А. Гусев
Адыгэ Республикэм и ЛIышъхьэу КъумпIыл Мурат бжыхьэ-кIымэфэ лъэхъаным ехъулIэу унэ-коммунальнэ хъызмэтым къыхиубытэрэ псэуалъэхэр хьазырынхэм иIофыгъохэмкIэ зэIукIэ зэхищэгъагъ. Ащ хэлэжьагъэх АР-м иминистрэхэм я Кабинет и Тхьаматэу КIэрэщэ Анзаур, министрэхэм я Кабинет хэтхэр, уплъэкIокIо-лъыплъэкIо къулыкъухэм, къэкIуапIэхэр кIэзыугъоерэ организациехэм, унэ-коммунальнэ хъызмэтым ипредприятиехэм яIэшъхьэтетхэр, муниципальнэ образованиехэм япащэхэр.
АР-м псэолъэшIынымкIэ, транспортымкIэ, унэ-коммунальнэ ыкIи гъогу хъызмэтымкIэ иминистрэу Валерий Картамышевым къызэриIуагъэмкIэ, гъэфэбэн лъэхъаным ехъулIэу котельнэ 260-рэ, фэбэрыкIопIэ километрэ 288 -рэ, гупчэ пункт 25-рэ, гъэстыныпхъэ шхъуантIэм ирыкIопIэ километрэ 4500-м ехъу, псыубытыпIэ 276-рэ, псым ыкIи шIоипсым ярыкIопIэ километрэ 2700-рэ гъэхьазырыгъэн фае. Ащ нэмыкIэу, чэщ- зымэфэ 45-м телъытэгъэ гъэстыныпхъэ пытэ IэпэчIэгъанэу псэуалъэхэм якъэгъэфэбэн иублэгъум ящыкIэгъэщтыр зэIуагъакIэ. Урысыем и Минэнерго иунашъоу аухэсыгъэм къыдилъытэрэ пшъэрылъыкIэхэм къапкъырыкIхэзэ, унэхэм ягъэфэбэнэу къытпыщылъым зыфагъэхьазыры. Ащ пае муниципалитетхэм зэрахьан фэе Iофтхьабзэхэр афагъэнэфагъэх.
Валерий Картамышевым къызэрэхигъэщыгъэмкIэ, республикэм имуниципальнэ образование пстэуми 2026 — 2027-рэ илъэсхэм псэуалъэхэм ягъэфэбэнкIэ унэ-коммунальнэ хъызмэтымрэ социальнэ лъэныкъомрэ къахиубытэрэ псэуалъэхэм яухьазырын епхыгъэ IофшIэнхэр чанэу ащырагъэжьагъэх. Мы илъэсым мэкъуогъум и 1-м къыщегъэжьагъэу Iоныгъом и 18-м нэс лъыплъэкIо къулыкъухэр ягъусэхэу Iофтхьабзэу зэдызэшIуахыщтхэм яграфик зэхагъэуцуагъ. Ащ фэдэ апэрэ уплъэкIунхэр Тэхъутэмыкъое ыкIи Кощхьэблэ районхэм ащагъэцэкIагъэх.
Муниципальнэ образованиехэм япащэхэм ыкIи фабэм икъэтын фэгъэзэгъэ организациехэм яIэшъхьэтетхэм пшъэрылъ афашIыгъ щыкIагъэу къыхагъэщыгъэхэр пIэлъэ кIэкIым дагъэзыжьынхэу. КъумпIыл Мурат АР-м псэолъэшIынымкIэ и Министерствэ пшъэрылъ фишIыгъ Ростехнадзорым игъоу къафилъэгъугъэр зэкIэ гъэцэкIагъэ зэрэхъурэр пхъашэу ыуплъэкIунэу ыкIи муниципалитетхэр кIымафэм дэгъоу фэхьазырхэу екIолIэнхэм ынаIэ тыригъэтынэу. КъумпIыл Мурат къызэрэхигъэщыгъэмкIэ, чъэпыогъум и 1-м ехъулIэу IофшIэнхэр зэкIэ аухынхэшъ, шэкIогъум и 15-м ехъулIэу муниципальнэ образование пстэури гъэфэбэн лъэхъанэу къапыщылъым зэрэфэхьазырхэр къэзыушыхьатырэ паспортхэр къаIахынхэ фае.
