Гусев А.
Адыгеим и ЛIышъхьэу КъумпIыл Мурат республикэм ичъыгхэтэ хъызмэтшIэпIитIоу мыIэрысэ, къэц маркIо ыкIи голубикэ къызщагъэкIыхэрэм ащыIагъ. Ахэр Мыекъопэ районым ит къоджэ псэупIэу Трехречнэм иIэгъо-блэгъу итых.
IофшIэгъу дэкIыгъом хэлэжьагъ АР-м мэкъу-мэщымкIэ иминистрэу Къонэ Анзаур. Инвестиционнэ проектыр къэралыгъо IэпыIэгъу къырагъэкIызэ зэшIозыхыхэрэр компаниехэу «Инвест-Лайф» ыкIи «Рубин» зыфиIохэрэр арых Андрей Герман япащэу, ар джащ фэдэу фышъхьэ лэжьыгъэхэм якъэгъэкIын республикэм щыдэлажьэ.
ЧIыгулэжь хъызмэтшIэпIакIэр Адыгеим и ЛIышъхьэ къыплъыхьагъ, ащ ипащэ дэгущыIагъ. Iофэу зэшIуахыгъэм икIэуххэм, проектым хэхъоныгъэу ышIыщтым ыкIи къэралыгъо IэпыIэгъоу ыгъотыщтым атегущыIагъэх. Инвесторым къызэриIуагъэмкIэ, компаниеу «Рубиным» мыIэрысэ чъыгхэтэ гектар 52-рэ ыгъэтIысхьагъ, бжыхьэм джыри гектар 32-рэ ащ хигъэхъощт. 2029-рэ илъэсым ехъулIэу псынкIэу къэкIырэ чъыгхатэм чIыналъэу гектари 112-рэ ыубытыщт. ХъызмэтшIапIэу «Инвест-Лайфми» мыIэрысэ чъыгхэтэ цIыкIу иI гектари 5 фэдиз ыубытэу. Ащ нэмыкIэу ащ къэц маркIо гектари 4-рэ голубикэ гектари 5,2-рэ щагъэтIысхьэгъах.
Андрей Герман КъумпIыл Мурат рэзэныгъэ гущыIэхэр фигъэзагъэх ынаIэ къызэратетым ыкIи мэкъумэщ-къыдэгъэкIыжьыным иIоф къыщызэIуихынымкIэ амалэу къыратыгъэхэм апае. 2024 — 2026-рэ илъэсхэм хъызмэтшIэпIитIум зэшIуахырэ Iофыгъо пстэумкIи къэралыгъо IэпыIэгъоу сомэ миллион 93-рэ фэдиз къаратыгъ.
«Тэ типшъэрылъ IофышIухэм кIэщакIо афэхъурэ предпринимательхэу мэкъу-мэщым хэхъоныгъэ ышIыным, технологие пэрытхэр пхыращынхэм ыкIи лъэныкъуакIэхэр къызIэкIагъэхьанхэм апылъхэм тадэIэпыIэныр. Джащ фэдэ проектхэр ары шъолъырым игъомылэпхъэ щынэгъончъагъэ зыгъэпытэхэрэр, чIыпIэм къыщыдагъэкIыхэрэм язэмылIэужыгъуагъэ хэзыгъахъохэрэр ыкIи экономикэм амалыкIэхэр фызэIузыхыхэрэр», — къыIуагъ КъумпIыл Мурат.
Чъыгхатэхэмрэ маркIохэмрэ якъэгъэкIын хэхъоныгъэ ышIыным мэхьанэу иIэм ЛIышъхьэм къыкIигъэтхъыгъ шъолъырым имэкъу-мэщ изэхэлъыкIэ ащ зэрэзэрихъокIыгъэр къыхигъэщызэ. Ащ ишIуагъэкIэ Адыгеим пхъэшъхьэ-мышъхьэ-мэркIо лъэпкъхэм аубытыхэрэм гектар 7300-м нэсэу щыхэхъуагъ, ащ щыщэу гектар 2400-м псынкIэу зигъо хъурэ чъыгхатэхэр атетых, 2000-м —мэркIо лъэпкъхэр къащэкIых. Аужырэхэм апылъ хъызмэтшIапIэхэм тапэкIи хэхъоныгъэ ашIыным пае 2025-рэ илъэсым къыщыублагъэу IэпыIэгъукIэ арагъэгъоты.
КъумпIыл Мурат къыхигъэщыгъ лъэхъаным диштэрэ, шIыкIакIэхэр зыщагъэфедэрэ хъызмэтшIапIэхэу IофшIэпIэ чIыпIакIэхэр къэзытыхэу чIыпIэм щыпсэухэрэм гъомылэпхъэ къабзэ языгъэгъотыхэрэр зэрэтищыкIагъэхэр. Ащ пае республикэм икъэралыгъо хабзэ Урысыем и Правительствэ IэпыIэгъу къыфэхъузэ мэкъумэщ-къыдэгъэкIыжьын хъызмэтым къэралыгъо IэпыIэгъоу фитIупщырэм хегъахъо. ЗэкIэмкIи 2025-рэ илъэсым сомэ миллион 848,5-рэ ащ пэIуагъэхьагъ 425-мэ афакIоу.
«ТапэкIи IэпыIэгъу тафэхъущт хэхъоныгъэ зышIыщт инвестиционнэ проектхэм. Лъэхъаным диштэрэ, шIуагъэ къэзытырэ хъызмэтшIапIэхэу Адыгеим имэкъумэщ-къыдэгъэкIыжьын комплекс ыпэкIэ лъызыгъэкIотэщтхэр ыкIи тиреспубликэ лъэкIэу иIэм хэзыгъэхъощтхэр тищыкIагъэх», — къыIуагъ КъумпIыл Мурат.
АР-м и ЛIышъхьэ ипресс-къулыкъу