыр диупкIыщтыгъ, щэнаутэу тыраутхагъэм ыгъэкIодыгъэхэр къытырихыщтыгъэх. Къэуцумэ уахътэу IэкIэкIыщтыр шIозэрарыгъ, иIофшIэн игъом ыухын фае, непэ культивациер хигъэ­кIымэ, неущи ышIэщтыр хьазыр. Тракторым лъашъоу пылъым уцэу къыугъоигъэр къыпихызэ тиупчIэхэм кIэкIэу джэуапхэр къаритыжьыгъ.— Рэзэныгъэ тхылъэу Урысыем и Президент зыкIэтхагъэр зэкIэ къысатыгъэхэм, районми, республикэми сакъыщыхагъэщэу хъугъэшъ, анахь ин, — къыIуагъ ащ. – СэркIи ащ мэхьанэшхо иI. Сыд къыуатыгъэми гуапэ пщэхъу, ау къэралыгъом ипащэ зыкIэтхагъэр къызэрыкIоп. Ащ фэдэу укъызыхагъэщыкIэ пшIагъэм лъэшэу укIэгушIужьы, джыри нахьыбэ пшIэ пшIоигъоу угукIэ уфегъэчэфы. Арэу щытми, сизакъоу сищытхъоу слъытэрэп. Iоф зэдатшIэхэрэм зэкIэми къызэдэтылэжьыгъ.

Бислъанрэ Аслъанрэ мэкъумэщышIэ унагъо къихъухьагъэх. КъызтекIыгъэхэ ятэжъ, ащ ышыхэр, ахэм ятэ-ятэшхэр чIыгулэжьыным пылъыщтыгъэх. Революцием ыпэкIэ чIыгу Iахьхэр яIэхэу зылэжьыщтыгъэхэр ахэтыгъэх, нэужым имылъку Iахи, дащыгъэу, къэзымыгъэзэжьыгъи къахэкIыгъ. Ежь зэшыхэм яцIыкIугъом къыщыублагъэу чIыгур шIу арагъэлъэгъугъ, ащ илэжьын фагъасэхэзэ къэтэджыгъэх. Ары ящыIэныгъэ ащ рапхыным ушъхьагъу фэхъугъэр.Аслъан ятэжъхэм алъ къытекIуагъ, ахэм ягъогу рыкIуи, щыIэныгъэм зэхъо­кIыныгъэу къыздихьыгъэхэм адиштэу хъызмэтшIапIэ ыгъэпсыгъ. Бислъан шъхьафэу а дэдэр ышIэнэу ыIуагъэп, губгъо IофшIэнхэм ышъхьэкIэ ахэлажьэмэ нахь тэрэзэу ылъытагъ, етIани, ежь щхызэ къызэриIорэмкIэ, хъызмэтшIапIэм игъэIорышIэн къыпыкIырэ Iофыбэр зыгорэм зэрифэн фэягъ.Къуаджэм зэрэдэсым, чIыгур зэрилэжьырэм арыкIэгъожьэу зы такъикъи къызэрэхэмыкIыгъэм къыкIегъэтхъы Бислъан.— Нэбгырэ пэпчъ зыгорэм фэкъу­лаеу къэхъу, зыфэкъулаери зэфэдэн ылъэкIыщтэп, — еIо ащ. – Сэ сшъхьэкIэ, лъэшэу къэIуагъэу щымытэу, губгъом ситэу, сыкъызэплъэкIымэ, сшIагъэр слъэгъу­жьымэ гухахъо хэсэгъуатэ. Симашинэ комбайным кIэтэу сапэр пыутысыкIэу коцыр къызэритакъорэм сыгу къыдещае. Тилэжьыгъэ бэгъуагъэу, къинэу пытлъэгъуагъэр хьаулые мыхъугъэу, сыхэIабэу сIэгу къистэкъогъэ коцым идэгъугъэкIэ тыкъызэримыгъэпцIэжьыгъэр зэхасшIэмэ сэркIэ насыпыгъ.Илъэс 27-у зылажьэрэм губгъо Iоф­шIэн щыIэу, ежь къыдэмыкIыгъэу зыпарэкIи къыхэкIыгъэп. Къэсымэджагъэми, пчэдыжьым игъом иIофшIэн ригъэ­жьэщт. КIымэфэ уахътэу зыгъэпсэфыгъо иIэми, техникэр зыдэщыIэм къэмыкIон ылъэкIырэп, ыгу къыфидэрэп. Аслъан нэмысызэ ежь кIогъахэуи бэрэ къыхэкIы. IофшIэныр шIу зэрилъэгъурэм, зэрэгумызагъэм имызакъоу, ышнахьыжъ ыгу фэгъу. Ащ фэдэ шынахьыкIэ зэригъусэм ежь фермерри рэгушхо, ыгукIэ зэрэрэхьатыр къыхегъэщы.Бислъан зэрэгумызагъэр тыдэгущыIэфи къыдгурыIуагъ. Бэрэ къыткIэлъырытышъугъэп, тракторэу ымыгъэкIосагъэм къыпыIукIырэ макъэм хэтэу тиупчIэхэм джэуапхэр кIэкIэу къаритыжьыхи, дэпкIэежьи тыгъэгъэзэ сатырхэм азыфагу дэхьажьыгъ.Тыгъэр чыжьэу къохьажьэу мэзахэ мэхъуфэ ар хьасэм къыхэкIыщтэп. Неущ нэф къэшъэу, осэпсыр зытекIыкIэ, хэхьажьыщт. КъыгъэшIагъэм инахьыбэм аущтэу Iоф ешIэ, езэщыгъэп, шъхьахырэп. Бислъан фэдэ лэжьэкIо гумыза­гъэу, иIофшIэн зыгуи зыпси хэлъхэр ары тызыгъашхэхэрэр. Ащ фэдэ цIыфхэр къызэрэтхэтхэр насыпыгъэу зыфэтлъэгъужьын фай. Ахэм тын пстэур акIуа­чIэкIэ къалэжьы.Псауныгъэ пытэ яIэу Iоф къинэу агъэцакIэрэр лъагъэкIотэнэу тафэлъаIо зэкIэ чIыгум дэлажьэхэрэм. Бислъан къэралыгъом ипащэ зыкIэтхэгъэ Рэзэныгъэ тхылъэу къыфагъэшъошагъэм пае тыфэгушIо, иунагъо датхъэу, игухэлъхэр къыдэхъухэу, бэгъашIэ хъунэу фэтэIо!ХЪУТНэфсэт.