Атлетикэ псынкIэмкIэ зэнэкъокъоу «Суворов Трейл» зыцIэр Лэбапэ щыкIуагъ. Мыгъэ ар яплIэнэрэу зэхащагъ. Мызыгъэгум нэбгырэ 1500-м ехъу ащ къыугъоигъ, блэкIыгъэ илъэсым егъэпшагъэмэ, 200-кIэ нахьыб.
Зэнэкъокъум хэлажьэ зышIоигъохэр къыздикIыгъэ чIыпIэхэми ахэхъуагъ. УФ-м ишъолъыр 30-мэ ахэр ялIыкIох. Анахьыжъым ыныбжь илъэс 76-м нэсы. «Суворов Трейлыр» зызэхащэрэм къыщыублагъэу ащ зыщызыушэтэу нэбгырэ 43-рэ ахэт. Ахэм ащыщ Мыекъопэ районым ит псэупIэу Хьаджыкъо икIыгъэ Николай Артемьевыр. Хъулъфыгъэм илъэс 51-рэ ыныбжь. ПсынкIэ зекIонымкIэ ыкIи къэчъэнымкIэ ащ зеушэты зэпыт. Мызыгъэгум ятIонэрэмкIэ зыкъыгъэлъэгъуагъ, километри 10 зикIыгъэхьэ гъогууанэр къычъыгъ. Зы сыхьатрэ такъикъ 34-рэ нэгъэупIэпIэгъу 57-кIэ Николай Артемьевыр къэчъагъ, апэрэ чIыпIэр ащ къыфихьыгъ. ЯтIонэрэ хъугъэ Краснодар илIыкIоу Андрей Филоненкэр. Тыжьын медальыр мы къэлэ дэдэм къикIыгъэ Дмитрий Юдиным ыхьыгъ.