Урысыем щыпсэурэ ермэлхэм я Союз ишъолъыр къутамэ итхьаматэу Леван Амирханян хадзыгъ. Союзым иреспубликэ къутамэ изэхахьэ ермэл обществэм хахьэрэ лIыкIуи 150-рэ къекIолIагъ. Шъолъыр къутамэм ипащэщтыгъэу Оник Нигоевым мы илъэсым, жъоныгъуакIэм ыкIэм идунай ыхъожьыгъ.
Ермэлэу республикэм щыпсэухэрэм яобщественнэ организацие зэхэзыщагъэхэм ащыщэу Адыгеим ыкIи Пшызэ шъолъыр яобщественнэ IофышIэу Игорь Терзиян зэхахьэр къызэIуихыгъ. Оник Нигоевым игъэхъагъэхэр къыхагъэщызэ, ишIэжь агъэлъапIэзэ зэIукIэм къыщыгущыIагъэх ермэл чылысым иIофышIэу Тер Мушег Хачатрян, Урысыем щыпсэурэ цIыф лъэпкъхэм я Ассоциацие ишъолъыр къутамэ ипащэу, республикэ Адыгэ Хасэм итхьаматэу ЛIымыщэкъо Рэмэзан, Мыекъопэ къэзэкъ отделым иатаманэу Сергей Захаровыр, къэндзалхэм яобществэу «Дуслык» зыфиIорэм итхьаматэу Алим Ильясовыр. Ермэлхэм я Союз зызэхащагъэм къыщыублагъэу, ежьхэр зэзыубытылIэрэ гупчэу зэрэщытым имызакъоу, республикэм щыпсэурэ цIыф лъэпкъ зэфэшъхьафхэм языкIыныгъэ гъэпытэгъэнымкIэ ишIогъэшхо къызэригъакIорэр хагъэунэфыкIыгъ. Союзым итхьаматэ игуадзэу Iоф зышIэщтыгъэ Леван Амирханян яшъолъыр къутамэ Iоф зэришIэрэр къызэфихьысыжьыгъ. Культурнэ-шIэныгъэзехьэ гупчэу яIэм ермэлыбзэр, къэшъоныр, Iэпэщысэхэм яшIын кIэлэцIыкIухэм зэрэщызэрагъашIэрэм къытегущыIагъ. Ермэлхэм ямызакъоу IэпыIэгъу зищыкIагъэу Союзым къеуалIэхэрэм зэкIэми зэрадэIэпыIэхэрэр къыIотагъ. Нэужым хэдзынхэр рекIокIыгъэх. АР-м щыпсэурэ цIыф лъэпкъхэм я Унэ ипащэу Шъхьэлэхъо Аскэр Леван Амирханян ермэлхэм яшъолъыр Союз итхьаматэу хэдзыгъэным зэрэдыригъаштэрэр зэхахьэм къыщиIуагъ, иIофшIагъэ уасэ зэриIэр хигъэунэфыкIыгъ. Леван Амирханян зыхадзы нэужым Союзым иревизионнэ комиссие ыкIи и Совет хэтыщтхэр агъэнэфагъэх.
АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ Комитетым итхьаматэу Долэ Долэтбый Леван Амирханян фэгушIуагъ, ермэлхэм яобщинэ нэбгырэ пчъагъэу хэтымкIэ республикэм я 3-рэ чIыпIэр зэрэщиубытырэр къыхигъэщыгъ, тхьамэтакIэу хадзыгъэм гъэхъагъэхэр ышIынхэу фиIуагъ.