Зэфэхьысыжьхэр къэнэфагъэх

Урысыем щыпсэурэ лъэпкъхэм языкIыныгъэ и Илъэсэу Президентэу Владимир Путиным ыгъэнэфагъэм къыпкъырыкIыхэзэ Iофтхьэбзэ зэфэшъхьафхэр Адыгеим щырагъэкIокIых.

IэпэIэсэ зэфэшъхьафхэм ашIыгъэ ныс­хъапхэр къызэрахьылIэгъэ зэнэкъокъоу «Россия — семья семей» зыфиIорэм икIэуххэр Мыекъуапэ щызэфахьысы­жьыгъэх. ЗАГС-м АР-мкIэ и ГъэIорышIапIэ, ЗАГС-м Херсон хэкумкIэ и ГъэIоры­шIапIэ, мысатыу организациеу «Нысхъап­хэм ятарихъ иунэ-музей» зыфиIорэм АР-м культурэмкIэ и Министерствэ яIэпыIэгъоу зэнэкъокъур зэхащагъ. Хэгъэ­гум ишъолъыр 75-мэ ялъэпкъ шъуашэхэр зыщыгъ нысхъапхэр мэлылъфэгъум щыублагъэу Iофтхьабзэм къырахьылIагъ. IэпэIэсэ 26-мэ ахэр яIэшIагъ.

— Зэнэкъокъум гухэлъ шъхьаIэу иIагъэр Урысыем щыпсэурэ цIыф лъэпкъ зэфэшъхьафхэм шъхьэкIафэ афэшIыгъэныр, ахэм ялIыкIохэм яIэпэIэсэныгъэ къэгъэлъэгъогъэныр, хэгъэгум ылъапсэу щыт унагъом щыIэкIэшIу илъыным фэщэгъэнхэр. КъырахьылIэгъэ Iоф­шIэнхэм ахэдэгъуае къытфэхъугъ. Арэу щытми, анахь дэгъухэр къыхэдгъэщыгъ, — къыIуагъ осэшI купым ипащэу, ЗАГС-м АР-мкIэ и ГъэIорышIапIэ ипащэу Лариса Волчановскаям.

ЗэхэщакIохэм зэрагъэ­нэфагъэмкIэ, Iофтхьабзэм пшъэрылъ гъэнэфагъэхэр къыдилъытагъэх: Урысыем щыпсэурэ лъэпкъ пстэуми зэдыряеу щыт шIуагъэхэм ар атегъэпсыхьэгъэныр — унэгъо пытэр, цIыфыгъэр, уи Хэ­гъэгу уфэшъыпкъэныр ыкIи ащ къырыкIощтымкIэ пшъэдэкIыжь пхьыныр. Унэгъо кIоцIым илъ зэфыщытыкIэхэр, унагъом имэхьанэ зыкъегъэIэтыжьыгъэныр, унэгъо хэбзэ-зэхэтыкIэхэм пIуныгъэ мэхьанэу яIэм анаIэ тырагъэтыныр, унагъор хэгъэгум ылъапсэу зэрэщытыр, уи Хэгъэгу шIулъэгъоу фыуиIэмрэ уасэу фэпшIырэмрэ нахь бгъэпытэн зэрэфаем IэшIагъэхэм язэнэ­къокъу изэхэщакIохэм мурад шъхьаIэу яIагъ.

— IэпэIасэхэм яIэшIагъэхэр пхырагъэкIынымкIэ амал тэрэзхэр ядгъэгъотыным тыпылъыгъ. Тикъэралыгъошхо ишъолъыр 75-мэ къарыкIыгъэ IэпэIасэхэм яIофшIэгъэ анахь дэгъухэр къыхэдгъэщыгъ, — къы­Iуагъ «Нысхъапхэм ятарихъ иунэ-музей» ипащэу Галина Яроваям.— Нысхъапхэм сабыигъом идунай тыхащэ, ары пэпчъ зы лъэпкъым ишъуашэ къырегъэлъэгъукIы. IэпэIасэхэм яIэшIагъэхэу къыра­хьылIагъэхэм ядэгъугъэ осэшI купыр ыгъэгушIуагъ,— къыIуагъ АР-м культурэмкIэ и Министерствэ иотдел ипащэу Теуцожь Нуриет.

Зэнэкъокъум иапэрэ лъэныкъоу «Свадебные символы» зыфиIорэм Челябинскэ хэкум щыщ Мантрова Екатеринэ апэрэ чIыпIэр щиубытыгъ. ЯтIонэрэ лъэныкъоу «Семейные обереги» зыцIэм Мурманскэ хэкум къикIыгъэ Комаров Николай щытекIуагъ. Ящэнэрэ лъэны­къоу «Тили-тили тесто, жених и невеста» зыфиIорэм Краснодар щыщ Яркина Марие ыкIи къуаджэу АдыгеякIэм къи­кIыгъэ Нэгъой Оксанэ текIоныгъэр къыщыдахыгъ.

— Синысхъапхэр 6 мэхъух: къэзэрэщэрэ пшъашъэмрэ кIалэмрэ, къэ­шъокIо ыкIи пщынэо- пхъэкIычэо ныбжьыкIэхэмрэ. Мыхэм ащыслъэгъэ адыгэ цыехэмрэ саехэмрэ тхьэпэ гъэчэрэгъугъэм хэсшIыкIыгъэх. Мы нысхъапэхэм илъэси 3-рэ сапы­лъыгъ. Тилъэпкъ ишэн-хэбзэ дахэу адыгэ джэгум щызэрахьэхэрэр сиIофшIэн къыщизгъэлъэгъукIыгъ, — къыIуагъ IэпэIасэу Нэгъой Оксанэ.Урысыем щыпсэурэ лъэпкъхэм языкIыныгъэ къэзыгъэлъэгъорэ нысхъапхэр шъошэ лъагэм илъхэу IэпэIасэхэм ашIыгъэх.

Лъэпшъыкъо Фатим.