Теннис цIыкIумкIэ къэралыгъом ифедерацие ыгъэнэфэгъэ программэу «Урысыем инеущ» зыфиIорэм къыдыхэлъытагъэу Адыгэ Республикэм изэIухыгъэ зэнэкъокъу Мыекъуапэ щаублагъ. Шъолъыри 6-мэ къарыкIыгъэ спортсменхэр ащ хэлажьэх.
КIалэхэу ыкIи пшъэшъэжъыехэу зыныбжь илъэс 12-м шIомыкIыгъэхэм апэрэ зэнэкъокъу мафэм заушэтыгъ. КIалэхэм якуп нэбгырэ 33-рэ хэтыгъ. Ахэм ащыщэу 7-мэ республикэр къагъэлъэгъуагъ. Апэрэ чIыпIэр зыубытыгъэр Адыгеим илIыкIу. ПсэупIэу Вольнэм щыщ Дмитрий Устянскэр финалым нэсыгъ, ащи Краснодар краим къикIыгъэ Мирон Никсаевым щытекIуи, апэрэ чIыпIэр къыдихыгъ. Ящэнэрэ хъугъэ ЦIэмэз къэзыгъэлъэгъогъэ Георгий Самковыр.
Пшъэшъэжъые нэбгырэ 18-мэ заушэтыгъ. Ахэм анахь лъэшэу 6-мэ зэнэкъокъур лъагъэкIотагъ. Спортсменки 3-мэ зэфэдэ пчъагъэхэр рагъэкъугъэх, ау зэIукIэгъу пэпчъ зэрешIагъэхэр къыдыхалъытэжьи, Ростов хэкум къикIыгъэ Ольга Наумовам осэшIмэ текIоныгъэр фагъэшъошагъ. ЯтIонэрэ чIыпIэр ыхьыгъ Тимашевскэ щыщ Елизавета Фатень, джэрз медалыр къыхьыгъ Кощхьэблэ районым ипсэупIэу Вольнэм къикIыгъэ Пелагея Калининам.
Зыныбжь илъэс 14-м, 18-м анэмысыгъэ спортсменхэм язэпэуцужьхэр, тIурытIоу зэгъусэ джэгунхэр зэнэкъокъум къыдыхэлъытагъэх. Теннис цIыкIур зикIасэхэм ахэм яплъын амал яIэщт. Кобл Якъубэ ыцIэ зыхьырэ спорт Ордэунэм зэнэкъокъур щэкIо.