Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэм Краснодар краимкIэ очылхэм яколлегие хэт очылым хабзэр зэриукъуагъэр, шхъухьэ зэрэзэрихьагъэр къычIагъэщыгъ.
ЗэрагъэунэфыгъэмкIэ, 2024-рэ илъэсым бзылъфыгъэ горэм ыкъо юридическэ IэпыIэгъу ритынымкIэ зэзэгъыныгъэ ащ дишIын зэхъум, кIалэм янэ ыгъэплъэхъугъ, сыдэу щытми, сомэ мин 200 къыригъэтыгъ. А ахъщэр ежь зэрэшIоигъоу ыгъэфедагъ.Урысыем и Следственнэ комитет Адыгэ РеспубликэмкIэ иследственнэ гъэIорышIапIэ ащкIэ уголовнэ Iоф къызэIуихыгъ УФ-м и Уголовнэ кодекс ия 159-рэ статья ия 2-рэ Iахь тегъэпсыхьагъэу.Мы мафэхэм бзэджэшIагъэр къызхэкIыгъэм игъэунэфынкIэ Iофтхьабзэхэр зэшIуахых.
Агъэпщынагъ
Урысыем хэгъэгу кIоцI IофхэмкIэ и Министерствэ Мыекъопэ районымкIэ икъутамэ зиIоф аIохэрэр пIэлъэ гъэнэфагъэкIэ зыщаIыгъхэрэ изоляторэу иIэм ипэщагъэм Урысыем и Уголовнэ кодекс ия 286-рэ статья ия 3-рэ Iахь къызэрэдилъытэрэм тетэу уголовнэ Iоф къыфызэIуахыгъ.
Нафэ къызэрэхъугъэмкIэ, мобильнэ телефонхэр агъэтIысыгъэхэм афычIэзыхьэщтыгъэ хъулъфыгъэу пщыныжь зэрагъэхьын фаер амыгъэпщынэнэу С.А. Плотниковым ыIэ илъхэм унашъо афишIыгъ.Адыгэ республикэм и Мыекъопэ район хьыкум С.А. Плотниковым условнэу илъэси 4 тырилъхьагъ, IэнэтIэ гъэнэфагъэхэр илъэсрэ ныкъорэм къыкIоцI ыгъэцэкIэнхэ фимытэу ышIыгъ.Илъэси 4-рэ ныкъорэ колонием дэсыщт
Урысыем и Уголовнэ кодекс ия 210-рэ статья ия 2-рэ Iахь, ия 322.1-рэ статья ия 2-рэ Iахь ипунктэу «а»-м зигугъу къашIырэ бзэджэшIагъэхэр зезыхьэгъэ Светлана Шанинам къыфаIэтыгъэ уголовнэ IофымкIэ кIэух унашъор Адыгэ Республикэм щаштагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэрэ Урысые Федерацием хэгъэгу кIоцI IофхэмкIэ и Министерствэ ишъолъыр къутамэрэ яIофышIэхэм оперативнэ-лъыхъон Iофтхьабзэу зэрахьагъэхэм яматериалхэр IэубытыпIэ къызыфишIыхэзэ, уголовнэ Iофыр къыIэтыгъ Урысыем и Следственнэ комитет Адыгэ РеспубликэмкIэ иследственнэ гъэIорышIапIэ.
ХэбзэухъумакIохэм зэрагъэунэфыгъэмкIэ, 2022-рэ илъэсым ичъэпыогъу щегъэжьагъэу 2023-рэ илъэсым ибэдзэогъу нэс бзэджэшIэ купым хэтэу С. А. Шанинар зыпылъыгъэр IэкIыб къэралыгъохэм ягражданхэу Урысыем хэбзэнчъэу къихьэ зышIоигъуагъэхэм визэ нэпцIхэр афызэхэгъэуцогъэнхэм пае Адыгэ Республикэм исхэу ахэр езыгъэблэгъэщт фэдэхэр къыхэгъэщыгъэнхэр ары.Илъэси 4-рэ мэзи 6-рэ колонием дэсынэу хьыкумым С. А. Шанинам тырилъхьагъ.
