Росатом
Воронеж икъэралыгъо университет истудентмэ «Росатомым» иэлектростанциеу жьыкIэ Iоф зышIэу Адыгеим итыр зэрагъэлъэгъугъ. Экскурсием хэлажьэрэмэ зыщагъэгъозагъ «Росатомым» иапэрэ ветропарк иIофшIакIэ.
Мы университетым географиемкIэ, геоэкологиемкIэ ыкIи зекIонымкIэ ифакультет ия 3-рэ курс щеджэрэ студентмэ практикэмкIэ япащэ ягъусэу электростанциер зэпакIухьагъ. Комплекснэ экономикэ-географическэ гъэмэфэ практикэм къыдыхэлъытагъэу студентмэ апае Адыгэ Республикэм экскурсиер щызэхащагъ.
ЖьыкIэ Iоф зышIэрэ электростанциер апэрэ ветропаркэу «Росатомым» ытIупщыгъ. Ар Шэуджэн ыкIи Джэджэ районхэм арыт. Энергие къэзытырэ псэуалъэмэ язытет, зэрагъэуцугъэ шIыкIэхэм, станциер зэратIупщыгъэм, нэмыкIыбэхэм студентхэр ащагъэгъозагъэх. Ахэм къафаIотагъ мы станцием МВт 150-рэ къызэритырэр, шъолъырым щагъэкIодырэ электроэнергием ипроцент 20 ар зэрэхъурэр, мазэ къэс унэ мини 100-м ехъумэ электроэнергиер зэраIэкIигъахьэрэр. Джащ фэдэу экскурсием хэлэжьагъэмэ гъэIорышIэпIэ чIыпIэр зэрагъэлажьэрэр арагъэлъэгъугъ.
Геоэколог сэнэхьатыр къыхэзыхыгъэмэ чIыгур мыщ зэрэщагъэпсэуалъэрэр ашIогъэшIэгъоныгъ. Зэрэпсаоу Iоф ышIэ хъумэ, ветропаркым гектар 60 еубыты, ау ежь псэуалъэмэ афыхахыгъэ чIыгур зы гектар ныIэп зэрэхъурэр. Адрэ процент 99-р мэкъумэщ IофхэмкIэ агъэфедэн алъэкIы.
Студентхэм технологическэ процессхэм Iоф зэрашIэрэм зыщагъэгъозэгъэ къодыеп. Ахэм зыфэдэ къэмыхъугъэ ландшафтым осэшхо къыфашIыгъ, ветропаркыр ащ дахэу зэрэхэуцорэр къыхагъэщыгъ.
«Сэ экономик-географ сэнэхьатым сыфеджэшъ, «Росатомым» иветропарк сызэрэщыIагъэм мэхьанэшхо есэты, сынитIукIэ слъэгъугъэ джырэ уахътэм агъэфедэрэ энергетическэ шIыкIэхэмрэ шъолъырым ичIыопс ыкIи ихъызмэт псэуалъэхэмрэ зэрэзэдиштэхэрэр. Ветропаркым иинагъэ къодыеп узгъэгушхорэр, чIыгу Iофхэм зэрафэсакъыгъэхэри ары. Зэрэшъолъыр пIоми хъунэу мэкъу-мэщым егъэфедэ», — игупшысэхэмкIэ къыддэгощагъ Воронеж икъэралыгъо университет социальнэ-экономикэ географиемкIэ ыкIи шъолъыр зещэнымкIэ икафедрэ идоцентэу Игорь Комовыр.