Фондэу «Хэгъэгум иухъумакIохэр»
Унагъом, шIулъэгъум, зэфэшъыпкъэныгъэм я Мафэ фэгъэхьыгъэ мэфэкI Iофтхьабзэ къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ АР-м и Лъэпкъ музей щызэхищагъ. Ащ иIэпыIэгъугъэх музеим, Мыекъопэ къэлэ администрацием ялIыкIохэр, артист-гуфакIохэу мэфэкI концерт къэзытыгъэхэр.
Iофтхьабзэм къырагъэблэгъагъэх хэушъхьафыкIыгъэ дзэ операцием иветеранхэр, ахэм ыкIи хэкIодагъэхэм, зыдэхъугъэр амышIэхэрэм яунагъохэр. Программэм къыдыхэлъытэгъагъ мэфэкIым епхыгъэ экскурсиер. Ар гъэшIэгъонэу ригъэкIокIыгъ Лъэпкъ музеим этнографиемкIэ ипащэ. Урыс, ермэл, къэндзал унагъохэм арылъ шэн-зэхэтыкIэхэр къафиIотагъэх ыкIи культурэхэр зэрэзэфэшъхьафхэм ямылъытыгъэу, шIулъэгъум, лъытэныгъэм, зэдеIэжьыным, къызхэкIыгъэ лъапсэхэм зэрафэшъыпкъэхэм зэкIэ унагъохэр зэрэзэрапхыхэрэр Iофтхьабзэм щыхагъэунэфыкIыгъ.
Къэзэрэугъоигъэхэм мэфэкI концерт бай къяжэщтыгъ. Телевизионнэ проектэу «Голос», шооу «Ты — супер!», «Звезда-2024» зыфиIохэрэм яфиналисткэу, «Дышъэ дискыр» къызфагъэшъошэгъэ Валерия Петровар ащ хэлэжьагъ. Унагъом, шIулъэгъум, шъыпкъагъэм афэгъэхьыгъэ орэдхэр щыIугъэх. МэфэкI концертым икIэух социальнэ координаторхэм къырагъэблэгъэгъэ хьакIэхэм нэпэеплъ шIухьафтынхэу шэф остыгъхэр, кIэлэцIыкIухэм — IэшIу-IушIухэр аратыгъэх.
ХэушъхьафыкIыгъэ дзэ операцием иветеранхэр ыкIи ахэм ягупсэхэр зэгъусэхэу яуахътэ агъэкIонымкIэ, гуфэбэныгъэ зыхэлъ зэIукIэгъум зыщагъэпсэфынымкIэ, зэдэгущыIэгъу зэфэхъунхэмкIэ мэфэкI Iофтхьабзэр джыри зы амалышIу хъугъэ.
Къыхэгъэщыгъэн фае, фондэу «Хэгъэгум иухъумакIохэр» зыфиIорэм ишъолъыр къутамэ культурнэ ыкIи унэгъо Iофтхьабзэхэр зэрифэшъуашэу ветеранхэм афызэхищэнхэм зэпымыоу ынаIэ тырегъэты.