Тикъэралыгъо и УIэшыгъэ КIуачIэхэм дзюдомкIэ язэнэкъокъу къалэу Краснодар щыкIуагъ. Къыблэ, Гупчэ, Москва, Ленинград дзэ шъолъырхэм, космическэ кIуачIэхэм, нэмыкI чIыпIэхэм къарыкIыгъэ лIыкIохэм ащ зыщаушэтыгъ.
ЗэкIэмкIи бэнэкIо 56-мэ ясэнаущыгъэ къагъэлъэгъуагъ. СпортымкIэ дунэе класс къэзылэжьыгъэ мастерэу нэбгыритIу, спортымкIэ Урысыем имастерыцIэр зиIэ 39-рэ ахэм ахэтыгъ. БэнэкIо лъэшхэр мыщ зэрэщызэрэугъоигъэхэр ащ къеушыхьаты.
Адыгеим иреспубликэ спорт еджапIэу Кобл Якъубэ ыцIэ зыхьырэм зыщызыгъэсэгъэхэ Мерэм Дамиррэ Владимир Ингушевымрэ Къыблэ дзэ шъолъырым хэтхэу чемпионатым хэлэжьагъэх. Дамир килограмм 60-м нэмысэу къэзыщэчыхэрэм ахэтыгъ, текIоныгъи къыщихьыгъ. Владимир Ингушевыр килограмм 90-м кIахьэу зихьылъэгъэ спортсменхэм ябэныгъ, ящэнэрэ чIыпIэр къыдихыгъ.