АР-м и ЛIышъхьэ ипресс-къулыкъу
Унэгъо пытэхэм яфестивальхэу Москва щыкIуагъэхэм Адыгеим икIыгъэ унэгъуитIумэ дахэу закъыщагъэлъэгъуагъ.
КIэлабэ зиIэу Дорошенкэхэм яунагъо Урысые зэнэкъокъоу «Это у нас семейное» зыфиIорэм (президент платформэу «Урысыер – амалыкIэхэм якъэралыгъу» зыфиIорэм хэхьэ) икIэух едзыгъо пхырыкIыгъ. Къэралыгъом ишъолъыр зэфэшъхьафхэм къарыкIыгъэ унэгъо 330-рэ зэнэкъокъум хэлэжьагъ.
— Дорошенкэхэм яунагъо апэ пэIудзыгъэ шIыкIэм тетэу рагъэкIокIыгъэ зэнэкъокъум, нэужым шъолъыр едзыгъом апхырыкIыгъ. IэпыIэгъу тафэхъуи кIэух едзыгъом хэлэжьэнхэу Москва кIуагъэх. Гъэхъагъэу ашIыгъэхэм тарэгушхо. ЗэкIэмэ анахь шъхьаIэр Мыекъуапэ дэсхэу Елена ыкIи Петр Дорошенкэхэм, ахэм якIэлэцIыкIухэу Павел, Илья, Иван ыкIи Надеждэ, ахэм янэжъэу Наталья пстэуми щысэтехыпIэ афэхъугъэх. ЗыкIыныгъэр, зэгурыIожьыныгъэр ыкIи шIулъэгъу зэфыуиIэныр ары текIоныгъэ шъхьаIэу хъурэр, — къыхигъэщыгъ АР-м и ЛIышъхьэу КъумпIыл Мурат.Хьаохэм яунэгъо ныбжьыкIэ а шапхъэхэм къафэкIо. Я III-рэ Урысые нысэщэ фестивалэу «Россия. Соединяя сердца» зыфиIорэм ахэр хэлэжьагъэх.
КъэзэрэщэгъэкIэ зэшъхьэгъусэхэм апае Лъэпкъ гупчэу «Урысыер» зыфиIорэм бэдзэогъум и 8-м ыкIи и 9-м Iофтхьэбзэ дахэ щызэхащэгъагъ. Тикъэралыгъо ишъолъыр зэфэшъхьафхэм къарыкIыгъэ ныбжьыкIэхэм дахэу къахэщыгъэх Адыгеим ыцIэкIэ ащ хэлэжьагъэхэу Хьао Ренатрэ Мыгу Миланэрэ. Фестивалым хэлэжьэгъэ зэшъхьэгъуси 150-м ар янасыпыгъэу зэрэхъугъэм имызакъоу, шIулъэгъум гъунапкъэ зыщимыIэ къэралыгъошхом изыкIыныгъэ ахэр шыхьат фэхъугъэх.
— Дорошенкэхэм ыкIи Хьаохэм яунагъохэм сафэгушIо ащ фэдэ хъугъэ-шIэгъэ дахэхэм зэрахэлэжьагъэхэм, гъэхъагъэхэр ахэм зэращашIыгъэхэм апае! Унэгъо шъыпкъэр зыфэдэн фаем ахэр ищысэтехыпIэх. Ащ фэдэ унэгъуабэ зэрэтиIэм мэхьанэ иI. Ахэр — лъэпсэ пытэ тфэхъух, унагъор нэбгыритIум янасып къодыеу щымытэу, республикэм хахъо зэрэфашIырэм ищысэтехыпIэх. Унэгъо ныбжьыкIэхэм, сабый зиIэхэм IэпыIэгъоу ядгъэкIырэр лъыдгъэкIотэщт. Лъэпкъ проектэу «Унагъор» зыфиIорэм ыкIи партиеу «Единэ Россием» ипроектхэм амал хэушъхьафыкIыгъэхэр къытатых, — хигъэунэфыкIыгъ АР-м и ЛIышъхьэ.