АР-м хэдзынхэмкIэ и Гупчэ комиссие тыгъуасэ зичэзыу я LXXVII-рэ зэхэсыгъо иIагъ. Ар ащ итхьаматэу Сэмэгу Нурбый зэрищагъ.
УФ-м и Къэралыгъо Думэ иябгъонэрэ ыкIи АР-м и Къэралыгъо Совет — Хасэм ияенэрэ зэIугъэкIэгъухэм ядепутатхэм яхэдзынхэу 2026-рэ илъэсым иIоныгъо мазэ и 20-м щыIэщтхэм языфэгъэхьазырын ар фэгъэхьыгъагъ. Адыгеим и Парламент идепутатхэм яхэдзынхэм апае бюллетенеу агъэхьазырыщтхэр зэрэгъэпсыгъэщтхэм, пIалъэу апылъым, хэдзыпIэ участкэхэм ахэр зэраратыжьыщтхэм, а IофшIэнхэм алъыплъэгъэным изэхэщэн апэ тегущыIагъэх.
АР-м хэдзынхэмкIэ и Гупчэ комиссие исекретарэу ХьацIэцIэ Фатимэ къызэриIуагъэмкIэ, хэдзынхэм афэгъэхьыгъэ хэбзэгъэуцугъэм къызэрэщыдэлъытагъэм тетэу Iоныгъом и 4-м шIомыкIэу бюллетеньхэм яшIын типографиеу ахэм адэлэжьэщтым ыухын фае. Бюллетеньхэр зэрэгъэпсыгъэщтхэм зэхъокIыныгъэхэр фэхъущтых. Ахэм якъэухъумэн пае хэушъхьафыкIыгъэ маркэу нахьыпэкIэ ягъусэщтыгъэхэр щыIэжьыщтхэп, джы бюллетень пэпчъ ынэIу зэрэщытэу «Адыгэ Республикэм и Къэралыгъо Совет — Хасэм идепутатхэм яхэдзынхэр» зыфиIорэ гущыIэухыгъэр шрифт гъэнэфагъэкIэ хэутыгъэщт. А зэпстэумэ анэмыкIэу, кандидатым ыцIэ, ылъэкъуацIэ, ятэ ыцIэ имызакъоу, зыгорэкIэ ащ иIоф хьыкумыр хэплъагъэу е «иноагент» зыфаIохэрэм апыщэгъагъэу щытымэ, ар пытхэгъэщт.
УФ-м хэдзынхэр щызэхэщэгъэнхэм епхыгъэ Къэралыгъо автоматизированнэ системэу «Хэдзынхэр» зыфиIорэм шъолъырхэм яIахьэу хэлъыр Адыгеим щыгъэцэкIагъэ зэрэхъущтым, ащ ирегламент нэужым тегущыIагъэх, ащ лъыплъэщт купым хэтыщтхэр агъэнэфагъэх. АР-м хэдзынхэмкIэ и Гупчэ комиссие ымакъэ ытынэу фитыныгъэ зиIэу хэтхэм ащыщэу нэбгырищ купым хагъэхьагъ.
Джащ фэдэу зэхэсыгъом къызэрэщаIуагъэмкIэ, 2026-рэ илъэсым иIоныгъо и 20-м щыIэщт хэдзынхэм языфэгъэхьазырын къыщыдэлъытагъэу цIыфхэр аштэщтых. Ахэм унагъо пэпчъ къакIухьэзэ хэдзынхэу щыIэщтхэр зыфэдэхэр, хэдзыпIэ участкэу зэпхыгъэхэр, ахэм Iоф зэрашIэщтыр, нэмыкI къэбарэу пылъхэр хэдзакIохэм агу къагъэкIыжьыщтых, хэдзынхэм ахэлэжьэнхэу рагъэблэгъэщтых. АдыгеимкIэ мы Iофым нэбгырэ 908-рэ пстэумкIи хагъэлэжьэщт. Ахэм апае футболкэхэр, Iалъмэкъхэр, къэлэмхэр, нэмыкIэу яIофшIэнкIэ ящыкIэгъэщтхэр къащэфыщтых, хэдзынхэм япхыгъэу баннер 37-рэ ыкIи мэкъэтынхэм апае секциитIоу зэхэт кабинэхэр агъэуцущтых. Ахэм апэIухьащт ахъщэм ызыныкъор федеральнэ, адрэ ныкъор республикэ бюджетхэм къахэхыгъэщт.
ХЪУТ Нэфсэт.