Экстремистхэм адеIэщтыгъ
Адыгэ Республикэм и Тэхъутэмыкъое район хьыкум илъэс 40 зыныбжь Андрей Палкэ фэгъэхьыгъэ уголовнэ Iоф къызэIуихыгъ. Урысыем и Уголовнэ кодекс ия 282-рэ статья ия 2-рэ Iахь къыдилъытэрэ бзэджэшIагъэ ащ зэрихьагъ — экстремист организацием IэпыIэгъу ритыщтыгъ.
ЩымыIэ къэралыгъом игражданствэ яIэу справкэхэр язытыщтыгъэ экстремист организацием ар дэлажьэщтыгъ. Урысые Федерацием ихэбзэгъэуцугъэхэр амыгъэцэкIэнхэм ар къыфаджэщтыгъ. Ащ нэмыкIэу, ахъщэ къыугъоищтыгъ ыкIи а организацием исчёт ригъахьэщтыгъ.Адыгэ Республикэм и Тэхъутэмыкъое район хьыкумым ышIыгъэ унашъом тетэу илъэси 3-рэ мэзи 6-рэ колонием ащ щигъэкIощт.ИIоф аIуагъ
Очылхэм я Адыгэ республикэ коллегие иочылэу бзэджэшIагъэ зезыхьагъэм къыфаIэтыгъэ уголовнэ Iофым изэхэфын ыкIэм фэкIуагъ.
ЗэрагъэунэфыгъэмкIэ, 2022-рэ илъэсым бзэджэшIэгъэ пчъагъэ зезыхьэгъэ хъулъфыгъэу агъэмысэрэр юридическэ IэпыIэгъу ритынэу ащ къыфэкIогъагъ. Къуалъхьэ къыритымэ, уголовнэ пшъэдэкIыжь рамыгъэхьынэу ар ыгъэгугъагъ. Нахь IэнэтIэшхо зиIэ горэм а ахъщэр IэкIигъахьэмэ, Iофыр зэпыфэнэу риIуагъ. Сыдэу щытми, къолъхьэ сомэ миллион 15-у къыритыгъэр зэрэфаеу ежь ыгъэфедагъ.Уголовнэ Iофыр хьыкумым IэкIагъэхьагъ хэплъэным пае.Хэбзэнчъэу къызфигъэфедагъэх
АР-м хэгъэгу кIоцI IофхэмкIэ и Министерствэ хэбзэнчъэу бизнес зышIыщтыгъэм фэгъэхьыгъэ уголовнэ Iофэу къызэIуихыгъэм изэхэфын ыухыгъ.
ЗэрагъэунэфыгъэмкIэ, сатыушI хъызмэтшIапIэм изэхэщакIохэм ащыщэу илъэс 55-рэ зыныбжьым Теуцожь районым щыпсэурэ зэшитIум ыкIи нэмыкIхэм зэзэгъыныгъэ адишIи, Тэхъутэмыкъое районым пшэхъо— мыжъокIэ зэхэлъым икъычIэхын щызэхищагъ. Следствием къызэритыгъэмкIэ, хъулъфыгъэм чIычIэгъ баиныгъэхэр ыгъэфедэнхэу къэралыгъом фитыныгъэ къызэрэритыгъэр къэзыушыхьатырэ тхылъ иIагъэп, зэрэхъурэмкIэ, хэбзэнчъэу бизнес ышIыщтыгъ.2024-рэ илъэсым ичъэпыогъу мазэ къыщегъэжьагъэу 2025-м игъэтхапэ нэс пштэмэ, ар зипэщэ бзэджэшIэ купым пшэхъо-мыжъокIэ зэхэлъэу кубометрэ мин 15 фэдиз къычIихи, IуигъэкIыгъ. Къэралыгъом зэрарэу рахыгъэр сомэ миллиони 5,3-м ехъу.ЩынэгъончъэнымкIэ Федеральнэ къулыкъум АР-мкIэ и ГъэIорышIапIэрэ АР-м хэгъэгу кIоцI IофхэмкIэ и Министерствэ экономикэм епхыгъэ бзэджэшIагъэхэм ыкIи къолъхьэ тын-Iыхыным апэшIуекIогъэнымкIэ иотделрэ яIофышIэхэм мы бзэджэшIагъэр къычIагъэщыгъ.Уголовнэ Iофэу ар зэрэзэрахьагъэр къэзыушыхьатырэр хьыкумыр хэплъэнэу фагъэхьыгъ.ИIэнатIэ къызфигъэфедагъ
Хьыкум приставхэм я Мыекъопэ къэлэ отдел иIофышIэу щытыгъэм уголовнэ Iоф къыфаIэтыгъ.
