А. Гусев
НепэкIэ чIыгулэжьхэм анахь ушэтыпIэ шъхьаIэу яIэр лэжьыгъэм иIухыжьын ары. ЧIыгу гектар мини 112-мэ бжыхьасэхэр ащыIуахыжьынхэу къапыщылъ.
Хабзэ зэрэхъугъэу, коцым зэкIэми анахь чIыгубэ еубыты — гектар мин 90-рэ. Илъэсэу икIыгъэм, фэдэ къыхэмыкIыгъэу, коцыбэ къахьыжьыгъагъ — зы гектарым центнер 61,3-рэ. Мы илъэсым бжыхьасэхэм ящыкIагъэр зэкIэ арагъэгъотыгъ нахь мышIэми, чIыопсым ыпкъ къикIэу зэрэгугъагъэхэу Iофхэр зэпыфагъэхэп. Гъэтхэ реным ыкIи гъэмафэм иублэгъум ощхыбэ щыIагъ. Гъогогъуи 6-рэ ошъур къехыгъ. А пстэуми губгъо IофшIэнхэр лъэшэу къагъэхьылъагъэх.
Лэжьыгъэр къэгъэнэжьыгъэным пае республикэм ичIыгулэжьхэм афэлъэкIыщтыр зэкIэ ашIэ. Бжыхьасэхэм яIухыжьын макIо. НепэкIэ хьэр гектар мини 6,6-м щыIуахыжьыгъ, зы гектарым центнер 34,8-рэ къырахыжьыгъ. Коцыр гектар мини 2-м щыIуахыжьыгъ, зы гектарым центнер 39,7-рэ къытыгъ. Рапсыр гектар 677-м щырахыжьыгъ, зы гектарым центнер 23,2-рэ къытыгъ. Бжыхьасэхэми япхъын къызэрыкIоу щытыгъэп. ЧIыгум шынэгъакIэу хэлъыр зэрэбэм къыхэкIэу техникэр губгъом ихьэшъущтыгъэп. Джы гектар мин 79,9-м IофшIэнхэр щагъэцэкIагъэх, агъэнэфагъэр пстэумкIи гектар мини 105,8-рэ.
— Къулыкъу гъэнэфагъэхэм пшъэрылъ афэсшIыгъ хъызмэтшIапIэхэм гъэстыныпхъэр зэраIэкIагъахьэрэм ренэу анаIэ тырагъэтынэу. Урысыем мэкъу-мэщымкIэ и Министерствэ ыкIи компаниеу «Лукойлыр» тигъусэхэу а Iофыгъохэр зэшIотэхых. ПшъэдэкIыжь зыхьырэ къулыкъу пстэуми пшъэрылъэу яIэр лэжьыгъэм иIухыжьын зэпыу фэмыхъоу зэшIуахыныр, игъом тичIыгулэжьхэм IэпыIэгъу ятыгъэныр ары. УшэтыпIэхэр къыкъокIыгъэхэми, лэжьыгъэм иIухыжьын гъэхъагъэ хэлъэу ыкIэм нэгъэсыгъэным пае тфэлъэкIыщтыр зэкIэ тшIэщт ыкIи тихэгъэгу гъомылапхъэмкIэ ищынэгъончъэн тиIахь хэтшIыхьащт, — АР-м и ЛIышъхьэу КъумпIыл Мурат къащитыгъ исоциальнэ нэкIубгъохэм.