ХэушъхьафыкIыгъэ пшъэрылъхэр апашъхьэ итых псэупIэ-коммунальнэ хъызмэтым ипредприятиехэм, бюджет организациехэм ыкIи цIыфхэм энергием икъэкIуапIэу агъэфедагъэмкIэ чIыфэу ателъыр тыжьыгъэнымкIэ. ЗэIукIэм илъэхъан муниципальнэ образованиехэм япащэхэм къаIотагъ а лъэныкъомкIэ Iофтхьабзэу зэшIуахыхэрэм афэгъэхьыгъэу. Предприятие заулэмэ яIэшъхьэтетхэм къаIуагъ чIыфэхэм ятыжьынкIэ планыр зэрэкIорэм фэгъэхьыгъэу. Мы Iофыгъом тегущыIэхэ зэхъум, муниципалитетхэм пшъэрылъ афашIыгъ коммунальнэ фэIо-фашIэхэмкIэ чIыфэу ателъыр тыжьыгъэнымкIэ нахь чаныгъэ къызхагъэфэнэу. Хэбзэнчъэу энергием икъэкIуапIэхэр зыгъэфедэхэрэр зэрищыкIагъэм диштэу гъэпщынэгъэнхэ зэрэфаери къыхагъэщыгъ. ШIуагъэ къэзымытырэ Iэмэ-псымэхэр гъэкIэжьыгъэнхэмкIэ лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу гъэкIэжьын Iофтхьабзэхэм атегущыIагъэх.
Джыри анахь мэхьанэ зиIэ Iофыгъохэм ащыщым — коммунальнэ хъызмэтым ипсэуалъэхэр энергием икъэкIопIэ тедзэхэмкIэ зэтегъэпсыхьэгъэнхэм епхыгъэ пшъэрылъхэу Адыгэ Республикэм и ЛIышъхьэ къафишIыгъэхэр гъэцэкIагъэ зэрэхъухэрэм къыщыуцугъэх. Унэ-коммунальнэ хъызмэтым къыхиубытэрэ псэолъи 100-м ехъумэ ащ фэдэхэр ахагъэуцуагъэх. Муниципальнэ образованиехэм япащэхэм ащ пшъэрылъ афишIыгъ зэпыу имыIэу ыкIи цыхьэшIэгъоу унэ-коммунальнэ хъызмэтым ипсэуалъэхэм Iоф ашIэнымкIэ ищыкIэгъэ Iофтхьабзэхэр икъоу зэрахьанхэу.
Адыгеим и ЛIышъхьэ къыхигъэщыгъ псэуалъэхэр зэкIэ игъом шэпхъэ гъэнэфагъэхэм адиштэхэу шIыгъэнхэ зэрэфаер. КъумпIыл Мурат къызэриIуагъэмкIэ, чIыпIэхэм япащэхэм лъэшэу анаIэ атырагъэтын фае фабэр, псыр, гъэстыныпхъэ шхъуантIэр къэзытырэ предприятиехэр ренэу хьазырынхэм.
«КIымэфэ гъэфэбэн чэзыум изыфэгъэхьазырынкIэ муниципалитет пэпчъ икъоу зэкIэ къызщыдэлъытэгъэ гъогу картэ иIэн фае. Дэх имыIэу зэкIэми ар агъэцэкIэныр япшъэрылъ. Гъэмэфэ чэзыур амал зэриIэкIэ нахь дэгъоу къызфэжъугъэфед щыкIагъэхэр дэгъэзыжьыгъэнхэм, чIыфэхэр тыжьыгъэнхэм япхыгъэ Iофтхьабзэхэр икъоу зэшIохыгъэ хъунхэмкIэ. Унэ-коммунальнэ хъызмэтым къыхиубытэрэ псэуалъэхэр зэкIэ игъом ыкIи икъоу хьазырынхэ фае. Зыпкъ итэу, зэпыу фэмыхъоу кIымэфэ лъэхъаныр зэрищыкIагъэм лъыкIахьэу рахыным пае ищыкIагъэр зэкIэ зэшIохыгъэ зэрэхъущтым цIыфхэм яцыхьэ телъын фае», — къыIуагъ КъумпIыл Мурат.
АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет