А. Гусев
Адыгеим губгъо лэжьыгъэхэм яIухыжьын щылъагъэкIуатэ – республикэм ихъызмэтшIапIэхэм зэкIэми бжыхьэсэ коцыр аIожьы. IофшIэнхэр зэрэкIохэрэм зыщигъэгъозэнэу Адыгеим и ЛIышъхьэу КъумпIыл Мурат Джэджэ районым ит хъызмэтшIапIэу «Краснодарагроальянсым» кIуагъэ.
IофшIэгъу дэкIыгъом джащ фэдэу хэлэжьагъэх АР-м мэкъу-мэщымкIэ иминистрэу Къуанэ Анзаур, президент программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, Джэджэ районым ипащэу Сергей Кондратенкэр.Мэкъумэщ хъызмэтшIапIэм ипащэу Алексей Дубовик къызэриIотагъэмкIэ, пшъэдэкIыжь гъэнэфагъэ зыхьырэ обществэу «Краснодарагроальянс» зыфиIорэм 2026-рэ илъэсым Iуихыжьынэу гектар 6064-мэ чылапхъэ ащыриутыгъ. Мыгъэрэ пхъэн лъэхъаныр къиныгъэ, чIыгур зэрэцIынагъэм ыкIи ошъу зэрэщыIагъэм апкъ къикIэу. Джырэ уахътэм IофшIэныр чанэу зэшIуахы лэжьыгъэр къагъэнэжьыным фэшI. Комбайни 9 ыкIи лэжьыгъэр Iузыщырэ автомобиль 11 Iоныгъом хэлажьэ.Джырэ уахътэм «Краснодарагроальянсым» бжыхьэсэ коцэу къырихыжьырэр зы гектарым центнер 49-рэ – ар гурытымкIэ Джэджэ районым (зы гектарым центнер 47,8-рэ) ыкIи республикэм (зы гектарым центнер 44,5-рэ) къащахьыжьырэм анахьыб. АР-м мэкъу-мэщымкIэ и Министерствэ къызэрэщаIорэмкIэ, ащ фэдэ къэгъэлъэгъонхэр чIыгулэжьыныр акъылыгъэ хэлъэу зэрэзэшIуахырэм, аужырэ шапхъэхэм атет шIыкIэхэр зэрагъэфедэхэрэм яшыхьатых – бжыхьасэхэм аубытырэ чIыналъэм зэкIэми зыфэдэ къэмыхъугъэ лъэпкъышIухэм ахэхьэрэ кIэхэр арагъэкIугъэх. Ащ нэмыкIэу икIыгъэ илъэсым предприятием фэди 3-кIэ ахигъэхъуагъ псы зыщакIагъэхъорэ чIыгухэм – гектари 195-р гектар 766,9-м нагъэсыгъ. Мыщ дэжьым «Краснодарагроальянсым» къэралыгъо IэпыIэгъур чанэу егъэфедэ. Джащ фэдэу 2024-рэ илъэсым хъызмэтшIапIэм чъыгхатэхэм яшIэн ыублагъ. Къоджэ псэупIэу Сергеевскэм гектар 75-м чъыгхатэ щагъэтIысхьагъ, бжыхьэм ащ гектар 24-рэ джыри хагъэхъощт. Джа чIыпIэ дэдэм пхъэшъхьэ-мышъхьэхэр зычIэлъыщтхэ чIыпIэу тонн мини 5-м ателъытагъэр щашIыщт. Чъыгхатэм игъэшъокIын тегъэпсыхьагъэу хъызмэтшIапIэм субсидие къаIихын имурад.
Республикэм и ЛIышъхьэ мэкъу-мэщымкIэ Министерствэмрэ район администрациемрэ пшъэрылъ афишIыгъ мэкъумэщ къыдэгъэкIакIохэм къэралыгъо IэпыIэгъоу щыIэхэмкIэ къэбарыр зэралъагъэIэсырэр лъагъэкIотэнэу, лъэIухэр атынхэмкIэ адэIэпыIэнхэу. Джащ фэдэу пшъэрылъэу щытыр чIыгулэжьхэм гъэстыныпхъэ ягъэгъотыгъэныр ары. Мы Iофыгъохэр республикэм щызэшIуахых Урысыем мэкъу-мэщымкIэ и Министерствэрэ компаниеу «Лукойлымрэ» къыхэлажьэхэзэ.«Мэкъу-мэщыр – шъолъырым иэкономикэ илъэныкъоу анахь мэхьанэшхо зэттыхэрэм ащыщ. Мэкъумэщ-къыдэгъэкIыжьын комплексым хэхъоныгъэ ышIыным анахьэу тынаIэ тет къэралыгъом игъомылэпхъэ щынэгъончъэн зэшIохыгъэнымкIэ УФ-м и Президентэу Владимир Путиным къышIырэ пшъэрылъхэр дгъэцакIэхэзэ. Джырэ уахътэм мэкъумэщышIэхэми, къэралыгъо хабзэми ткIуачIэ зэтхьылIэрэр лэжьыгъэ Iухыжьыныр зыпкъ итэу ыкIи чIэнагъэ тымышIэу зэшIотхыныр ары. ТапэкIи мэкъу-мэщым пылъхэм тишIуагъэ ядгъэкIыщт, къэралыгъо программэхэм, «Единэ Россием» ипартийнэ проектхэм, лъэпкъ проектхэм къахиубытэрэ IэпыIэгъур алъыдгъэIэсыщт», — къыIуагъ КъумпIыл Мурат.Мы илъэсым республикэм бжыхьасэхэр зыщыIуахыжьыщтыр зэкIэмкIи гектар мини 112-рэ, непэрэ мафэм ехъулIэу аIожьыгъэр гектар мин 38,5-рэ фэдиз. Джэджэ районым щырапхъыгъэ гектар мин 35-м ехъум щыщэу щаIожьыгъахэр гектар мин 17 фэдиз.
АР-м и ЛIышъхьэипресс-къулыкъу