Мыекъуапэ щыщ спортсменэу НатIэкъо Мэдин Урысыем ихэшыпыкIыгъэ командэ хэтэу баскетболымкIэ Дунэе Федерацием зэхищэрэ зэнэкъокъоу «Лига нации» зыфиIорэм хэлэжьагъ. Зичэзыу едзыгъом дышъэ медаль къыщихьыгъ.
Зэнэкъокъур Китаим икъалэу Таньшань щыкIуагъ. Бысымхэм анэмыкIэу, Казахстан, Монголием, Катар, Урысыер ащ хэлэжьагъэх. Зыныбжь илъэс 21-м емыхъугъэ спортсменхэр арых мы зэнэкъокъум зыкъыщызыгъэлъэгъуагъэхэр.
Тикъэралыгъо икомандэ финалым нэсыныр фызэшIокIыгъ. Ащ Казахстан щыпэуцужьыгъ, 21:14-у текIоныгъэри къышIуихьыгъ. Дышъэ медальхэр тиспортсменхэм къызэрахьыгъэм нэмыкIэу, мы илъэсым иIоныгъо мазэ щыIэщт Дунэе Кубокым икъыдэхын фэбэнэнхэм ифитныгъэ къалэжьыгъ.БаскетболымкIэ Адыгеим икомандэу «Динамо-МКъТУ»-м НатIэкъо Мэдин хэт. Ащ итренерых — Артем Гапошиныр ыкIи Андрей Синельниковыр.