Iэшъынэ А.
Хабзэ зэрэхъугъэу, АР-м и Лъэпкъ тхылъеджапIэ краеведениемрэ литературэмрэкIэ иотдел мэфэкI къэгъэлъэгъонхэу тиусакIохэм афэгъэхьыгъэхэр зэхещэх.
Бэдзэогъум и 6-м щегъэжьагъэу и 15-м нэс зэIухыгъэщт усакIоу, тхакIоу, драматургэу Хъурмэ Хъусен къызыхъугъэр илъэс 80 зэрэхъугъэм фэгъэхьыгъэр. Ащ тхакIом ищыIэныгъэ ыкIи итворчествэ къеIуатэ. Хъусен иусэ тхылъхэм икъоджэ кIасэ, ны-тыхэм, игупсэхэм, ичIыгу, ихэгъэгу, цIыфыгъэм, шъыпкъагъэм, шIулъэгъум ауасэ къащиIотыкIыгъ.
«Мамыр щыIакIэм иорэдыIу»
Джары цIэу иIэр АР-м и Лъэпкъ усакIоу, тарихъ-шIэныгъэлэжьэу, профессорэу, УФ-м культурэмкIэ изаслуженнэ IофышIэу Бэрэтэрэ Хьамидэ къызыхъугъэр илъэс 95-рэ зэрэхъугъэм фэгъэхьыгъэр.Къэгъэлъэгъоным усакIом адыгабзэкIэ ыкIи урысыбзэкIэ ытхыгъэхэр, зэридзэкIыгъэ произведениехэр ыкIи ежь ищыIэныгъэ, итворчествэ яхьылIагъэхэр хэхьагъэх.МэкIайхэм зэратефэх Хьамидэ иусэ сборникхэр. УсакIом цIыф лъэпкъхэм язэкъошныгъэ, яхьалэл зэфыщытыкIэ, Адыгеим ичIыопс хьалэмэт идэхагъэ къащиIотыкIыгъ. ЦIыфыр цIыфыным пае къызэрэхъугъэр, шIум, дэхагъэм гъунэ зэрямыIэр, щыIэныгъэр а зэкIэми зэрэлъагъэкIуатэрэр ащыкIэгъэтхъыгъ.
УсакIом итворчествэ зэзгъэшIэрэ студентхэмкIэ, егъэджакIохэмкIэ мыщ фэдэ экспозициехэр IэпыIэгъушIух, Хь. Бэрэтарым ищыIэныгъэ ыкIи итворчествэ къыпфызэIуахы. МэфэкI къэгъэлъэгъонитIур ыгъэхьазырыгъ Лъэпкъ тхылъеджапIэм ибиблиотекарэу ЛIышэ Данэ.
Дзэукъожь Нуриет.