АР-м хэдзынхэмкIэ и Гупчэ комиссие тыгъуасэ зичэзыу я LXXVIII-рэ зэхэсыгъо иIагъ. Ар зэрищагъ ащ итхьаматэу Сэмэгу Нурбый.
УФ-м и Къэралыгъо Думэ иябгъонэрэ ыкIи АР-м и Къэралыгъо Совет – Хасэм ияенэрэ зэIугъэкIэгъухэм ядепутатхэм яхэдзынхэу 2026-рэ илъэсым иIоныгъо мазэ и 20-м щыIэщтхэм языфэгъэхьазырын ар фэгъэхьыгъагъ. Пстэумэ апэу АР-м хэдзынхэмкIэ и Гупчэ комиссие хэтэу Мэкъулэ Назыр мыщ пшъэрылъэу щыриIэхэр къызэтегъэуцогъэнхэм тегущыIэхи, дырагъэштагъ.УФ-м и Къэралыгъо Думэ идепутат хъунымкIэ партиеу «Единэ Россием» кандидатурэу къыгъэлъэгъуагъэхэм ащыщ АР-м и ЛIышъхьэу КъумпIыл Мурат. Мэкъулэ Назыр АР-м щэфэным ылъэныкъокIэ зэзэгъыныгъэхэм ягъэIорышIэнкIэ и Комитет ипащ, ЛIышъхьэм епхыгъэу мэхъу. Хэбзэгъэуцугъэм къызэрэщыдэлъытагъэмкIэ, ар комиссием хэтэу мы хэдзынхэм ахэлэжьэн фитэп. Ащ фэшI 2026-рэ илъэсым иIоныгъо и 20-м щыIэщт хэдзынхэр текIыфэхэкIэ ипшъэрылъхэр къызэтырагъэуцох.
АР-м и Къэралыгъо Совет — Хасэм идепутатхэм яхэдзынхэу мыгъэ щыIэщтхэм Политическэ партиякIэу «НОВЫЕ ЛЮДИ» зыфиIорэр ахэлэжьэщт. Ащ зыкI ыкIи зы мандат хъурэ хэдзыпIэ округхэмкIэ кандидатурэу къыгъэлъэгъуагъэхэм яспискэ мы зэхэсыгъом щаштагъ, финанс IофхэмкIэ ащ илIыкIощтыр щатхыгъ.
АР-м хэдзынхэмкIэ и Гупчэ комиссие и Аппарат ипащэу Сихъу Азамат бюллетень пчъагъэу агъэхьазырыщтым, зэрагощыщтхэм къатегущыIагъ. Ащ къызэриIуагъэмкIэ, УФ-м и Къэралыгъо Думэ иябгъонэрэ зэIугъэкIэгъу идепутатхэм яхэдзынхэм апае бюллетень 340500-рэ, АР-м и Къэралыгъо Совет — Хасэм ияенэрэ зэIугъэкIэгъу идепутатхэм яхэдзынхэм апае 340305-рэ пстэумкIи агъэхьазырыщт.
Джащ фэдэу Адыгэкъалэ хэдзынхэмкIэ ичIыпIэ комиссие АР-м и Къэралыгъо Совет – Хасэм ияенэрэ зэIугъэкIэгъу идепутатхэм яхэдзынхэм языфэгъэхьазырын ыкIи язэхэщэн апае республикэ бюджетым къыхэхыгъэу ахъщэ тедзэ фэтIупщыгъэным комиссием хэтхэр тегущыIэхи, дырагъэштагъ.
ХЪУТ Нэфсэт.