Зэзэгъыныгъэм зэдыкIэтхагъэх

Адыгэ Республикэм и ЛIышъхьэу КъумпIыл Мурат Урысыем монополием пэшIуекIогъэнымкIэ и Федеральнэ къулыкъу ипащэу Максим Шаскольскэм правительствэм и Унэ IофшIэгъу зэIукIэгъу щыдыриIагъ, зэдэлэжьэным ималыкIэхэр къыхагъэщыгъэх.

ЗэIукIэм илъэхъан лъэныкъохэр зыкIэтхэгъэхэ Зэзэгъыныгъэр зыфэгъэхьыгъэр монополием пэшIуекIогъэнымкIэ хэбзэгъэуцугъэу щыIэр укъуагъэ мыхъу­нымкIэ IофшIэныр нахь дэгъоу зэхэщэгъэныр, предпринимательствэ цIыкIумрэ гурытымрэ IэпыIэгъу ятыгъэнымкIэ амалыкIэхэр нахь тэрэзэу гъэфедэгъэн­хэр ары.

Адыгеим и ЛIышъхьэрэ Урысыем монополием пэшIуекIогъэнымкIэ и федеральнэ къулыкъу ипащэрэ джащ фэдэу атегущыIагъэх сатыушIыпIэхэм нахь шIуагъэ къягъэтыгъэным, инвестициехэр нахьыбэ шIыгъэнхэм, монополием пэшIуекIогъэнымкIэ хэбзэгъэуцугъэу щыIэр укъуагъэ мыхъуным, зэнэкъокъуныгъэмкIэ шапхъэхэр гъэфедэгъэнхэм япхыгъэ Iофыгъохэм.

«ТэркIэ мэхьанэ зиIэр тызыкIэтхэгъэ Зэзэгъыныгъэм къыдилъытэрэ лъэныкъо­хэм адиштэу нахь лъэгэпIэ инхэм танэ­сыныр ары. Iофтхьабзэу дгъэнэфагъэхэм республикэм зэнэкъокъуныгъэм зыщиушъомбгъунымкIэ ыкIи уасэхэм ягъэ­нэфэнкIэ яшIуагъэ къызэрэкIощтым сицыхьэ телъ», — къыIуагъ КъумпIыл Мурат.

Федеральнэ къулыкъум ипащэ Адыгеим монополием пэшIуекIогъэнымкIэ Iофэу щагъэцакIэрэм осэшIу къыфи­шIыгъ ыкIи Федеральнэ къулыкъум и ГъэIорышIапIэу Адыгеим щыIэмрэ респуб­ликэм иминистрэхэм я Кабинетрэ язэдэлэжьэныгъэ шIуагъэ къызэритырэр къыхигъэщыгъ.

«Тикъулыкъу анахьэу ынаIэ зытыригъэтхэрэм ащыщ уасэхэр социальнэ мэхьанэ зиIэ лъэныкъохэмкIэ зэрагъэ­нафэхэрэр уплъэкIугъэнымкIэ респуб­ли­кэм тапэкIи тишIуагъэ едгъэкIыныр. Товархэр къэзышIыхэрэмрэ ахэр зыIэ­кIа­хьэхэрэмрэ яфедэхэр зэдиштэнхэ фае», — къыIуагъ Максим Шаскольскэм.

Гухэлъэу яIэхэр республикэм щыпхырыщыгъэнхэм пае Урысыем монополием пэшIуекIогъэнымкIэ и Федеральнэ къулыкъу и ГъэIорышIапIэу Адыгеим щыIэмрэ республикэм экономикэ хэхъо­ныгъэмкIэ ыкIи сатыумкIэ и Министерствэрэ язэдэлэжьэныгъэ нахь агъэлъэшын фае. Унашъоу аштэщтхэр анахьэу зэпхыгъэщтхэр зэнэкъокъуныгъэм зегъэ­ушъомбгъугъэныр, хъызмэтыр зезы­хьэхэрэм ащыщхэм яIофхэм язытет фэгъэхьыгъэ къэбарыр икъоу алъыгъэ­Iэсыгъэныр, уасэхэм ягъэнэфэнкIэ Iоф­хэм язытет зыфэдэр ыкIи нэмыкIхэр.

Урысыем монополием пэшIуекIогъэнымкIэ и Федеральнэ къулыкъу илIыкIохэм Адыгеим яшIуагъэ къырагъэ­кIыщт монополием пэшIуекIогъэнымкIэ Iоф­тхьабзэхэр пхырыщыгъэнхэмкIэ, гъогу картэр гъэцэкIэгъэнымкIэ. Адыгеим и ЛIышъхьэ Урысыем монополием пэшIуе­кIогъэнымкIэ и Федеральнэ къулыкъу тишъолъыр ынаIэ къызэрэтыригъэтырэм пае зэрэфэразэр къыIуагъ, социальнэ мэхьанэ зиIэ товархэмрэ цIыфхэм апае фэIо-фашIэхэмрэ къя­кIущт уасэхэмкIэ IугъэкIыгъэнхэм епхыгъэ Iофыгъохэм язэшIохынкIэ зэзэгъыны­гъэу зэдашIыгъэхэм яшIуагъэ къызэрэкIощтыр ЛIышъхьэм къыхигъэщыгъ.

АР-м и ЛIышъхьэ ипресс-къулыкъу къытырэ къэбархэмкIэ Тхьаркъохъо Сафыет.