Урысыем и Следственнэ комитет Адыгэ РеспубликэмкIэ и Следственнэ гъэIорышIапIэ Урысыем и Уголовнэ кодекс ия 285-рэ статья иа 1-рэ Iахь къыдилъытэрэ бзэджэшIагъэ зэрэзэрихьагъэм пае уголовнэ Iоф къыфаIэтыгъ. Урысыем и ФСБ Адыгэ РеспубликэмкIэ и ГъэIорышIапIэ иIофышIэхэм лъыхъон Iофтхьабзэу зэрахьагъэхэм нафэ къызэрашIыгъэмкIэ, ышъхьэ ифедэкIэ иIэнатIэ ащ къызфигъэфедагъ.Къалэу Мыекъуапэ щыпсэурэ бзылъфыгъэу пщыныжь зыхьын фэягъэр (шIокI зимыIэ IофшIэнхэр зыгъэцэкIэнхэу щытыгъэр) ащ ытIупщыжьыгъ. Мы лъэхъаным а бзэджэшIагъэр къызхэкIыгъэр, ащкIэ IэубытыпIэу щыIэхэр агъэунэфых.
Терроризмэм дыригъаштэщтыгъ
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм къуаджэу АдыгеякIэм щыщ хъулъфыгъэу илъэс 19 зыныбжьыр Урысыем и Уголовнэ кодекс ия 205.1-рэ статья иапэрэ Iахь къыщыдэлъытэгъэ бзэджэшIагъэм хэщагъэу агъэунэфыгъ.
КъызэрэчIэкIыгъэмкIэ, дунэе террористическэ организацием Iофэу ышIэрэм зэрэдыригъаштэрэр цIыфхэм шъхьэихыгъэу къафиIуатэщтыгъ, ежь шIотэрэзэу хэлъхэр агуригъэIонхэм ыуж итыгъ, IофшIэнхэм ахэлэжьэнхэу ыгъэдаIощтыгъэх.БзэджэшIагъэр зэрихьагъэу зэрегуцафэхэрэм пае уголовнэ Iоф къызэIуахыгъ, зэхэфынхэр макIох.
Бюджет ахъщэр ытыгъугъ
Адыгеим ит къуаджэу Очэпщые икIэлэцIыкIу IыгъыпIэ иIофышIэу бюджет ахъщэ зытыгъугъэм иIоф хьыкумыр хэплъэщт.
Урысыем СледствиехэмкIэ и Комитет следствиехэмкIэ и ГъэIорышIапIэу АР-м щыIэм Очэпщые дэт кIэлэцIыкIу IыгъыпIэм иIофышIэу иIэнатIэ къызфигъэфеди бюджет ахъщэшхо хэбзэнчъэу зыштагъэм уголовнэ Iофэу къыфызэIуахыгъэм изэхэфын ыухыгъ.ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ къыгъэхьазырыгъэ материалхэм къызэрагъэнэфагъэмкIэ, ащ IыгъыпIэм кIэлэпIоу Iут фэдэу тхылъ нэпцIхэр ыгъэпсыхи, лэжьапкIэу, нэмыкI ахъщэ тынэу пстэумкIи сомэ миллионым ехъу къыфэкIуагъ, ахъщэр ежь зэрэфаеу ыгъэфедагъ. Уголовнэ Iофэу бзэджэшIагъэр зэрэзэрихьагъэр къэзыушыхьатырэм хьыкумыр хэплъэнэу фагъэхьыгъ.
Урысыем щынэгъончъэнымкIэ и Федеральнэ къулыкъу АР-мкIэ и ГъэIорышIапIэ ипресс-къулыкъу.