Адыгэ республикэ спорт еджапIэу N 2-м зыщызыгъэсэрэ Бырдж Хьадиджэ кIэлэеджакIохэм я Урысые спартакиадэ икIэух ушэтынхэм анэсыгъ, текIоныгъи къыщихьыгъ.
Дышъэм зэрэфэкIогъэ гъогур псынкIагъэп. Адыгеир къыгъэлъэгъоным пае республикэ зэнэкъокъухэм ыпэрапшIэу апхырыкIыгъ. Нэужым Къыблэ федеральнэ шъолъыр ушэтыныр къыкIэлъыкIуагъ. Ащи дэгъоу зыкъыщигъэлъагъуи, финалым Хьадиджэ нэсыгъ. Ар къалэу Саранскэ щыкIуагъ. Зэрэхабзэу, кIэух Урысые зэнэкъокъум спортсмен анахь лъэшхэр къеугъои. Ащ емылъытыгъэу, республикэм икIыгъэ пшъэшъэжъыем сэнаущыгъэ дэгъу зэрэIэкIэлъыр къыгъэлъэгъуагъ. ЗэIукIэгъуищэу иIагъэр къыхьыгъ. Зыпэуцужьыгъэхэм къытекIонхэ амал Хадиджэ аритыгъэп, Урысые дышъэ медалыр тиспортсменкэ къыхьыгъ. Пшъашъэр агъасэ тренерхэу Олег Тыщенкэмрэ Александр Охрименкэмрэ.