Лъэпшъыкъо Ф.
Мыекъуапэ ия 23-рэ кIэлэцIыкIу IыгъыпIэу «Березка» зыцIэм иигъэкIотыгъэ гъэцэкIэжьын ыкIэм фэкIо.
«Джырэ лъэхъаным диштэрэ амалхэр игъорыгъоу къалэхэм ыкIи къуаджэхэм адэт кIэлэцIыкIу IыгъыпIэхэм ятэгъэгъоты. УФ-м и Президентэу Владимир Путиныр кIэщакIо зыфэхъугъэ лъэпкъ проектэу «Унагъом» къыдилъытэрэ IофшIэнхэм зыкIэ ар ащыщ», — социальнэ нэкIубгъохэм къащитхыгъ АР-м и ЛIышъхьэу КъумпIыл Мурат.
КIэлэцIыкIу IыгъыпIэм ипащэу Таченко Екатеринэ IофшIэнхэр зэрэкIохэрэр къедгъэIотагъ.Псэуалъэм изэтегъэпсыхьанкIэ, унашъхьэм игъэкIэжьынкIэ IофшIэнхэр аухыгъэх, джы ащ къыпэIулъ чIыпIэм дэлажьэх. КIэлэцIыкIу IыгъыпIэр псэолъэ анахьыжъэу къалэм дэтхэм ащыщ, 1965-рэ илъэсым агъэпсыгъ. Ащ къыхэкIэу изытет дэй дэдагъ. Ау джы ар пшIэжьыщтэп. Чырбыщ дэпкъ закъохэр къагъанэхи, зэкIэ зэблахъугъагъ.
— Мыгъэ щылэ мазэм къыщегъэжьагъэу гъэцэкIэжьынышхохэр макIох. Лъэпкъ проектым къыдыхэлъытагъэу сомэ миллион 44-рэ фэдиз къыфатIупщыгъ. Мылъкоу къатIупщыгъэр зыпэIухьагъэр псэуалъэм ыкIоцIрэ ыкIыбрэ ягъэцэкIэжьын. Ащ къыхиубытагъэх зэкIэ инженер коммуникациехэр, пчъэ-шъхьаныгъупчъэхэр. Джы чэзыур зынэсыгъэр щагу IофшIэнхэр ары, — еIо пащэм.
Псэуалъэр зэрэщытэу зэрагъэцэкIэжьыгъэм дакIоу ыкIоцI итыщтхэри зэблахъунэу зэрежэхэрэр пащэм къыIотагъ.
— ШышъхьэIум иублэгъум ехъулIэу кIэлэцIыкIухэр зэрысыщтхэр ищыкIэгъэ псэуалъэхэмрэ оборудованиякIэрэкIэ зэтегъэпсыхьагъэ хъущтых. Iанэхэр, гъолъыпIэхэр, зытхьакIыпIэхэр, гъэтIылъыпIэхэр шIэхэу къытфащэщтых. ПщэрыхьапIэм ищыкIэгъэ хьакухэр, хьакъу- шыкъухэр джырэкIэ къытфащэгъахэх. Ахэм апэIухьэгъэ мылъкур къэралыгъо бюджетым къыхэкIыгъ, — еIо Екатеринэ.КIэлэцIыкIу IыгъыпIэр нэбгыри 150-мэ ателъытагъ. Сабыйхэр джырэкIэ нэмыкI IыгъыпIэхэм ахэгощагъэх. Ау шIэхэу агъэцэкIэжьыгъэ унэм къагъэзэжьыщт. «Березкэм» Iут кIэлэпIухэри ясабыйхэм афэзэщыгъэх.
КIэлэцIыкIу IыгъыпIэм къыпэIулъ чIыпIэм изэтегъэпсыхьанкIэ IофшIэнхэр етIупщыгъэу макIох. ДжэгупIэ чIыпIэхэм, жьаупIэхэм яшIын дэлажьэх, джащ фэдэу къыпэIулъ чIыпIэр агъэчъыщт. IофшIэнхэр Iоныгъо мазэм ехъулIэу аухынхэшъ, яIофшIэн паублэжьыщт.
Лъэпшъыкъо Фатим.