IофшIэгъу лъэхъаныр зэфишIыжьыгъ

АР-м и Концерт зэхахьэ и къэралыгъо симфоническэ оркестрэ IофшIэгъу лъэхъаныр зэфишIыжьыгъ. Мэкъу­огъум и 25-м Адыгеим и Къэралыгъо филармоние кIэух концертэу «Музыкальнэ калейдоскоп» зыфиIоу щыкIуагъэм музыкант ныбжьыкIэхэр хэлэжьагъэх.

Дунэе мэкъэмэусхэм япроизведе­ниехэр зыхэхьэгъэ концертыр симфоническэ оркестрэм хьалэмэтэу ыгъэ­псыгъ. Бах, Штраус, Глиер, Форе, Цфасман, Прокофьевым ыкIи нэмыкI классикхэм атхыгъэ мэкъамэхэр ащ щыIугъэх. IофшIэгъу лъэхъаным къыкIоцI къатыгъэ концертхэм афэмыдэу, нахь чэфэу, гъэшIэгъонэу концертыр зэха­гъэуцуагъ.

— Илъэсым къыкIоцI концерт зэмылIэужыгъохэр къэттыгъэх, академическэ фестивалитIу зэхэтщагъ, программэ хьылъабэ дгъэцэкIагъэ. Ащ къыхэкIэу, IофшIэгъу лъэхъаным изэфэшIыжьын программэ нахь гъэпсынкIагъэу зэхэдгъэуцуагъ, — къыIуагъ Урысыем изаслуженнэ артистэу, АР-м и Къэра­лыгъо симфоническэ оркестрэ ихудо­жественнэ пащэу ыкIи идирижерэу Андрей Семеновым.

Къэралыгъо симфоническэ оркестрэм къэгъэлъэгъоныр шъошэ лъагэм илъэу къытыгъ. Концертыр анахь къэзыгъэ­кIэрэкIагъэхэм ащыщ орэдыIоу Дарья Умбинар. ЯтIонэрэ Iахьым Бах икантатэу «Кофейная» зыфиIорэр симфоническэ оркестрэм къыригъэIуагъ. Урыс лъэпкъ Iэмэ-псымэхэмкIэ къэралыгъо оркестрэу «Русская удалым» исолистэу Абасэ Долэт сэмэркъэу зыхэлъ сольнэ партие концертым къыщиIуагъ.

— Непэрэ концертым роль гъэшIэгъон — Бах и «кофейнэ» кантатэ къыхэ­хыгъэ «стародумыр» къыщысэшIы. Ты пхъашэу зипшъашъэ кофе езымыгъа­шъощтыгъэр къэсэгъэлъагъо. А лъэ-хъэнэ чыжьэм кофе уешъоныр нэмыц лъэп­къым мы­тэрэзэу ылъытэщтыгъ. А темэр къизы­IотыкIырэ мэкъамэм Бах сэмэркъэушхо хилъхьагъ. ЦIыфхэм агу рихьынэу сэгугъэ, — къыIуагъ Абасэ Долэт.

Классикэр, сэмэркъэур, орэд мэкъа­мэхэр сценэм зэгъэфагъэу щызэIукIагъэх. «Музыкальнэ калейдоскоп» зыфиIорэ концертыр симфоническэ оркестрэм дахэу къыдэхъугъ, еплъыгъэхэм мэфэкIышхо афэхъугъ.

Лъэпшъыкъо Фатим.