Лъэпшъыкъо Ф.
Проектэу «Жъалымыгъэ зыхэмылъ щыIэныгъэр — тхыдэп!» зыфиIорэр обществэм хэхъоныгъэ ышIыным дэлэжьэгъэным фытегъэпсыхьэгъэ грантэу Адыгеим къыратыгъэм иIэпыIэгъукIэ агъэцэкIагъ. Ащ къыдыхэлъытагъэу АР-м ибзылъфыгъэхэм я Союз илъэситIум Iоф дишIагъ. Бзылъфыгъэхэм, сабыйхэм ыкIи Iэтахъохэм жъалымыгъэ хэлъэу унагъохэм зэрэщадэзекIохэрэм пэшIуекIогъэнымкIэ къашъхьэпэщт шIэныгъэхэр цIыфхэм ягъэгъотыгъэныр ащ къыдыхэлъытэгъагъ.
Проектым изэфэхьысыжь Iэнэ хъураеу «Унагъом жъалымыгъэ щызэрамыхьанымкIэ шъолъырхэм Iофтхьабзэу ащызэхащэхэрэр» зыфиIорэр АР-м ибзылъфыгъэхэм я Союз зэхищагъ. Союзым икъутамэхэр, ухъумэкIо ыкIи социальнэ къулыкъухэм ялIыкIохэр, психологхэр, журналистхэр ащ хэлэжьагъ.
АР-м ибзылъфыгъэхэм я Союз къызэрэщаIуагъэмкIэ, район пэпчъ тренингхэр ыкIи мастер-классхэр ащызэхащагъэх, ахэм ахэтыгъэх зыкъэухъумэжьыным фэгъэхьыгъэхэр, психологхэр зыхэлэжьэгъэхэ зэхахьэхэр, ухъумэкIо ыкIи социальнэ къулыкъухэм адашIыгъэ зэдэгущыIэгъухэр. Iофым фэгъэхьыгъэ игъэкIотыгъэ къэбархэр къызщиIотыкIыгъэ тхьапэхэр агощыгъэх, апшъэрэ классмэ ащеджэрэ кIэлэеджакIохэр зэхэгущыIэжь-зэIукIэхэм къахагъэлэжьагъэх.
— Непэрэ Iэнэ хъураем тызыщытегущыIэщтыр бзылъфыгъэхэу, сабыйхэу ыкIи Iэтахъохэу жъалымыгъэ хэлъэу зыдэзекIохэрэм IэпыIэгъу тызэрафэхъущт амалхэр ары. Къэралыгъо проектым илъэситIо тыдэлэжьагъ, джы непэ зэфэхьысыжьхэр тшIыщтых ыкIи ыпэкIэ а гумэкIыгъом тызэрэпэуцужьыщтым тытегущыIэщт. Бзылъфыгъэхэм ыкIи сабыйхэм апае лэжьэрэ «кризиснэ» гупчэхэм психологическэ, юридическэ IэпыIэгъухэр ащарагъэгъотын зэралъэкIыщтыр бзылъфыгъэхэм ыкIи зыныбжь имыкъугъэ ныбжьыкIэхэм афэтэIуатэ. Джащ фэдэу АР-м ибзылъфыгъэхэм я Союз ителефон номерэу 8-800-700-89-32-м теонхэ зэралъэкIыщтыр цIыфмэ ядгъэшIагъ. Ар зылажьэрэр илъэси 6 мэхъу. Илъэсым бзылъфыгъэ нэбгырэ 30 — 40 фэдиз гузэжъогъу хэфагъэхэу къытфытео, ахэм IэпыIэгъу тафэхъу. ГумэкIыгъом тыдэлэжьэным фэшI грантыр IэпыIэгъушхо къытфэхъугъ. ШъхьаIэр гузэжъогъу чIыпIэ ифагъэхэр къытэкIолIэнхэу ары. Проектым къыдыхэлъытагъэу Iофтхьэбзэ 22-рэ зэхэтщагъ. ТапэкIи игъэкIотыгъэ проектыкIэхэм тадэлэжьэщт,— къыIуагъ АР-м ибзылъфыгъэхэм я Союз ипащэу Вэрэкъо Хьалимэт.
Лъэпшъыкъо Фатим.