А. Бэрзэджым ихъарзынэщ
УФ-м ФедерациемкIэ и Совет хэбзэгъэуцу ныбжьыкIэхэм я Палатэ изэхэсыгъо щыкIуагъ. ФедерациемкIэ Советым и Тхьаматэу Валентина Матвиенкэм ар зэрищагъ.
Ащ къызэриIуагъэмкIэ, 2012-рэ илъэсым хэбзэгъэуцу ныбжьыкIэхэм я Палатэ зэрэзэхащагъэм къэралыгъо парламентаризмэм инэкIубгъуакIэ къызэIуихыгъ. Урысыем ишъолъыр зэфэшъхьафхэм къарыкIыгъэ хэбзэгъэуцу ныбжьыкIэхэр зэхэсыгъом къекIолIагъэх. Мыекъуапэ инароднэ депутатхэм я Совет илIыкIоу, хэбзэгъэуцу ныбжьыкIэхэм я Палатэ социальнэ политикэмкIэ ыкIи псауныгъэм икъэухъумэнкIэ и Комитет итхьаматэу Бэрзэдж Асиет зэхэсыгъом хэлэжьагъ.ХэушъхьафыкIыгъэ дзэ операцием щыIэхэм ыкIи ахэм яунагъохэм IэпыIэгъу афэхъугъэныр парламентариехэм япшъэрылъ шъхьаIэу зэрэщытыр ФедерациемкIэ Советым и Тхьаматэ къыхигъэщыгъ.
— А IофшIэным апэрэ мафэхэм къащыублагъэу тыхэщагъ. БлэкIыгъэ илъэсым изакъоми, шIушIэ IэпыIэгъоу тонни 100-м ехъу хэушъхьафыкIыгъэ дзэ операцием щыIэхэм афядгъэщагъ. Зэпэуцум хэлэжьагъэхэр щыIэкIэ-псэукIэм хэгъэгъозэжьыгъэнхэмкIэ, яунагъохэм IэпыIэгъу ягъэкIыгъэнымкIэ Iофыгъуабэ зэшIохыгъэ мэхъу, — къыхигъэщыгъ Валентина Матвиенкэм.
Хэбзэгъэуцу ныбжьыкIэхэм я Палатэ хэтмэ ащыщэу нэбгырэ 13 хэушъхьафыкIыгъэ дзэ операцием хэлэжьагъ, джыри нэбгыритIу зэуапIэм Iут. Ахэм лIыгъэшхоу зэрахьагъэм, къэралыгъом зэрэфэшъыпкъэхэр къызэраушыхьатыгъэм пае Валентина Матвиенкэм рэзэныгъэ гущыIэхэр афигъэзагъ.
Бэрзэдж Асиет пленарнэ зэхэсыгъом къыщыгущыIагъ. Мы илъэсым щыублагъэу Херсон хэкум щыпсэурэ сабыйхэм медицинэ ыкIи стоматологическэ IэпыIэгъу ягъэкIыгъэным фэгъэхьыгъэ социальнэ проектэу зыдэлэжьагъэм ащ щигъэгъозагъэх.АР-м и ЛIышъхьэу, партиеу «Единэ Россием» и Адыгэ шъолъыр къутамэ и Секретарэу КъумпIыл Мурат, АР-м и Къэралыгъо Совет — Хасэм и Тхьаматэу Владимир Нарожнэм, АР-м псауныгъэр къэухъумэгъэнымкIэ и Министерствэ ыкIи Адыгеим ыцIэкIэ Iоф зышIэрэ сенаторхэм проектым дырагъэштагъ ыкIи Херсон хэкум щыпсэухэрэм япсауныгъэ икъэухъумэн ылъэныкъокIэ ащ ишIогъэшхо къэкIуагъ.
Москва, Адыгеим, Оренбург хэкум къарыкIыгъэ врачхэр Херсон хэкум и Нижнесерогозскэ район гупчэ сымэджэщым щылэжьагъэх. Херсон хэкум щыпсэухэрэм ащыщэу нэбгырэ 2513-мэ медицинэ IэпыIэгъу арагъэкIыгъ, ахэм ащыщэу нэбгырэ 1492-р – кIэлэцIыкIух. ЗипсауныгъэкIэ щыкIагъэ зиIэ сабыи 180-мэ IэпыIэгъу агъотыгъ, ахэм янахьыбэм врачхэр зэряIэзагъэхэр апэрэ.
— Медицинэ страхованиемкIэ Фондым ипрограммэхэм тэрэзэу Iоф зэрадэпшIэщтыр, тхылъхэр зэрэбгъэхьазырыщтхэр Адыгэ республикэ цэIэзапIэм иврачхэм яIофшIэгъухэу Нижнесерогозскэ сымэджэщым щылажьэхэрэм арагъэшIагъ. «Единэ Россием» общественнэ IэпыIэгъумкIэ и Штаб щытыугъоигъэ шIушIэ IэпыIэгъубэ сымэджэщми госпитальми бэрэ афядгъэщагъ, — къыIуагъ Бэрзэдж Асиет.
Хэбзэгъэуцу ныбжьыкIэхэм я Палатэ икоординаторэу, сенаторэу Игорь Костюкевич IэпыIэгъу къафэхъузэ проектым зэрэдэлажьэхэрэр А. Бэрзэджым хигъэунэфыкIыгъ. Херсон хэкум исэмэгу шъолъыр ирайонхэм, фронтым пэблэгъэ муниципальнэ псэупIэ 14-мэ IэпыIэгъур анагъэсыгъ. Врачэу проектым хэлажьэхэрэм гурытымкIэ аныбжьыр илъэс 30. Херсон хэкум щыпсэухэрэм ящыIэкIэ-псэукIэ нахьышIу зышIыгъэ проектым игъэцэкIэнкIэ ФедерациемкIэ Советым IэпыIэгъу къызэраригъэкIырэмкIэ Валентина Матвиенкэм зэрэфэразэр Бэрзэдж Асиет игущыIэ къыщыхигъэщыгъ.