Врач ныбжьыкIэхэм IофшIэныр рагъэжьэщт

Апшъэрэ медицинэ еджэпIэ закъоу тишъолъыр итым зичэзыу чIэтIупщыгъо иIагъ. Мыекъопэ къэралыгъо технологическэ университетым и Медицинэ институт нэбгырэ 335-мэ апшъэрэ гъэсэныгъэ щызэрагъэгъотыгъ. Ахэм ащыщэу ныбжьыкIи 187-мэ IэзэнымкIэ факультетыр, 89-мэ — стоматологиер, 37-мэ — педиатриер ыкIи 22-мэ фармацевтическэр къаухыгъ.

Медицинэ IофышIэхэм ягъэ­хьазырынкIэ мурад гъэнэфэгъэ шIыкIэу «целевой» зыфаIорэм мэхьанэ иI. Мы илъэсым апшъэ­рэ еджапIэр къэзыухыгъэ нэбгырэ 65-р а шIыкIэмкIэ рагъэ­джагъ ыкIи ахэр республикэм имедицинэ учреждениехэм Iоф­шIэныр ащырагъэжьэным фэхьазырых.Мыекъопэ къэралыгъо технологическэ университетым ипресс-къулыкъу къызэритыгъэм­кIэ, еджакIохэм ухьазырыныгъэ дэгъу зэрарагъэгъотыгъэм ишы­хьат нэбгырэ 61-мэ диплом «плъыжь» къызэралэжьыгъэр. Медицинэ институтым Iоф зишIэрэ илъэс 22-м къыкIоцI врач ыкIи провизор мини 10-м ехъу къыгъэ­хьазырыгъ. Непэ ахэм щытхъу хэлъэу Адыгеим, Урысыем ишъолъырхэми Iоф ащашIэ. Мы илъэсым къыще­гъэ­жьагъэу апшъэрэ еджапIэм иаспирантурэ лъэныкъуакIэхэр хагъэхьагъэх: «Акушерствэмрэ гинекологиемрэ» ыкIи «Хирургиер».

Мыгъэ медицинэ институтым IэзэнымкIэ ифакультет «целевой» шIыкIэм тетэу къэзыухыгъэхэм ащыщ Даур Фатимэ. Ар дэгъу дэдэу еджагъ, тапэкIи гухэлъышIухэр врач ныбжьыкIэм зыдиIыгъых.Апшъэрэ еджапIэм ар джыри чIэмыхьэзэ, Мыекъопэ медици­нэ колледжым щеджагъ. Нэужым функциональнэ диагностикэмкIэ медсестрау наркологие диспансерым Iоф щишIэзэ, нахьыбэу цIыфхэм иIэпыIэгъу аригъэкIы зэрэшIоигъор зэхишIагъ, ар къыдэхъуным пае врач сэнэхьатыр къыхи­хыгъ ыкIи Медицинэ институтым чIэхьажьыгъ. Фатимэ щысэ зы­ты­рихынхэр иIэх, ятэ — стома­толог, янэ — медицинэ колле­джым кIэлэегъа­джэу Iут. Еджэгъухэм азыфагу къыдафэу сабый къыпыфэнэуи игъо ифагъ.

— Мы уахътэм аккре­дитациер сэкIу, ащ ыуж Iоф сшIэным сыфэхьазыр. ЗэрисхъухьагъэмкIэ, дежурствэхэр респуб­ликэ е къэлэ сымэджэщхэм ащысштэщтых, къыздэ­хъумэ, терапевтэу приемнэ отделением сыIухьанэу сыфай. Ащ нэмыкIэу поликлиникэм мафэ къэс Iоф щысшIэнэу сыкIощт. Ординатурэми сычIэхьажьыщт, ари сымэджэщитIум ащыщ щыскIущт, — хигъэунэфыкIыгъ Даур Фатимэ.

АР-м псауныгъэр къэу­хъумэгъэнымкIэ и Министерствэ къызэритыгъэмкIэ, мы уахътэм сэнэхьат гъэнэфагъэхэмкIэ врачэу зыщыкIэхэрэр: анестезиология-реаниматологиер — 14, кардиологиер — 14, Iэзэн Iофыр — 13, неврологиер — 13, неонатологиер — 3, педиатриер — 25-рэ. психиатриер — 12, психиат­рие-наркологиер — 4, ультразвуковой диагностикэр — 8 ыкIи функциональнэ диагностикэр — 3.

Врачхэм анахь ащыкIэхэрэр: Адыгэ республикэ сымэджэщыр — нэбгырэ 23-рэ, къэлэ сымэджэщыр — 22-рэ, республикэ кIэлэцIыкIу сымэджэщыр — 15, психоневрологие диспансерыр — 12, Мыекъопэ къэлэ кIэлэцIыкIу IэзапIэр — 20, Красногвардейскэ район гупчэ сымэджэщыр — 12 (анахьэу педиатрэхэр).

Шъолъыр министерствэм зэрэрихъу­хьэрэмкIэ, Мыекъопэ, Пшызэ, Ростов медицинэ университетхэр мыгъэ къэзыухыгъэхэр а чIыпIэхэм ыгъэкIощтых.

IЭШЪЫНЭ Сусан.