Сэнэхьат ухьазырыныгъэмкIэ шъолъыр программэу «Адыгеим и ЛIыхъужъхэр» зыфиIорэм ипхырыщын Адыгэ Республикэм щылъэкIуатэ. Ащ епхыгъэ ящэнэрэ еджэгъу уахътэр аухыгъ ыкIи джы проектым хэлэжьэрэ ветеранхэр къэралыгъо гъэIорышIэным икъулыкъухэм ащыIэхэу яIэпэIэсэныгъэ хагъахъо.
Мы программэр зытегъэпсыхьагъэр хэушъхьафыкIыгъэ дзэ операцием хэлэжьагъэхэр нэужкIэ къэралыгъо ыкIи муниципальнэ хэбзэ къулыкъухэм, къэралыгъо компаниехэм IэпэIэсэныгъэ, къулайныгъэ ахэлъэу Iоф ащашIэным фэгъэхьазырыгъэнхэр ары.
Шъугу къэдгъэкIыжьын, УФ-м и Президентэу Владимир Путиным къахилъхьэгъэ федеральнэ программэу «ЛIыхъужъхэм яуахът» зыфиIоу гъэрекIо щегъэжьагъэу агъэцакIэрэм имэхьанэ зыкъызэриIэтырэм епхыгъэу къэралыгъом ипащэ пшъэрылъ къыгъэуцугъ шъолъырхэри ащ фэдэ проектым игъэцэкIэн фежьэнхэу. Ащ къыдыхэлъытагъэу АР-м и ЛIышъхьэу КъумпIыл Мурат иунашъокIэ шъолъыр программэу «Адыгеим и ЛIыхъужъхэр» зыфиIорэм ипхырыщын фежьагъэх.Программэм хэлажьэхэрэм ащыщ хэушъхьафыкIыгъэ дзэ операцием иветеранэу Александр Махневыр. Ащ АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт игъэсэкIо шъхьаIэу иIэпэIэсэны- гъэ джырэ нэс хигъэхъуагъ. Джы ветераным къэралыгъо IофшIэн ыгъотыгъ, ар Мыекъопэ къэлэ администрацием ипащэ хэушъхьафыкIыгъэ дзэ операцием иIофыгъохэмкIэ иIэпыIэгъоу агъэнэфагъ.
— Сэнэхьат ухьазырыныгъэмкIэ программэу тызхэлажьэрэм ишIуагъэкIэ гъэцэкIэкIо хабзэм икъулыкъухэм яIофшIэн ыкIи япшъэрылъхэр зэдгъэшIэнхэ тлъэкIыгъ. АщкIэ тигъэсакIохэм мэхьанэшхо яI, амалыкIэхэр, шIэныгъэ дэгъухэр тагъэгъотыгъ. Джы ахэр IофшIэным къыщысэшъхьапэх. ШышъхьэIу мазэм еджэным иаужырэ едзыгъо пытыдзэжьыщт, — къыхигъэщыгъ Александр Махневым.
ТилIыхъужъхэм IэпэIэсэныгъэ ахэлъэу къэралыгъо ыкIи муниципальнэ хэбзэ къулыкъухэм, къэралыгъо компаниехэм Iоф ащашIэным иамал къареты мы программэм.
Iэшъынэ Сусан.