Урысыем икIэлэеджакIохэм яя 13-рэ гъэмэфэ Спартакиадэ къыдыхэлъытагъэу урым-рим бэнэнымкIэ зэнэкъокъу Мытищи щыкIуагъ. БэнэкIо анахь лъэшхэр ащ къыугъоигъэх.
ЗэкIэмкIи спортсмени 124-рэ шъолъыр 40-мэ къарыкIыгъ. Адыгеир къэзыгъэлъэгъуагъэр нэбгыритIу. Ахэр Тэхъутэмыкъое районым щыщ Барцо Рустамрэ Ассэкъэлэ Тамерланрэ. ТIуми гъэхъагъэхэр ашIыгъэхэу республикэм къагъэзэжьыгъ.
Барцо Рустам килограмм 38-рэ къэзыщэчыхэрэм ахэтыгъ. ИзэIукIэгъухэр зэкIэ къыхьыхи кIалэр финалым нэсыгъ. Ащи теубытэгъэ пытэ хэлъэу щыбэнагъ, текIоныгъи къыдихыгъ. Ассэкъэлэ Тамерлан килограмм 41-рэ зихьылъагъэхэм ахэтэу зиушэтыгъ. Джащ фэдэу ари финалым нэсыгъ. Ау Москва хэкум илIыкIо ащ нахь лъэшыгъ. КIалэм тыжьын медаль къылэжьыгъ. Урысые Спартакиадэр мэхьанэшхо зиIэ зэнэкъокъоу щыт. ИлъэситIум зэ зэхащэ. Тикъэралыгъо ихэшыпыкIыгъэ ныбжьыкIэ командэ хэхьащтхэм якъыхэхын ар фэIорышIэ.