Урысые Федерацием спортымкIэ и Министерствэ иунашъокIэ Тэхъутэмыкъое спорт еджапIэм зыщызыгъэсэрэ Нащэ Расул самбэмкIэ «Урысыем спортымкIэ изаслуженнэ мастер» зыфиIорэ цIэр фагъэшъошагъ. Къэралыгъом ыпашъхьэкIэ гъэхъагъэ зэришIыгъэм ишыхьат тын лъапIэр.
Адыгеим ибэнакIохэр зэрэдунаеу щызэлъашIэщтыгъэх, илъэсипшI пчъагъэхэм зэкIэлъыкIоу гъэхъагъэхэр ашIыщтыгъ. Ащ фэдэ «хабзэу тхэзыжьырэм джы зыкъырегъэIэтыжьы» адыгэ кIалэм.Расул ныбжьыкIэми, цIэ лъапIэм икъэлэжьынкIэ гъогу хьылъэ къыкIугъ. Зэпымыущтыгъэ ухьазырынхэм гъэхъагъэхэр къакIэлъыкIуагъэх: самбэмкIэ дунаим и Кубок, Дунэе чемпионатым итыжьын медаль, Европэм иджэрз, Урысые зэнэкъокъухэм гъогогъу пчъагъэрэ ячемпион. Спортсменыр мыщ фэдэ гъэхъагъэхэм афэзыщагъэр итренерэу Джарымэкъо Рустам. Нащэ Расул – республикэр зэрэгушхорэ бэнакIу.