Лъэс кIонымкIэ фестиваль-зэнэкъокъоу «Ромашковый марафон» зыфиIорэр Адыгеим тыгъуасэ щырагъэжьагъ. Унагъом, шIулъэгъум ыкIи зэфэшъыпкъэныгъэм я Мафэу хагъэунэфыкIыгъэм ар фагъэхьыгъ.
Физическэ культурэмкIэ ыкIи спортымкIэ Мыекъуапэ и Комитет ащ кIэщакIо фэхъугъ.«Къэгъагъэу ромашкэр ау сыдми къыхэтхыгъэп. Зыфэдгъэхьыгъэ мэфэкIым ар итамыгъ. Къэбзэныгъэу, шъыпкъэныгъэу, фэбэныгъэу унагъохэм арылъыр къеушыхьаты. Ягупсэхэм ягъусэхэу, япсауныгъи шIуагъэ къыфахьызэ хэлажьэхэрэм зыкъягъэгъэлъэгъогъэныр типшъэрылъ», — къыхигъэщыгъ Комитетым итхьаматэу Дмитрий Щербаневым.
Фестивалым хэлэжьэн шIоигъоныгъэ зэряIэр нэбгырэ 85-мэ къаIуагъ. Ахэр Мыекъуапэ изакъоп, районхэми ащыщых. Зызыушэтыхэрэри зэфэшъхьафых, сабыйхэри, студентхэри, зыныбжь хэкIотагъэхэри ахэтых. Лъэбэкъоу ашIырэр зыфэдизыр зэралъытэщт мобильнэ нэкIубгъор хэлажьэхэрэми осэшIхэми къызфагъэфедэ. Лъэбэкъу мини 140-рэ зышIыхэрэм зэкIэми текIоныгъэ къыдахыщт. Мэфибл пIалъэ ащкIэ яIэщт. Марафоныр бэдзэогъум и 19-м аухыщт.