2026-рэ илъэсым кадастрэ IофшIэнхэр Адыгеим зэрэщызэхащэщтхэм, Росреестрэм хэушъхьафыкIыгъэ дзэ операцием хэлажьэхэрэм, иветеранхэм ыкIи ахэм яунагъохэм IэпыIэгъоу аритырэм, нэмыкIхэм афэгъэхьыгъагъ Росреестрэм АР-мкIэ и ГъэIорышIапIэ джырэблагъэ щызэхащэгъэгъэ брифингыр.
Ащ ипащэ игуадзэу Къуижъ Эдуард кадастрэ IофшIэнхэр зыфэдэхэм, ахэм ямэхьанэ къатегущыIагъ. Ащ къызэриIуагъэмкIэ, чIыгу Iахьхэм, унэхэм, псэолъэ зэфэшъхьафхэм, ухыгъэхэри ныкъошIхэри зэрахэтхэу, къызэлъаубытырэ чIыпIэхэм ягъунапкъэхэр гъэнэфэгъэнхэр е хэукъоныгъэ иIэу агъэнэфэгъагъэхэмэ, ар гъэтэрэзыжьыгъэныр ары Iофэу зэшIуахыхэрэм мурад шъхьаIэу яIэр.2015-рэ илъэсым къыщыублагъэу мыщ фэдэ IофшIэнхэр Урысыем щызэшIуахых. 2023-р ары апэрэу Адыгеим ахэр зыщызэхащагъэхэр. Джащыгъум зигъунапкъэхэр гъэнэфэгъэ чIыгу Iахьэу республикэм илъыр процент 78-рэ мэхъоу къэнэфэгъагъ. Къуижъ Эдуард къызэриIуагъэмкIэ, мы уахътэм ар процент 83-м нэсыгъ.
Амыгъэкощырэ мылъкум и ЗыкI къэралыгъо реестрэ АдыгеимкIэ чIыгу Iахьэу щытхыгъэр пстэумкIи 266-рэ мэхъу. Ащ щыщэу 222-мэ ягъунапкъэхэр гъэнэфагъэх. Мыгъэ IофшIэнэу зэхащэщтхэм амыгъэкощырэ мылъкум хэхьэрэ псэолъэ мини 6-м ехъу къызэлъаубытыщт. Мы уахътэм кадастрэ инженерхэм Джэджэ районым Iоф щашIэ, ащ Мыекъопэ ыкIи Тэхъутэмыкъое районхэр къыкIэлъыкIощтых.
Нэужым чIыгу Iахьхэм ягъунапкъэхэр мыгъэнэфагъэхэмэ е хэукъоныгъэхэр иIэхэу атхыгъэхэмэ ахэр зиехэм азыфагу зэгурымыIоныгъэ къызэрихьэрэм, хэбзэнчъэу гъунапкъэхэр укъуагъэ хъугъэу бэрэ къызэрэхэкIырэм, ащ фэдэ чIыпIэ рихьылIэрэр зэрэзекIон фаем Росреестрэм АР-мкIэ и ГъэIорышIапIэ иотделхэм япащэу Iофтхьабзэм хэлэжьагъэхэр къатегущыIагъэх.КъызэраIуагъэмкIэ, 2025-рэ илъэсымрэ 2026-м пыкIыгъэ уахътэмрэ пштэхэмэ, хэбзэнчъэу ямычIыгу аштагъэу гъогогъу 50 чIыгухэм ягъэфедэнкIэ ыкIи якъэухъумэнкIэ ГъэIорышIапIэм икъэралыгъо инспекторхэм республикэм щагъэунэфыгъ.
Росреестрэм фэIо-фашIэу ыгъэцакIэхэрэр хэушъхьафыкIыгъэ дзэ операцием хэлажьэхэрэм, иветеранхэм, ахэм ыкIи хэкIодагъэхэм яунагъохэм нахь къызIэкIэгъэхьэгъошIу афэхъунхэми къулыкъур ыуж ит. Мыхэм лъэIу тхылъэу къатыхэрэм зэкIэмэ апэу ахэплъэх, амыгъэкощырэ мылъкум ылъэныкъокIэ фитыныгъэу яIэхэр экспертизэм къыушыхьатыгъэхэмэ, ащ итхын зы мафэ нахьыбэ тырагъэкIуадэрэп.
Джащ фэдэу хэушъхьафыкIыгъэ дзэ операцием хэкIодагъэм имылъкоу амыгъэкощыхэрэм ахахьэрэр къызфэнэщтхэм ар агъэпсынымкIэ къэралыгъо пошлинэу къыдэлъытагъэр амытыным фэгъэхьыгъэ федеральнэ хэбзэгъэуцугъэм 2024-рэ илъэсым имэлылъфэгъу мазэ кIуачIэ иIэ хъугъэ.А зэпстэумэ анэмыкIэу, компаниеу «Роскадастрэм» иIофышIэхэр ыпкIэ хэмылъэу ветеранхэм адэжь макIох, кадастрэ учетым е амыгъэкощырэ мылъкум епхыгъэ фитыныгъэхэм ятхын пае тхылъхэр къаIахых, ищыкIагъэр гъэпсыгъахэ зыхъукIэ афащэжьы.
ХэушъхьафыкIыгъэ дзэ операцием хэлажьэхэрэм, иветеранхэм, ахэм ыкIи хэкIодагъэхэм яунагъохэм кадастрэ IофшIэнхэр е амыгъэкощырэ мылъкум и ЗыкI къэралыгъо реестрэ къыхэтхыкIыгъэ тхылъ ящыкIагъэмэ, ахэм ауасэ ипроцент 50-р ары атырэр.
ХЪУТ Нэфсэт.