Адыгеим испортсменхэм ягъэхъагъэхэм джыри зы къахэхъуагъ! Бэдзэогъум и 6-м къыщегъэжьагъэу и 8-м нэс Темыр Македонием икъалэу Скопье урым-рим бэнэнымкIэ Европэм и Первенствэ щыкIуагъ. Ащ хэлэжьагъэх илъэс 20-м шIомыкIыгъэ спортсменхэр.
Урысыем ихэшыпыкIыгъэ куп хэтыгъ Тэхъутэмыкъое районым щыщ Шъоумыз Амир. Килограмм 67-м нэс къэзыщэчыхэрэм азыфагу ящэнэрэ чIыпIэр ащ къыщыдихыгъ, бэнэкIэ гъэшIэгъон къыгъэлъэгъуагъ, Урысыем ихэшыпыкIыгъэ купи Адыгэ Республикэми джэрз медаль къафихьыгъ. Илъэсыбэм къакIоцI зышъхьамысыжьэу зызэригъэхьазырыгъэм ыкIи тренерхэм яIэпэIэсэныгъэ яшIуагъэкIэ ащ фэдэ гъэхъагъэ ышIын ылъэкIыгъ. Спортсмен лъэшхэм ягъэхьазырынкIэ тишъолъыр мэхьанэшхо зэриIэр Шъоумыз Амир къыгъэшъыпкъэжьыгъ. Къэралыгъом ихэшыпыкIыгъэ командэ къыдыхэт Нэхэе Рэмэзан игъусэу шIэхэу ахэр кIощтых Словакием дунаим и Первенствэ хэлэжьэнхэу. ШышъхьэIум и 17-м къыщегъэжьагъэу и 23-м нэс кIощт зэнэкъокъум илъэс 20-м шIомыкIыгъэхэр щызэнэкъокъущтых.
— Тиспортсменхэм тафэлъаIо щэIагъэ къызхагъэфэнэу, дунэе лъэгапIэм диштэрэ зэнэкъокъум текIоныгъэр къыщыдахынэу! — Адыгеим и ЛIышъхьэу КъумпIыл Мурат къащитхыгъ исоциальнэ нэкIубгъохэм.